Read Mid Grand Valley Dani 2 Korintus 4 Bible Online

2 Korintus 4 - Mid Grand Valley Dani bible

2 Korintus 4

¹At Allah ninebe akmu nen, at hasik yigithogon hagakhe dogoagaluk ninayoko 'bisikhe iti nen, ninakla puk atluk here'isigidek hagakhoat welago.

²Nit he, akhuni nen yi meke ti meke limago weak hagakharethek inekarli agarek iti meke here'isasugu. Itithogon here'isalok, akhuni nukhetdisigik, Allah ane wene ageikhe meke oba lapelogo yogeisigik, hagakhorek dek. Akhuni yoma inakla tomok nen hutdinoagaluk, wene ebe wene Allah iloba thelekmaat yogeisilik nekhe lago.

³Hano wene yogeisilik nekhe lago iti, akhuni aperek nen hutdiliogei mekeat he, it akhuni nuk ariogei meke anek he, wene iti hasik inetaiken amukhak laberek werek o.

⁴Itithogon werek iti, it akhuni agat oba meke inopase Iblis etnogo nen inetaiken Allah oba hakotdigidek meke iti, inetaiken mumerinakhikhemo werek o. At Kristus Allah hakene atma, ebe hogorakharek wene, hano wene iti nen liarinabusak mekeat he, liarinabinogo iluk, inetaiken mumerinakhikhemo werek iti o.

⁵Wene yogeisilik nekhe lago iti, ninekaerek hagakhorek wene 'buk. Dek o. At Yesus Kristus hagakhikhe mekeat o. At Yesus ebe ninoe Etagapogot iluk, nit at hasik hit hinatuaneke welago, iluk yogeisogorek iti.

⁶ At Allah nen ekhe dogolik, “O mum iti akla nen lia atnek,” iluk isikhe iti hak, at nenat nit ninakla mum meke iti liatninakhikhemo welago. Itithogon dogolik, at Kristus elokhoken a'bi'bal yakhunem ninileken lakhalok nen, at Allah hogorakharek meke etnogo ebe itigirlik iluk hutdekhe dogoagaluk itithogon liatninakhikhe.

⁷Nit wene yigithogon yogeisilik nukhunem, akhuni inileken nisekhe dogolik, inakla nen, “It inobatne dek. At Allah obatne werek higi,” iluk ekagat hutdekhe dogoagaluk, isoak agat meke hagarogo henakharek hak, hano meke iti nit erlok dek meke ninakla 'binanhemo werek o.

⁸Akhuni nen yi aik ti aik hagatninabiogei meke, ninebe motok weagatninakhidek welago. Itithogon hagatninakhunem, nikithogon hagasu he, ninobakha palariogo meke re, ninakla puk ariogo dek.

⁹It akhuni aperek nen, weagatninabuogoluk hagariogei meke re, at Allah nen ninarligat here'inanhidek o. Tugi ninakhunem thogoumhogo laga lago meke re, ninebe motok watlaga lago dek o.

¹⁰Itithogon watlageidek welago iti baga, at Yesus ebe watlageikhesik iluk ageikhesik nen, nit ninakla iluk welagarek iti, ekagat asuagaluk, at wakhukha hak, nit hibiku-yogoku ninasuogoluk hagakhunem tilninakherek iti.

¹¹At Yesus watlageikhesik iluk ageikhesik nit ninebe watlagorek meke yi ninakla iluk welagarek iti ekagat asuagaluk, nit yogotak niniluk werek korlek, at Yesus hasik hibiku-yogoku ninasuogoluk hagakhunem tilninakherek iti.

¹²Akhuni nen nit ninebe watlasuagaluk hagatninabiogei iti baga, Allah nen hit hinebe hiniluguthinabiogo iti o.

¹³ At Allah ane baga holal waganogo 'bekhe dogolik, men isikhe, “Netaiken at oba hakotdiluk dogolik nane igi o,” iluk isikhemo holal waganogo 'bisukha tak-tagat, nit nen ninetaiken at oba hakotdiluk wene yogeisekhe lago iti o.

¹⁴Itithogon yogeisekhe dogolik, ninakla men apekhe lago. At Allah nen, ninoe Etagapogot Yesus apuke ilugutdisikhe iti hak, nit meneke at ninom tak-tagat ninilugutninabiluk nen, hit ninomat Yesus oba 'binani ligin iluk ninilu.

¹⁵Nit yi aik ti aik tha'bokhogonat hekhe lago iti, hit hinobasigat o. Itithogon hekhe lago baga, at Allah obabut hano motok nen akhuni aperek akmurinakhik, aperek akmurinakhik, inebe doalegat akmurinabiluk tilinakhunem, inebe doalegat nen, Allah heagei wariogei iti baga, it aperek nen Allah hogorariogei o.

¹⁶Iti nenat, ninakla puk atluk here'isigidek ninobatnerogo hagakhe lago. Ninoado itikmanke yi re, weak aga korlegat, ninakla akmanke, hibiku-yogoku ket hagatninakho motok werek.

¹⁷Nit yogotak, yi aik ti aik hagatninabiogei iti, elanma hasik herlekha'bugat negen o. Meke re, itithogonat hagatninabiogei iti baga, yabokane hogorakharek meke ikhok motok dogogin meke motok kogat ite asugun o.

¹⁸Nit he, yi meke ti meke ninileken hogorek meke iti dek asigin meke re, ninileken hogorek dek meke iti ikhok motok dogogin iti nen, ninileken hogorek meke iti hasik ninaporoak thebe iluk hagakhidek, ninileken hogorek dek meke iti hasik ninaporoak thebe iluk yabu hagakhe lago o.