Read Mid Grand Valley Dani 2 Korintus 13 Bible Online

2 Korintus 13 - Mid Grand Valley Dani bible

2 Korintus 13

¹ An alep niki pere baga hinoba wagagisik nen, yabokane ageikhe wisigin iti o. Allah ane baga holal men iluk waganek werek, “Akhuni nen it aperek yi wene ti wene inoba 'buogoluk halok he, akhuni inebe pere a? Henagan a, weak hagakhunem inileken hega meke nen, Eberogonat ninileken hogo, isi halok he, eberogonat apausak,” iluk isikhe iti nen he, an witluk, iti itithogonat hagasisigin iti o.

²An alep niki ageikhe wagagisik oba nen yabokane wagagi iti baga, it akhuni hit meke aperek alebat weak hagakhukha meke inom, nen it aperek o etoma meke inebe tha'bokhogonat inom, inasuk wakhigi meke yogotak an nebe walegat dogolik inakla eberogo yogeisageinat o. An yabokane witluk nen, it iti thebelogo 'bisasigin dek. Ukum inoba 'bisigin o.

³Hit nen he, “Paulus iti, Kristus akla dogolik iliogo a? Dek a,” iluk nobabut paluogoluk egep iti, nebe wagunem ekagat hutdanugunat o. At Kristus hit hagakhethep iti hasik ebe erlok dek nen obakhanini huk agarek 'buk. At hit hinom dogolik obatneat werek o.

⁴At Kristus ebe erlok dek werekma o baga meldiluk wakhukha mekeat he, at Allah obatne baga ilugutdisikhemo ilugat welagarek. Iti hakeneat, nit at ninom hunik dogolik erlok dek welago mekeat he, at Kristus ninom hunik niniluk dogolik nen, Allah obatne baga hit hinobasik hagasisugun o.

⁵Hit nen he, “Nit ninetaiken Kristus oba hakotdisugu etnogo hakokthegat welago a? Dek a,” iluk hinekaerek nen hinobabut hutukhogon palano. Itithogon palekhe dogolik, erlok hagatlageidek halok he, “Yesus Kristus ninakla werek,” iluk ekagat hugun o.

⁶Nen, hit nen, nit ninobabut palhe dogolik, “Paulus lak inobabut palho meke erlok dek ageidek. Kristus nen eberogonat inayoko 'bisikhemo,” iluk ekagat nisekhe lagap apigi.

⁷Nit nen he, hit weak ageikhe hagasunogo iluk, Allah ayoko 'bekhe lago. Iti, hit nen hinileken nisekhe dogolik nen, “Paulus lak hano hagariogei,” iluk ninobabut palogo nen ekhe dogobageik iluk ekhe lago dek o. Nit ninobabut palhunem, hit nen, “It erlok dek hakene hagatlageikha,” apegep halok he, yugunat. Here'isani o. Hirat hano hagakhe dogobageik iluk hit hinobasik Allah ayoko 'bekhe lago o.

⁸Iti, nit nen ebe wene thagalusak erlok dek. Legesusak anek welago.

⁹Nit erlok dek werek korlek he, hit hinobatne werek dogosak halok he, hano iluk, ninakla arleken akhekhe lago. Iti hasigat, hit hinetaiken 'bogokhogon horle asuagaluk, Allah ayoko 'bekhe lago.

¹⁰Iti nenat, nebe walegat dogolik wene yi holal waganogo 'bekhe lagei. Nebe yabokane wagei halok he, ninom dogolik, nane puk weak wenakhisaunogo iluk, holal itithogon waganogo 'bekhe lagei iti o. Ninoe Etagapogot nen obatne woknikhikhemo iteerek welagei iti, hit hinebe weagathinabuogoluk 'buk. Hinetaiken horlethinabuogoluk iteerek welagei o.

¹¹Nagarlak lak nerugi. Wene ilugun oba arat men yokhisak. Hinakla arleken akhigik, hinetaiken 'bogokhogon horletdakhigik hagakhe dogono. Wene hinasuk warik wagei iti, hinasuk hanorogo holino. Hinetaiken opakiat dogolik, hinom dapukhogon dogono. Itithogon hagakhe dogogun halok, Allah akhuni akmurinakhik, inom dapukhogon hano 'bisigik, hagakherek meke etnogo thethisik dogogin o.

¹²Hit-hit nen, Allah hasik heagei hinape tharluk wat-wat hagarik lano. Allah a'buri yoma meke tha'bokhogonat nen, heagei wathinakhaat o.

¹³Ninoe Etagapogot Yesus Kristus obabut hano etnogo nen hanothinakhik, ninopase Allah nen akmuthinakhik, Agoreke nen hano dapukhogon 'binageigik, hagakhe dogoak o.