Read Mid Grand Valley Dani 2 Korintus 8 Bible Online

2 Korintus 8 - Mid Grand Valley Dani bible

2 Korintus 8

¹Nagarlak lak nerugi. At Allah obabut hano etnogo nen a'buri o Makedonia meke yoma inobabut hano hagarinakhemo hagakha meke hinilurogo yokhisak.

²It akhuni aperek nen yi aik ti aik doalegat weagarinakho korlegat, it inakla arleken motok akhiliogei iti baga inobabut ekagat aga. It inameke motok dek inerlageik dogoligat, it meke doalegat, debekhogon it akhuni aperek wogeisiliogei iti.

³Wogeisausak tak-tagat wogeisekhe dogolik aperek inom oba dukhogon wogeisiliogei. An inobabut nilu. Nileken hisigirik nen yokhisekhe lagei o. It akhuni aperek nen inakla kagalhidekmaat, inekaerek inakla nen kagalogo,

⁴men yoknisekhe lageikha, “Nit nen meneke, Allah a'buri o Yudea meke aperek yomageisauwok nen iluk yokhogo o,” iluk nit yoknisekho motok welageikha.

⁵Nit ninakla nen, “It itithogon hugun,” iluk apogo meke werek korlek, inebe tak ninoe Etagapogot wogokhasik nen, at Allah akla apasikhe hak, inebe nit woknisegaat o.

⁶Woknisegama nen, at Titus hit hinom dogolik, hit nen Allah a'buri aperek hinakmu nen yomageisauwogoluk hagakhigip meke iti hasik yokhisekhe laga hagat, ilugun aban werekma arat natogosuagaluk akla kagalho.

⁷Hit he, yi meke ti meke hasik hano motok hagakhe lagap. Iti, hinetaiken Allah oba hinobatnerogon hakotdigik, hano wene hano motok yakulisigik, ebe wene hano motok hinilu ageik, akhuni aperek yomageisauwogoluk akilukhogon hagakhik, nit hinakmurogon motok welageik, hagakhethep iti hak, hit meke it Allah a'buri aperek iti hano motok 'bisobageik iluk yokhisigi o.

⁸An nen, “Hit itithogon hagatno,” iluk, nane obatnerogon yokhisigi dek o. It Allah a'buri o Makedonia yoma meke nen inakla nen kagalogo it meke natogorlogo Allah a'buri iti akilukhogon yomageisiliogei iti hak, hit meneke, iti hinakmurogon yomageisugunem, “Eberogonat it inakmu werek,” iluk ekagat asuagaluk yokhisigi iti o.

⁹Ninoe Etagapogot Yesus Kristus obabut hano nen akmutninakhikhe etnogo hit hinilu motok apigi. At ilmo horleak welageikhe mekeat he, at erlageik motok ageikhe iti baga, hit ebe meke hinilmo horleak asubageik iluk, at erlageik motok ageikhe iti o.

¹⁰Yomageisausak iti hasik, an nakla apekhe lagei meke yokhisak. Tahun alep iti baga, akhuni aperek aban werek korlek, hit nen tak, “It iti yomageisauwok,” iluk wene palhigisip akilukhogon hinetaikenma nen yomageisauwogoluk aperek 'bisasigip iti hak, yogotak ilugun arat 'bogokhogon yomageisobageik iluk igi o.

¹¹Hit nen alep hinakla arlekenhogo, “Itithogon yomageisauwogoluk,” isigip iti hak, yogotak itihogonat hinikimo asigin meke tomok arlekenhogo ilugun oba arat 'bogokhogon natogosubageik iluk yokhisigi o.

¹²Hit meke dek meke 'buk. At he, werek meke hinetaiken oba nenat, it iti 'bisagun halok he, at Allah nen, “Hano 'bega,” iluk apagein o.

¹³Hit anek akinhogo yomageisugunem, it nen inakla therogon werlegat waganuagaluk yokhisigi dek o. Hinom tak-tagat yomak-yomak hagakhe dogosak iluk yokhisigi o.

¹⁴Hit meke yogotak doalegat werek iti. Halok he, it dek werek meke iti 'bisausak o. It meke yabokane doalegat atluk nen, hit dek atluk werek halok aperek 'binagusak iti o. Itithogon hagasugun halok, hit nen yomageisigik, it nen yomakhisigik, hinom tak-tagat hagakhe dogogun iti.

¹⁵ Itithogon hagakhe dogosak iti hasik, Allah nen, men isikhe, “At ageikhe ameke doalegat natogorlogo 'bakhagein meke iti titurogo 'bigin dek o. Nen, at ageikhe ameke pererlagat natogorlogo 'bakhagein meke iti dek asigin dek o,” iluk isikhemo holal waganogo 'bisukha.

¹⁶Nit nen hit hinobasik obatnerogon hagasuogoluk hagakhe lago hak, at Titus itithogonat hagakhe dogoagaluk Allah nen akla kagalhemo hagariogo iti nen, Allah heagei wakhe dogouok o.

¹⁷Iti re, nit nen at akla kagalho mekeat he, nit nen, “Hat lan,” iluk ninane obatnerogon yogokhoma waga 'buk. At ekaerek akla kagalagasik nen, motok obatnerogon etaiken hinoba dogolik, “It inoba ligin,” iluk hinoba waga iti o.

¹⁸Ninagarlak ageikhe hano wene yogeisilik nukhunem, it Allah a'buri o yi ai ti ai nen, “At obabut hano,” iluk hogorariogei meke, at Titus ipisak la'isa agei iti o.

¹⁹Iti anek 'buk. It Allah a'buri nen it iti yomageisauwogoluk 'bisega meke iti, at iti ninom nen natogorlogo 'biluk wogeisa loagaluk meldegaat o. Itithogon wogeisa lagunem, ninoe Etagapogot hogorakhe dogolik, “It Paulus lak inobabut he, it aperek yomageisausak erlok werek,” iluk ekagat asigin iti.

²⁰Doalegat 'bisiliogei meke iti, nit nen natogorlogo waganik lagunem, it akhuni aperek nen ninabok weak palinogo iluk, ninetai ekerlogo motok hagakhe lago.

²¹Itithogon hagakhe dogolik, ninoe Etagapogot il oba anek ninobabut mothogon hagakhe dogouogoluk hagakhe lago dek. At he, ninoe Etagapogot inom, akhuni inom, inil oba ninobabut mothogon hagakhe dogouogoluk apekhe lago.

²²It eta inomat, ninagarlak ageikhe la'i ageiat o. At iti, yi meke ti meke hasik hibiku-yogoku akla arlekenhogon akhuni aperek yomageisugunem obabut ekagat palhorethek nen, hinoba la'i agei iti o. At nen he, “It hano hagasugun,” iluk etaiken hinoba la'isikhesikmo nogo nen, yogotak hit yomakhisagaluk akla arleken motok waga iti o.

²³Nen, at Titus iti, an nagarlak hit yomakhisauwogoluk nipisak yabu hagakhorek meke. Nen, nagarlak lak aperek at inom wageikha iti, hano hagakhunem it akhuni aperek nen inobabut palharethek nen Kristus hogorariogei meke, Allah a'buri natogorliogei meke nen inayoko 'biluk la'isa ageikhama wageikha iti o.

²⁴Allah a'buri natogorliogei meke aperek nen, “It o Korintus meke nen it Titus lak inebe eberogonat inakmu werek,” iluk igik, nen, “It Paulus lak nen it Korintus meke hano hagasugun iluk hogorinakharek etnogo eberogonat,” iluk igik, uagaluk, it iti hinakmurogon woginabino o.