Read Mid Grand Valley Dani Galatia 2 Bible Online

Galatia 2 - Mid Grand Valley Dani bible

Galatia 2

¹Itithogon isukhama, an 14 tahun welagagisik nen yabokane Barnabas nipisak nen at Titus ebe wolok, o Yerusalem lagagu.

²Itithogon lagagu iti, Allah nen, “Hat o Yerusalem at dagousagat o,” iluk yoknikhikhe iti nen dageisigisik nen, hano wene iti it akhuni itikmanke meke yogeisilik nekherek iti, “Wene ebe itithogon,” iluk thekekhogon yogeisagaluk an haganeat nen, yogotak ya nen, nobatnerogon hagakhe lagei meke iti, alomarogo hagatlasunogo iluk, it inougi meke inebe inasokneat 'bisalok yogeisasigi.

³At Titus iti ebe Yunani meke ninom lagagu mekeat he, it inougi koktek emenogo nen, “Hoado haperlagap etnogo palusak,” iluk inane obatnerogon yogokhidek.

⁴Itithogon mekeat he, it aperek nen he, ninagarlak lak Allah a'buri meke negen hagatlatluk lelokhogon limago ukitluk nen, oado aperlagap paluagaluk isukhaat. Itithogon limago ukitluk nen, nit Kristus ninom opakiat atluk ninasokneat dogolik ninobabut hagakhorek meke iti, it nen, “Erlo nikithogon nen hagatlageikhasik hagariogei,” iluk erlo herasuogoluk uki agoukha iti. Itithogon herakhukhasik inapma 'binaniluk, it hagakharek meke iti hagakhe dogoagaluk inileken 'bitnisa uki agoukha iti.

⁵Meke re, wene hano wene iti hit hinobasik hanorogo irlirli waganogo hakhisik dogouogoluk, it nen itithogon isinem, nit nen it inane hologo niniki opakiat oba ageikhe, “I o,” iluk, igidegat.

⁶It aperek inakla nen, “Inetaga koktek werek he, irat,” egarek meke iti nen wene an yogeisilik nekherek meke etnogo yabokane ninat yogeisilik nekhe dogoak nen iluk yoknikhidegat. Allah nen akhuni inoado itikmanke anek ileken hisalok nen, “Yi weak. Yi hano,” iluk ekherek dek iti nen, an it iti inobasik alebat inetaga koktek welageikha meke a? Dek meke a, iluk, wene munini ebekhe lagagi dek iti.

⁷At Allah nen, at Petrus akhuni Yahudi meke inoba erlok loagaluk ayoko 'biluk la'igik, nen an he, akhuni itikmanke meke inoba erlok loagaluk nayoko 'biluk la'anhik, hagakhikhe iti nen, it ap inetaga koktek iti inakla nen, “Petrus nen hano wene nit akhuni Yahudi meke yakulnisoagaluk ayoko 'bisikhe hak, at Paulus nen hano wene it akhuni itikmanke meke itithogon yakulisoagaluk ayoko 'bisikhemo hogo,” iluk ekagat hutdinanhukha.

⁹Itithogon hutdinanhukhasik nen, it Yakobus men, Petrus men, Yohanes men, Allah a'buri nen, “Nit ninougi it werek,” iluk egarek meke nen, “Hit nen, wene akhuni itikmanke meke yogeisilik lano. Nen, nit nen akhuni Yahudi meke inobasik yogeisilik lugun. Ninom tak-tak hagakhe dogouok,” iluk nen, Barnabas nipisak niniki hak-hak heagei watninakhukha.

¹⁰Heagei watninakhukhasik nen, ninasuk warogo negen wene men anek yoknisasukha, “Akhuni nit meke aperek inameke dek meke yoma inoba eberek dogolik, yomageisekhe dogono,” iluk, yoknisasukha iti, an nen itithogon nakla arleken akhekhe dogolik nobatnerogon hagakherek mekeat yoknisasukha.

¹¹Meke re, at Petrus o Antiokhia wageikhesik korlo hagakhe lageikhemo, an nen, “Hat hagakhe lagan iti weak o,” iluk, pakhogonat wenagakhigi.

¹²Iti men hagakhe lageikhe baga wenagakhigi. Alebat, at Yakobus nen agarumi la'isa ageikhe meke aban wageidek werek korlek, at Petrus etnogo it akhuni itikmanke meke inom hipiri dapukhogon neke lagoukha. Meke re, it wagoukhasik oba nen, at Petrus akla nen, “Nit ninoado aperlagap palek meke aperek nen nena yoknesugun,” iluk, ayuk nen, it inom hipiri nikidek thogotdiluk hekhogon dukhisikhe iti.

¹³At ane pere dogolik hekhogon dukhisikhe hak, it akhuni Yahudi meke aperek inebe tha'bokhogonat inom dukhekhe dogolik, at Barnabas etnogo akla kagalogo yabokane it inane pere meke iti lapeldiluk dukhisikheat.

¹⁴Itithogon dukhisukhama nen, an nakla nen, “Wene eberogonat, hano wene yi mekeat he, it inobabut he, hano wene yakulisekhe dogolik hagasusak meke hagariogei dek higi,” iluk, akhuni tha'bokhogonat inil oba Petrus wene men iluk yogokhigi, “Hat hebe Yahudi mekeat he, akhuni Yahudi meke hagakharek hak hagakhidek, akhuni itikmanke meke nen hagakharek hak hagakhe dogoligat, it itikmanke meke yogeisekhe dogolik, Hit hinobabut akhuni Yahudi meke hagakharek hak, inobabut waganogo hagakhe dogono, iluk obatnerogon yakulisekhe lagan iti nenaluk,” iluk pakhogon wenagakhigi.

¹⁵Nit ninebe Yahudi mekeat itaklagagu. It itikmanke weak hagakharek meke iti hakene itaklagagu 'buk.

¹⁶Meke re, akhuni wene Allah nen ninasuk wakhikhe meke etnogo mothogon hagakhunem nen, Allah nen wene inoba meke korogo wokhalok inom yabokane inapuke hunogo 'bisekherek dek. Meke re, inetaiken Yesus Kristus oba hakotdisinem anek, hunogo 'bisekherek iluk hiniluat o. Wene iti akhuni aperek nen wene Allah nen ninasuk wakhikhe wene etnogo mothogon hagakhunem, wene inoba meke korogo wokhalok, inom yabokane inapuke hunogo 'bisekherek dek. Iti nen, nit nen wene Allah nen ninasuk wakhikhe wene etnogo mothogon hagakhunem 'buk. Ninetaiken Kristus oba hakotdisinem wene ninoba meke korogo wokhalok, at ninom ninapuke hunogo 'binanoagaluk, ninetaiken Kristus Yesus oba hakotdisugu iti.

¹⁷Nit Kristus ninom hunhunem, Allah nen wene ninoba meke korogo wokhalok, ninom yabokane ninapuke hunogo 'binanoagaluk, ninobatnerogo walhekhe dogoligat, ninobabut akhuni itikmanke inobabut hagakharek hak, ninom tak-tagat welago, iluk ekagat ariogo iti nen, nit weak hagakhorek meke iti, erlo at Kristus iluk usak a? Motok dek o.

¹⁸O misaldiluk yabokane halharek hak, an nen nit akhuni Yahudi hagakhorek meke arat thogotdisasigi meke yabokane hagakhe dogolema, Allah ane thogotdiluk thagalogo hagakherek meke iluk ekagat atlep.

¹⁹Meke re, wene Allah nen ninasuk wakhikhe wene iti nen nebe warek meke hakene hagatnakhemo, an nebe niluk dogolik Allah hasik hagakhe dogeigiluk, wene iti hasik warek negen welagei. Iti Kristus ebe o baga meldiluk wakhukha iti nipisagat ninakhukha iti.

²⁰Nen, yogotak nebe niluk welagei yi, nekaerek nobatne baga welagei 'buk. At Kristus at nakla dogolik iluk welagarek o. At ebe Allah a'burat dogolik, nebe akmu nen an hasigat, “Nasuak,” iluk akla apasikhe baga ebe wakhukha iti. Nen, an netaiken at oba hakotdiluk werekma, at ebe nakla werekma, niluk welagarek iti.

²¹Allah obabut hano nen hanotninakherek wene iti an nen thagalogo here'isegerek dek. Wene Allah nen ninasuk wakhikhe wene etnogo baga, wene ninoba meke korogo wokhalok ninom ninapuke hunogo 'binanilepma re, Kristus watlageikhe iti yugunat alomarogo watlatlep o.