Read Mid Grand Valley Dani Galatia 3 Bible Online

Galatia 3 - Mid Grand Valley Dani bible

Galatia 3

¹Hit akhuni o Galatia meke hinetaiken dek hagakhe lagap etoma re! Yesus Kristus ebe o baga meldiluk wakhukha wene etnogo hinil obaat thekekhogon yakulhisasugu mekeat he, wene yabokane tha nen hinakla kagalhemo itithogon hagakhe lagap.

²Wene Allah nen ninasuk wakhikhe meke etnogo mothogon hagakhe lagagip iti baga Allah Agoreke wokhisasikhe a? At he, nit nen hano wene yakulhisasugumo holhigisip nen, “Eberogonat,” iluk hinetaiken Kristus oba hakotdisigip iti baga wokhisasikhe a. Wene opakiat itiat yoknetni ta.

³Yabu ebekeram hakhegarek hak, Allah Agoreke oba hakhasigisip mekeat he, yogotak ya hinetaiken motok dek atluk hinekaerek hinobatne baga 'bogokhogon hagatlasi lugun a? Erlok dek o.

⁴Allah nen tha'bokhogonat itithogon hagathinakhunem hagakhigip meke iti, we yugunat alomatlasusak a? Erlok dek o.

⁵Halok he, nikithogon ugun. Hit nen wene Allah nen ninasuk wakhikhe wene etnogo mothogon hagakhe lagagip oba, at Agoreke kokhogon wokhisigik, hagasusak dek meke elalinat hagathinakhik, hagariogo a? At he, nit nen hano wene yakulhisasugumo holhigisip, eberogonat iluk, hinetaiken Kristus oba hakotdisigisip iti baga wokhisiliogo a.

⁶ Wene iti hakene, at Abraham etaiken Allah oba hakotdisikhemo at Allah nen, “Hat hobabut mothogon hagakhe dogou hak, hetaiken noba hakotdegenma, wene hoba meke korogo wokhigirik hapuke nipisak hunogo 'bagagi itiat o,” iluk yogokhikhe.

⁷Iti nenat, hit hinakla nen, Abraham a'buri ebeat meke, it akhuni inetaiken Allah baga hakotdiluk welageikharek meke itiat o, iluk hutdusak.

⁸ Haganeat wene ebe itithogon aban hagatlageidek werek korlegat, it akhuni itikmanke meke inetaiken Allah oba hakotdisinem, at nen, “Wene hinoba meke korogo wokhalok ninom yabokane hinapuke hunogo 'binagagin o,” iluk, wene hano wene aban yogeisigidek dogolik, Abraham tak wene abok men iluk yogokhikhe, “Yi akhuni ti akhuni tha'bokhogonat an nen hanorinabigin iti, erlo harat o,” iluk isikhemo, holal waganogo 'bisukha.

⁹Abraham etaiken Allah oba hakotdisikhemo, at nen hanotdisikhe hak, it akhuni aperek inetaiken Allah oba hakotdegarek meke inom tak-tagat hanorinakheregat o.

¹⁰ Nen, Allah ane baga holal men waganogo 'bisukha, “Wene an nen inasuk wakhigimo holal waganek werek iti tha'bokhogonat akhuni inasuk holiluk nen, mothogon hagakharek dek halok, inebe dopok homan 'bisagein werek o,” iluk isikhemo, holal waganogo 'bisukha hak, it akhuni aperek nen wene Allah nen ninasuk wakhikhe wene etnogo mothogon hagasuogoluk, inetaiken iti baga hakotdiluk welageikharek meke, Allah nen homan 'bisagein weregat o.

¹¹ Allah nen, “Hinetaiken an noba hakotdiluk dogogun iti baga, an nen wene hinoba meke korogo wokhalok ninom yabokane hinapuke hunogo 'binagagin meke hiniluk motok dogogun o,” iluk isikhemo holal waganogo 'bisukha iti nen, wene Allah nen ninasuk wakhikhe wene iti baga nit tha'bokhogonat wene ninoba meke korogo wokhalok yabokane ninom hunogo 'binanusak degat o, iluk, ekagat ageikhe.

¹² Akhuni nen, wene Allah nen ninasuk wakhikhe wene etnogo hago welageikharek iti, erlo hasik, holal men waganek werek, “Wene iti tha'bokhogonat mothogon hagakhe dogogun halok, iti baga hiniluk dogogun o,” iluk isikhemo, holal waganogo 'bisukha iti. Meke re, inetaiken Allah baga hakotdegarek iti, ninat o.

¹³ Allah ane baga holal waganogo 'bekhe dogolik, men isukha, “Inebe o baga meldisalok inasumo, it inebe watlasugun meke iti, Allah nen homan 'bisagein werek o,” iluk, holal waganogo 'bisukha hagat, wene Allah nen ninasuk wakhikhe wene iti baga, homan 'binanusak mot werekma, at Kristus nen ninoko palogo tilninabigiluk wene nit ninoba meke korogo at oba 'bakhasikhe iti.

¹⁴At Allah nen Abraham hanotdisikhe hak, yi akhuni ti akhuni tha'bokhogonat Kristus Yesus inom hunekhunem hanorinabuagaluk, Yesus watlageikhe iti. At itithogon watlageikhesik oba nen, Allah Agoreke wokhisagein iluk abok tak yoknisasikhe etnogo, ninetaiken at oba hakotdisinem woknisekherek iti.

¹⁵Nagarlak lak nerugi. Nit akhuni hagakhorek meke ageikhe oba lisogon yokhisak. Akhuni inebe pere nen, “Itithogon hagasuok,” iluk hupuk palogo isi halok, it aperek nen munenhik, wene ninat meke ageikhe oba lapelhik, hagakharek motok dek o.

¹⁶ Wene iti hakene, at Allah nen Abraham yogokhe dogolik, “Hat itithogon wokhikhik, nen, hat nen itago meke ageikhe itithogon wogokhik, hagasigin o,” iluk abok yogokhikhe iti. Inebe doalegat inobasik u hakene, “Hat nen itago meke aperek itithogon wogeisagein,” iluk igidek. Ap ebe opakiat meke hasik, “Hat nen itago meke ageikhe itithogon wogosigin,” iluk, abok yogokhikhe iti ebe re, Kristus meke hasik isikhe.

¹⁷Wene iti men hasik igi. Allah nen, “Itithogon wokhesigin,” iluk, abok kasukhogon isikhesik, 430 tahun welageikhesik nen, wene ninasuk yabokane nen wakhikhe iti baga, wene alep meke iti munenogo degetdigidek.

¹⁸“Itithogon wokhesigin,” iluk, Abraham abok tak yogokhikhe meke iti, at nen wene Allah nen ninasuk wakhikhe wene etnogo mothogon hagakhe lageikhe baga wogotlepma, abok yogokhikhe etnogo, we oko degat wogokhikhe iluk ilep 'buk. Meke re, Allah obabut hano nen Abraham abok yogokhikhe iti nenat, ebe we oko degat wogokhikhe iti.

¹⁹Halok he, wene Allah nen ninasuk wakhikhe iti nenaluk. Iti, nit akhuni weagat hagakho welagagu meke iti 'bualasuagaluk, ninasuk yabokane wakhikhe iti. Meke re, wene iti Abraham nen itago meke ageikhe wogosigin iluk, abok yogokhikhe etnogo, ebe aban itaklageidek werek korlek elanma hasik wene ninasuk wakhikhe wene etnogo, malaikat nen Musa yogokhunem at ebe turlem heisogo dogolik, akhuni yakulisoagaluk malaikat inayoko 'biluk la'isa ageikhe iti.

²⁰Akhuni pere mikirlogo hurli warek werekma, ap ageikhe turlem heisogo dogosagat o. Itithogon mekeat he, at Allah ekaerek nen wene abok yoknisekherek iti nen, at nen wene oko dek ebalake anegat yoknisekherek iti.

²¹Halok he, wene Allah nen Abraham, “Wokhesigin,” iluk, abok yogokhikhesik nen, yabokane ninasuk wakhikhe wene iti, akhuni aperek inom agorek welageikharek iti palharek hak hagatlasigin usak a? Motok dek o. Wene ninasuk wakhikhe wene etnogo baga ninilugutninabigiluk wokniselepma re, wene iti bagaat wene ninoba meke korogo wokhalok, Allah ninom yabokane ninapuke hunogo 'binanilep iti.

²²Allah ane baga holal waganogo 'bekhe dogolik, “Akhuni hinebe tha'bokhogonat weak hagakhe lagap meke iti baga, hiniki herle warogo hakene welagap,” iluk, yoknisasikhe iti, nit ninetaiken Yesus Kristus oba hakotdumo, Allah nen abok isikhe meke etnogo nit ninetaiken at oba hakotdugun meke woknisagaluk isikhe iti.

²³Ninetaiken Kristus oba hakotdusak hakok asi lageidek werek korlek, yabokane wene iti winametdigin iti mothogon ninetaiken at oba hakotduagaluk, akhuni herle warogo hagasik welageiharek hak, wene ninasuk wakhikhe wene etnogo nen herle warogo haknisik welageikhe.

²⁴Nit ninetaiken Yesus oba hakotdisinem, wene ninoba meke korogo wokhalok, Allah ninom yabokane ninapuke hunogo 'binagaluk, Kristus aban itaklageidek werek korlek, wene ninasuk wakhikhe wene etnogo nen haknisik dogoagaluk isikhe iti.

²⁵Meke re, yogotak ninetaiken Yesus oba hakotdusak arat hakok asi ageikhesikmo etnogo nen, wene ninasuk wakhikhe wene iti nen yabokane haknisik werek dek.

²⁶Hit hinetaiken Kristus Yesus oba hakotdiluk welagap iti nen hinebe tha'bokhogonat Allah a'buri welagap iti.

²⁷Nen, Kristus hinom hunesuogoluk ima usasigip meke hinebe tha'bokhogonat, su ikhegarek hak Kristus obabut waganhigip iti.

²⁸Waganiluk, yabokane hit tha'bokhogonat, Kristus Yesus hinom hunik dogolik hinebe opakiat meke welagap iti nen, hit ebetlake Yahudi meke, ebetlake akhuni itikmanke igik, ebetlake inatuan meke, ebetlake inasokne meke igik, ebetlake humi, ebetlake ap igik, ekhe dogosak dek.

²⁹Hit hinebe Kristus meke halok he, hinebe Abraham nen itago meke welagap. Halok he, Allah nen Abraham abok yogokhikhe meke etnogo, hit wokhisausak morat o.