Read Mid Grand Valley Dani Galatia 4 Bible Online

Galatia 4 - Mid Grand Valley Dani bible

Galatia 4

¹Nagarlak lak nerugi. Wene ageikhe yi yokhisak. Inopase lak watlagunem iniki 'biluk yi meke ti meke tha'bokhogonat ina'buri iteerek mekeat, yekerugi inebe aban inarlue ageidek halok he, ap ageikhe nen ekhe dogolik, “Yekerugi inebe inarlue agunem yabokane wogeisagun,” iluk inatuaneke meke thalek it inatuaneke welageikharek hak welageikharek iti.

²Itithogon werekma, inopase lak inebe iniluk dogolik, “Iti hurli asi laga halok, wogotno,” iluk nenoane egarek oba morat asi lageidek werek korlek, iniki 'biluk emenogo it aperek nen hagasik dogolik, inebe inom hagasik welageikharek iti.

³Iti hak, nit ninetaiken aban horle ageidek werekma, mokat obabut weak meke agat oba yoma iki baga welagarek meke nen apma 'binaniluk welageikhe iti.

⁴Werekma, at Allah nen a'but ayoko 'biluk agat oba la'isusak arat asi ageikhemo, la'i ageikhemo, he agat oba meke nenat itakhikhe. Itithogon itakhikhemo, wene Allah nen ninasuk wakhikhe wene etnogo apma dogolik asuk hologo hagakhe lageikhe.

⁵Itithogon la'i ageikhe iti, nit Allah a'buri hagatlasuagaluk, wene ninasuk wakhikhe wene etnogo nen apma haknisik werekma, herle hisalninabi wisuagaluk la'i ageikhe iti.

⁶Itithogon herle hisalogo 'binanhikhemo, ninebe Allah a'buri welago iti nen, at a'but Agoreke ninetaikenma 'binani ageikhemo dogolik, at Allah hasik, nit nen, “Nopase, nopase o,” ekhe dogoagaluk ekherek iti.

⁷Halok he, it aperek inatuaneke welagagip iti hak, welagap 'buk. At Allah a'buriat agagisip welagap o. Itithogon agagisip welagap iti nen, Allah nen, “Hit an nebe na'buri agap iti nen, an na'buri wogeisagaluk 'bisigi meke hit iteerek asugun o,” iluk ekherek iti.

⁸Hit alebat nen, Allah ebe hinokodek welagagip iti nen, ninat meke ebe Allah hakene dekmaat apma welagagip iti.

⁹Meke re, an nen, “At Allah hinebe ilu welagarek,” iluk uem, “Hit yogotak nen Allah ebe hinilu agap,” iluk igi iti. Halok he, hit hinekaerek nen mokat obabut weak obatne dek meke, ikimo dek meke, iti oba yabokane suguluk hinapuke apma ukuogoluk hagakhe lagap iti, nenaluk.

¹⁰Hit nen ekhe dogolik, “Niniki iti baga itithogon hagasuok. Thut iti baga itithogon hagasuok. Mo iti baga dageikhe halok, iti baga usekhe halok, itithogon hagasuok. Tahun iti baga itithogon hagasuok,” iluk, iti meke kogotdiluk hagakhe lagap iti.

¹¹An hit hinobasik nobatnerogo mep dageik-dagokhogon hagarik nekhe lagei etnogo we yugunat hagatlasigin a, iluk nayuk ariogo nen igi.

¹²Nagarlak lak nerugi. An nebe alebat, hit hakeneat hagatlagagisik welagarek yi hak, hit meneke an hakeneat atluk nobabut waganino. Alebat hit nen ageikhe weagatnakhidegat.

¹³Ebekeram an noba u waganhigi iti nen hano wene yakulhisasigi etnogo hiniluat o.

¹⁴Yakulhisasinem an noba u hekhe lagagi iti baga hina'it neausak morat mekeat he, hina'it niigidek, kolelogo here'anhidek, malaikat Allah nen la'isu meke waganu hak he a? At he, Kristus Yesus ebe waganu hak he a, woknakhigip iti.

¹⁵Hit alebat hinobabut akilukhogon hagakhe lagagip etnogo, yogotak hinobabut nikithogon hagatlagasip welagap. Inileken hemelogo wogeisegarek dogolepma, hit hinobabut hinileken hemelogo woknetlebat iluk, hinabok pakhogonat usak welagei.

¹⁶Yogotak wene eberogonat yokhisigi iti nen, ninom wim palek meke negen neegep he a.

¹⁷It akhuni aperek ethoma hinebe wokhinabuogoluk hinakla obatnerogon kagaliogei iti, inetaiken mot dogolik hagariogei 'buk. An ninom hano welagorek meke here'aniluk lisogo wokhisik dukhiluk, it werekmake obatnerogon hagakhe dogoagaluk hinakla kagaliogei iti.

¹⁸Itithogon hagariogei iti, an nebe ninom werekma, dekma, hit hano hagakhe dogoagaluk hinakla obatnerogon kagalhe dogoumo, hano anek.

¹⁹Meke re, na'buri hinebe nakmu lak o. Humi nen ineagei itaginabuogoluk hinet wakharek hak, an nen yabokane itakhinabumo, hit hinobabut Kristus obabut hakene hagatlatlep o! iluk, hit hinobasik an noba u hinet weak wakhe lagei.

²⁰An hit hinobasik nikithogon hagasu he, nobakha palariogo iti nen, an nakla nen, yogotak ya hinoba witluk ninom dogolik wene ninat negen ageike yokhisele o, iluk, nakla apekhe lagei iti.

²¹Hit nen, “Wene Allah nen ninasuk wakhikhe wene etnogo apma ukiluk holek hagakhe dogogun,” iluk ekhe lagap meke yi, an nen wene Allah nen ninasuk wakhikhe wene etnogo baga holal waganek werek meke yokhisagein yi, hinasuk hanorogo holini o.

²²Wene holal waganogo 'bisukha iti baga men waganek werek. At Abraham nen a'buri pere itaginakhikhe iti. Ageikhe he atuaneke meke waganhikhesik itakhikhe. Nen, ageikhe age ebe meke nen itakhikhe.

²³Meke re, he atuaneke meke nen itakhikhe meke iti, akhuni nen itaginakharek hak itakhikhe iti. Nen, age ebe meke nen itakhikhe iti, Allah nen abok yogokhikhe etnogo tak-tagat itakhikhe iti.

²⁴Wene Allah nen nit akhuni ninom alep ageikhe wakhikhesik nen, yabokane wene ageikhe wakhikhe iti, humi inebe pere, Hagar men, Sara men, eta inoba lisogon yokhisak. Wene Allah nen tom Sinai etoma nen wakhikhe iti ebe re, he Hagar eagei inatuaneke meke itaginakhikhe iluk, oba lisogon igi iti.

²⁵He Hagar iti, tom Sinai akhuni Arab meke inaila welagarek meke iti hasik igi iti. At Hagar ebe inom, eagei inom, inatuaneke welagoukha iti hak, yogotak akhuni o Yerusalem meke itithogonat welageikharek iti.

²⁶Meke re, he ekaerek age ebe meke hakene, o Yerusalem pogot oba meke iti, nit ninagosaat o.

²⁷ Iti hasik, Allah ane baga wene men iluk holal waganek werek, “He agun werek meke nen eagei inebe pererlagat itaginakho korlegat, ageikhe agun nen lologo here'isikhe meke nen, eagei doalegat itaginakherek iti nen, hat hebe abirli heak itakhigidegat welagan meke iti, hakla arleken akhano. Eak itakhagaluk hinet wakhidek welagan meke iti, hakla arleken akhalok hane akilukhogon ino,” iluk isikhemo holal waganogo 'bisukha iti.

²⁸Nagarlak lak nerugi. Hit he, Allah nen Abraham abok yogokhikhe meke, ebe at Ishak itakhikhe hak, hit itakhinakhikhemo welagap o.

²⁹Meke re, at Abraham a'but ageikhe akhuni nen itaginakharek hak itakhikhe meke iti nen, a'but ageikhe Allah Agoreke baga itakhikhe meke iti oba yi aik ti aik hekhe lageikhe hak, nit yogotak itithogonat hagatninabiogei iti.

³⁰ Meke re, Allah ane holal waganek iti baga wene nena isikhe nogo. Men isikhe apigi, “He hage ebe meke eak iti nen hak hiki 'biluk ite asigin hak, at he hatuaneke meke eak iti nen, hiki 'biluk ite asigin dek o. Halok he, he hatuaneke meke iti eak ipisagat mukhogo ula'isano!” iluk yogokhikhemo holal waganogo 'bisukha.

³¹Meke re, nagarlak lak nerugi. Nit he, he atuaneke meke iti eagei welago 'buk. Dek o. Age ebe meke iti eagei welago o.