Read Mid Grand Valley Dani 2 Korintus 12 Bible Online

2 Korintus 12 - Mid Grand Valley Dani bible

2 Korintus 12

¹An hogorakhilik waga lagei meke iti, usak dek mekeat he, hogorakhageinat o. Ninoe Etagapogot nen an nileken hoagaluk yoknekhemo na'bi baga higik, na'bikaka baga higik, hasigi meke igin o.

²Empat belas tahun alebat ap an nilu meke ageikhe Kristus ipisak hunik welageikhe meke Allah nen pogot oba hurli pere agorek thogotdiluk hurli ageikhe upu etoma baga lia'isikhe iti nilu. At iti ebeat lia'isikhe a? Agoreke lia'isikhe a. An nokodek. Nopase Allah at ilu o.

³Ap iti Allah nen pogot oba hanoma eloma lia'isikhemo wene akhuni nen egarek degat, nen usak erlok degat, meke asuk holhikhe nilu o. Itithogon mekeat he, ebeat lia'isikhe a? Agoreke a. An nokodek meke re, Allah at ilu igi iti.

⁵Ap iti hasik anek hogorakhe dogolik, an nekaerek hasik hogorakhigidek meke re, nebe erlok dek iti hasik anek hogorakhageinat o.

⁶An hogorakhagein halok he, nane eberogonat igin iti nen, akhuni kepu meke nen egarek hak igin dek o. Itithogonat meke re, akhuni aperek nen an hegerek iti meke hasik hogotnabunogo iluk, nebe inileken niigik, nane inasuk holhik, hagakharek iti baga hutdanuagaluk, ageikhe iti meke igidek thogotdigin iti o.

⁷An nen, “Na'bikaka baga elalinat nileken higi iti nayuk o,” iluk nekaerek nen hogorakhaunogo iluk, akhuni inebe bagake arlok ukisinem hinet wakharek hak, u noba agunem hinet wakhe dogoagaluk, noba 'banhikhemo, Iblis nen ayoko 'bisikhe meke hakene noba werekma, ninoe Etagapogot nen henogo ula'isoagaluk niki henagan oba ayoko 'bigi mekeat,

⁹at nen he, “Hat erlok dek halok he, an nobatne horleagatma hebe nakmuthakherek etnogo nen, erlok hano dogogin o,” iluk yoknikhikhe. Itithogonat yoknikhikhe iti nen, at Kristus obatne an nakla 'banhikhe meke itiat dogoagaluk, an yi meke ti meke hasik erlok degat dogolik, nakla arlekenhogo hogorakhekhe dogogin o.

¹⁰Iti nen, an Kristus hasik, nebe erlok dek agei halok, akhuni nen nabok weak palho halok, wiik-weakhogon hagatnakho halok, yi aik ti aik hagatnakho halok, wim yakhe dogolik inasuogoluk hoborisegarek hak hobotneekho halok, an erlok degat werekma, iti baga nen nobatne agarek iti nen nakla arleken akhegerek.

¹¹It ap Kristus nen inayoko 'biluk la'isa agarek meke negen hagatlatluk witluk, “At Paulus etaga dek,” iluk egarek iti, an eberogonat netaga dek. It koktek inetagapogot higi! Itithogon dek o. Hit nen hutdaniluk nalon halogo yoknisusak mekeat he, itithogon egethep dek iti nen he, eberogonat ap kepu nen egarek hak, yokhisigi iti o.

¹²Hit nen he, “Paulus he, Kristus nen ayoko 'biluk la'i ageikhemo,” iluk ekagat hutdanuagaluk, an ninom dogolik yi meke ti meke hasik nobakhanini hapugutdiluk hagakho werekma, akhuni nen hutduagaluk, Allah nen obatnerogon yi meke ti meke elalinat hagakhe lageikhe.

¹³Hit hinobasik hagakherek iti, it Allah a'buri yi ai ti ai natogokharek meke hasik hagakherek meke iti ipisak walhaumo, ki meke hasik erlok dek hagathinakhi. An yabu hagakhe lagei hasik, “Niki oko ageikhe woknitni,” iluk hinoba tiolhidek welagagi iti erlok dek hagathinakhi he a. Halok he, weagathinakhi iti hasik thagalogo degetdisalok hinakla hano atni o!

¹⁴An alep niki pere baga wagagisik, yabokane ageikhe wisigiluk karelogo 'bigirik welagei o. An hinoba wisigin iti, yi meke ti meke ina'buri nen inagosa inopase lak heago wogeisegarek 'buk. Dek o. Inagosa inopase lak nen, ina'buri inobasik heago wogeisegarek iti nen, hit meke yi meke ti meke kino hinoba tiologo yokhisasigin 'buk. Dek o. Hinebeat herakhinabik wisigin o.

¹⁵Iti hagat he, hit hinetaiken hasik an nameke yi meke ti meke 'binagagik, nebe inom 'binagagik, netaiken oba nen nakla arleken akhekhe dogolik 'binagusagat 'binagagi o. An hit hinebe netaiken hunik werek korlegat he, hit anek he, an nebe hinakmu dek negen dogosak a?

¹⁶An nen he, hit hinoba akinetdigiluk hit meke kino yokhisigidek iti ekagat werek iti. Meke re, hit aperek nen ekhe dogolik, “At Paulus obabut kauk nogo nen, yi meke ti meke thaburagaluk, ane 'bitokhogon yoknisekherek,” iluk ekhe lagap iti,

¹⁷an nagarumi hit hinoba la'isa agagi emenogo nen, hit meke aperek thaburogo an woknesi agoukha nogo a? Motok dek o.

¹⁸At Titus hinoba wisuagaluk akla kagalhigisik nen, ninagarlak Allah a'but ageikhe at ipisak la'isa agagimo wagoukha etnogo, wagoukhasik, at Titus nen hit nen 'bisigip meke aperek munenogo horlasikhe nogo a? Motok degat o. An Titus nipisak he, ninobabut opakiat hagakhe lagagu dek nogo? It aperek alep inisok 'bilik lageikharekma, it aperek yabokane oba dukhogon 'bilik lageikharek hak, at Titus an nipisak yabu tak-tagat hagakhe lagagu dek nogo a?

¹⁹Hit hinakla nen he, “At Paulus wene ekaerek oba degerogo iliogo,” iluk haganeat nen ekhe lagap mekeat he, an itithogon apekhe lagei dek o. Nagarlak lak nerugi. Hinebe nakmu. At Allah il oba, an Kristus nipisak hunik dogoligat ekhe lagei iti. Yi meke ti meke hagakhe lagei iti, hit hinetaiken horle asuagalugat hagakhe lagei o.

²⁰An yabokane hinoba wisigin iti witluk nen, an nen, “It inobabut hano werekma ligin,” iluk apekhe lagei hak, dek. Weak werekma 'bithisa ageik, nen, hit nen, “At Paulus obabut hano,” iluk egethep hak, dek. Weak dogolik 'bithisa ageik, hagasunogo iluk, nelabut hiriogo. Hit-hit hinom wene yakhik, ua palhik, hinakla aga dageigik, hinekaerek hasik anek hagakhik, inabok weak thelekma palhik, limago palhik, hinekaerek nen hogorakhigik, yugunat-yaganat hagakhik, hagakhunem an wisusak iti, nayuk.

²¹Itithogon hagakhunem, an wagunem, nopase Allah nen hit hinobabut hagakhe lagap iti hasik hit hinil oba nekarli warogo thebetdanusak iti nayuk. It akhuni hit meke aperek doalegat nen humi inaguni werek meke, ap inagugi werek meke nen param ha'isigik, horlak tharlisik meke, elege nen ha'isigik, inekarli dek weak motok hagakhik, o haganeat nen hagakharek meke here'isalok inobabut hebelageidek motok welageikharek iti hasik, de asisunogo iluk nelabut hisik welagei o.