Read Mid Grand Valley Dani 2 Korintus 2 Bible Online

2 Korintus 2 - Mid Grand Valley Dani bible

2 Korintus 2

¹Iti nen he, an hit hinoba witluk, hinakla weagatdusak werek halok, huk asigin iluk, nakla arat apigi o.

²An nen hit hinakla weagathinabumo, hit hinakla weak werek korlek, an nakla yabokane tha nen hanotnabusak? Erlok dek iti o.

³Hit nenat an nakla hanotnabusak iti. Hit an nakla hanotnabumo an nakla arleken akhigi halok he, hit tha'bokhogonat hinakla arleken akhausagat apekhe lagei. Iti nen, an hit hinoba wagunem hit nen an nakla weagatnabinogo iluk, hinoba wisu na'it nen, wene arat holal waganogo hinoba la'i agagi iti o.

⁴Wene holal waganogo alebageik la'i agagi iti, nakla weagat, netaiken akinatma, de kogat aga dogolik la'i agagi o. Hinakla weak asuagaluk la'i agagi 'buk. Dek o. An hit nakmu motok welagei iti hinilu asuagaluk hinoba la'i agagi iti.

⁵Ap ageikhe etnogo nen ninakla weagatdisikhe iti, an anek nakla weagatdisikhe 'buk. Iti hit tha'bokhogonat hinakla weagatdisikhe usak mekeat he, ap inobabut itigirlik meke halok, hinebe doalegat nen ap iti asuk warogo ukum oba 'bisigip iti arat. Halok he, an yabokane nane obatnerogon ukum oba 'busak he, na'it.

⁷Yabokane, at weak hagakhikhe meke iti, akla motok weak atluk, ebe weak asinogo iluk, akla hano asuagaluk weak hagakhikhe meke hit nen thagalogo here'isalok, etaiken thebelino.

⁸At ap iti ebe hinakmurogo apuke waganubageik nen iluk, hinasuk warogo yokhisigi iti.

⁹An nen, “Hit itithogon hagatno,” iluk, yakulhisasigi etnogo, nane hologo hagariogei a? Dek a, iluk hinobabut paligiluk wene iti holal waganogo hinoba la'i agei iti o.

¹⁰At nen hit weagathinakhe meke iti, hit nen thagalogo here'isegep halok he, an nen thagalogo here'isageinat o. An nen thagalogo here'isausak meke werek halok he, at Iblis, obabut kauk hagakherek ninilu iti nen, erlok degetdinaninogo iluk, hit hinobasik at Kristus il obaat thagalogo here'isagein o.

¹²An o Troas etoma wagagi hak, hano wene Kristus hagakhikhe etnogo wene, akhuni etoma meke hano asuak nen iluk wene yogeisoagaluk ninoe Etagapogot nen holak yaknikhikhemo yogeisekho welagagi.

¹³Meke re, nagarlak Titus etnogo nipisak abuk ageidek nen he, nelabut hisik welagagisik nen, akhuni etoma meke heagei warinabiluk nen, o Makedonia wagagi.

¹⁴Itithogon mekeat he, at Kristus obatne ageikhesik elokhe waganhe korlek nukhunem, nit at ninom hunik meke Allah nen Kristus oporlik woknisik nekherek, iluk hogorasuok o. Itithogon woknisik nekhe dogolik, obasi hano meke thak-pakhogon lagarek hak, at Kristus hagakhikhe wene etnogo nit nen wialogo o yi ai ti ai wolok loagaluk woknisik nekherek.

¹⁵Iti, at Kristus nen, obasi hano meke Allah hasik hetu hunisu hak, nit ninebe Allah wogokherek iti. Wogokhunem, it akhuni alomatlariogei meke nen, “Obasi weak. Akhuni inebe inakharek meke obasi hakene,” palharek. Meke re, it akhuni tilinabiogo meke nen, “Obasi hano, inebe inilugurinakherek meke hakene,” palharek. Itithogon palharek iti nen, wene iti tha hak nen erlok wolok lausak apegep.

¹⁷It akhuni aperek inebe doalegat nen, yi meke ti meke oko hau wolok lageikharek hak, Allah ane itithogonat wolok lageikharek. Meke re, nit anek he, itithogon dek. Allah nen, at ane wolok loagaluk ninayoko 'bisikhe iti nen, at il obaat ninetaiken opakiat Kristus ninom hunigat dogolik, yogeisilik laga lago o.