Read Mid Grand Valley Dani 2 Korintus 6 Bible Online

2 Korintus 6 - Mid Grand Valley Dani bible

2 Korintus 6

¹ At Allah nen, men isikhemo holal waganogo 'bisukhama werek, “An nen he, hit hinane nasuk holusak apigi bagaat holhi o. Hinebe tilhinabusak tak-tak obaat yomakhisa agei o,” iluk isikhe iti, Allah nen ninane asuk holusak he, o yogotak yaat o. Nen, ninebe tilninabusak he, o yogotak yaat o, iluk hinakla ebetni o. Halok he, nit Allah ninom at hasik hagakhe dogolik, at obabut hano nen akmuthinakhikhemo, at ebe waganhigip etnogo, we yugunat alomakhup o, iluk hinasuk wakhe lago iti o.

³Akhuni aperek nen he, “Hit Allah hasik hagakhe lagap iti korlo hagakhe lagap,” iluk ninabok weak palunogo iluk, akhuni aperek weak hagasuagaluk inakla kagalogo yi meke ti meke korlo'ba hagakhe lago dek.

⁴Akhuni nen he, “It Allah nen inayoko 'bisikhemo, at hasik hagakhe dogosak mekeat hagariogei,” iluk hutdinanuagaluk, yi aik ti aik hagatninakhik, wiik-weakhogon hagatninakhik, umunetnisigik, hagakhe korlek, ninobakhanini hapugutdiluk dogolik yi meke ti meke ekagat hagakhe lago.

⁵Tugi ninakhik, niniki herle warogo o herle werek 'bisegarekma 'binanhik, akhuni doalegat nen ninoba wiik-weakhogon ninasusak hagatlageik, hagakhe korlek welago. Yabu thet weak hagakhik, noge usak degat ageik, hipiri abu ageik, hekhe dogolik hagakhe lago.

⁶Itithogon hekhe dogoligat, ninobabut weak hagakhidek karelek dogolik, hano wene ninilu welageik, ninobakhanini hapugutdiluk welageik, ninobabut enago welageik, hagakhe lago. At Allah Agoreke ninakla dogolik akhuni inebe eberogonat ninakmurogon welago.

⁷Itithogon dogolik, Allah obatne baga ebe wene yogeisilik nekhe lago. Itithogon yogeisilik nekhe dogolik, akhuni nen he, “Sikhe thege niniki ebelak-ebelak hago welago,” iluk egarek hak, nit Allah akla warlok meke hagakhe lago iti, niniki ebelak-ebelak hago welago.

⁸It aperek nen hogotninakhik, ninabok hano igik, hagakhe korlek, it aperek nen wenaknisigik, ninabok weak palhik, hagariogei. Wene eberogonat yogeisekhe korlek mekeat he, “Inekalat nukhetninabiogei,” iluk wenaknisiliogeiat.

⁹Akhuni nen ninebe inokodek meke thalek, tha'bokhogonat nen inilu mekeat welageik, ninebe watlasuagaluk hagatninabiogei mekeat he, niniluk welageik, yi aik ti aik hagatninakho korlegat he, ninebe motok watlageidek welageik, hagakhe lago iti 'bikhani!

¹⁰Ninakla weak dogoligat he, ninakla arleken akhekho motok welago. Yi meke ti meke ninikimo dek mekeat he, akhuni doalegat hano meke inilmo horleak asuagaluk hagatdisekhe lago. Ninameke motok dek mekeat he, ebe meke tha'bokhogonat ite agosik welago.

¹¹Itithogon dogolik, hit akhuni Korintus meke, nagarlak lak nerugi. An nakla wene ageikhe thebeldigidek motok tha'bokhogon yokhisigi iti. Hit hinobasik an nakla wene arat lia'agei.

¹²Nit nen hit hinobasik, ninakla wene itithogon lia'agosik welago mekeat he, hit anek he, nit ninobasik hinakla akin welagap o.

¹³Halok he, hit nen dagakhogon nit ninobasik hinakla lia'atni o, iluk an nekaerek na'buri yogeisau hak yokhisigi iti.

¹⁴Hit akhuni inetaiken Allah oba hakotdigidek meke iti, hinom agarle hunekhup o. Akhuni mothogon hagariogei meke inom, inasuk warek dek hagariogei meke inom, inom hunik dogosak nogo a? O lia iti inom, o mum iti inom, opakimo dogosak nogo a? Motok erlok dek o.

¹⁵At Kristus Iblis ipisak, inetaiken opakiat dogosak nogo a? Nen, akhuni inetaiken Allah oba hakotdiliogei meke, it aperek inetaiken Allah oba hakotdiliogei dek meke inom hunik dogosak nogo a? Motok erlok dek o.

¹⁶ At Allah ai halek iti inom, kaneke iti inom, opakimo dapulusak nogo a? At Allah iluk motok welagarek meke ai halek he, nit ninebe yiat o. At nen he, men isikhe, “It inakla an nai halogo dogogin o. Inaklake etoma nekhe dogogin o. It inopase Allah anat dogogin o. Nen, an na'buri irat dogogun,” iluk isikhe iti nen,

¹⁷ ninopase Etagapogot etnogo nenat, ageikhe men isikhe, “Hit hinebe it akhuni aperek inaklake, inaklake, welagap iti here'isalok, nomokhogon dukhitni o. Dukhi agunem, an nen wokhinabik nen, weak meke iti yabokane hiniki hakha ukugup o.

¹⁸ An hit hinopaseat dogogin o. Nen, hit an na'buriat dogogun o, iluk ninopase Etagapogot yi meke ti meke hagasusak anek etnogo nen isikhemo,” iluk holal waganogo 'bisukha.