Read Mid Grand Valley Dani Galatia 5 Bible Online

Galatia 5 - Mid Grand Valley Dani bible

Galatia 5

¹Nit Kristus nen ninasokneat 'binanhikhemo yogotak ninasokneat welago. Iti nen, yi meke ti meke akin weak meke it akhuni inatuaneke meke nen o perlago wolok loagaluk inomorlo baga 'begarek hak, akin meke iti yabokane hinoba 'binogo iluk, hinobatnerogon metek dogono.

²An Paulus nekaerek nen wene eberogonat yokhisak. Hit hinekaerek nen hinoado aperlagap it aperek nen palhinabuagaluk inayoko 'bekhe lagap halok he, at Kristus nen hanothinabigin dek o. Alomarogoat hagatlakhagun iti.

³Hit aperek hinoado aperlagap palhinabuagaluk, it aperek inayoko 'bugun halok he, hinebe dopok hinasuk yabokane wasik. Itithogon palhinakho halok, wene Allah nen ninasuk wakhikhe wene etnogo here'isigidek tha'bokhogonat mothogon hagakhe dogosak o.

⁴Hit aperek nen, “Wene Allah nen ninasuk wakhikhe wene iti baga hakotdiluk, at nen, wene ninoba meke korogo wokhalok, ninom yabokane ninapuke hunogo 'binanuak,” iluk hagakhe lagap halok he, Kristus hinom hek egesip nen, at Allah obabut hano nen woknisekherek meke etnogo here'isalok dukhegep iti.

⁵Meke re, nit nen, ninetaiken Kristus oba hakotdisugusik, “Allah Agoreke nen itithogon yomaknisekhe korlek, Allah nen wene ninoba meke korogo wokhalok, at ninom yabokane ninapuke hunogo 'binanigin werek,” iluk oba eberek welago iti.

⁶Iti nen, nit Kristus Yesus ninom hunik dogolik, ninoado aperlagap palek meke dek, it aperek palek dek meke dek, ipisak tak-tak welago. Halok he, iti hasik penasusak dek. Kok he, ninetaiken Kristus oba hakotdiluk dogolik, akhuni ninakmurinakhorek iti baga ekagat ariogo.

⁷Akhuni tha ae 'busuk werek tha ae 'busuk werek pirlirli lageikharek hak, hit haganeat nen, ebe wene iti hasik hinobabut akilukhogo hagakhe lagagip mekeat he, yabokane tha nen hinakla kagalhe lagama ebe wene iti hologo mothogon hagakhidek, hinakla puk welagap nogo.

⁸Iti ninoe Etagapogot hinayoko 'bisikhe meke etnogo nen, “Inakla itithogon kagalino,” iluk ekhemo nen hinakla kagaliogei 'buk. Dek o.

⁹Roti hisuagaluk eken hikherek meke hemurlugat akla 'bisinem tha'bokhogonat hisik dukhekherek hak, wene korlo meke iti nen hinebe tha'bokhogonat weagathinabik launogo iluk igi.

¹⁰Itithogon mekeat he, ninoe Etagapogot ninom opakiat agosik hunik welago iti nen, an nakla nen, “It inobabut wene ninat meke ageikhe oba ebesugun degat,” iluk, hutdinagakhe lageiat o. Tha nen hit weagathinabigiluk hinakla kagaliogo meke iti, Allah nen ukum oba 'bigin werek o.

¹¹Nagarlak lak nerugi. An nen, inoado aperlagap palharek wene iti hano iluk yakulisekhe dogolema, noba yi aik ti aik hagatnabiogei iti hagatnakhe dogolep apegep? Motok dek o. An wene iti wene yakulisekhe dogolema, wene Kristus ebe o baga meldiluk wakhukha wene iti yakulisugunem akhuni inasuk holiluk nen, inisok helekit oba dikhogon waregarek hak, inakla puk atluk wene here'iselep degat o.

¹²Hit weagathinabuogoluk hinoado aperlagap palhinabuogoluk hinakla obatnerogon kagaliogei meke iti, hit Allah a'buri hinakla nen tekhogon motok horla dukhuak o!

¹³ Nagarlak lak nerugi. Hit hinasokneat dogoagaluk Allah nen hinayoko 'bisikhemo welagap. Itithogon mekeat, hinakla nen, “An nasokneat welagei,” iluk, akhuni inobabut inikhogat dogolik hagakharek meke inobabut waganogo yugunat hagakhe dogogup. At he, wene Allah nen ninasuk wakhikhe wene etnogo tha'bokhogonat dapukhogon wene opakiat yi anek kok hakene isikhe iti, “Hit hinekaerek hinebe hinetaiken hunik welagathep iti hak, it akhuni aperek hinom welagathep meke hinetaiken hunik dogono o,” iluk isikhemo holal waganogo 'bisukha iti nen, akhuni aperek inebe hinakmurogo dogolik hit-hit yomak-yomak hagakhe dogono o.

¹⁵Itithogon mekeat he, wam ekaerek nen wam ageikhe aik nen li'bilhik, warogo haumhogo nikik, hagakherek hak, hit-hit hinekaerek en itithogon hagakhe dogogun halok he, hinebe alomatlarik lasunogo iluk hinobabut hebelogo dogono o.

¹⁶An nakla yigithogon apigirik nen igin. Ninobabut ninikhogat dogolik hagakhorek meke iti nen, Allah Agoreke akla warlok apekherek meke iti warogo ula'igiluk hagakhik, nen, at Allah Agoreke nen, nit ninobabut iti meke warogo ula'igiluk hagakhik, hagakhe dogolik, ipisak wim palek motok hagakharek. Ipisak itithogon hagakharethek, hit nen, “Itithogon hagatlo,” iluk, hibiku-yogoku, apegethep mekeat, ebe hagakhethep dek iti. Iti nen, Allah Agoreke hinom hunik dogolik hano hagakhe dogono o. Itithogon hagakhe dogogun halok, hinobabut hinikhogat dogolik, yi warlok ti warlok nen hagakhethep meke iti, yabokane itithogon hagakhe dogogun dek o.

¹⁸Allah Agoreke nen, “Itithogon hagatno,” iluk, yakulhisugunem hagakhe dogogun halok, wene Allah nen ninasuk wakhikhe wene etnogo baga yabokane wene hinoba 'bigin dek o.

¹⁹Akhuni agat oba yoma inobabut inikhogat dogolik hagakharek meke ebe ekagat yi. Param haganirakhik, inalilo meke hagakhik, inoba agaken hagakhik,

²⁰inetaiken kaneke oba hakotdiluk dogolik hagakhik, akhuni inebe weak asuagaluk usarogo hagakhik, akhuni inom wim palek hagakhik, wene yakhik, ua palhik, inakla aga dageigik, inekaerek hasik anek kokhogon hagarigik, akhuni inebe opakiat meke inom hurli-hurli hagakhik, hek-hek hagakhik,

²¹inakla nen, it ninat meke inameke, “Warlok e,” apigik, apusu 'bit negen nalok hunu-hunu palhik, pesta weak hagakhik, hagakharek iti inom, aperek itithogon hagakharek meke tha'bokhogonat inom, hasik igi iti. It akhuni itithogon hagariogei meke, Allah apma 'bisekherekma etoma iteerek asugun motok dek o, iluk, wene iti hasik alep yokhisasigi hak, yabokane hinasuk warogo yokhisigiat iti.

²²O eken ikherek hak, Allah Agoreke akhuni inakla dogolik inobabut hagakharek ebe yi. Akhuni aperek inebe inetaiken hunik welageik, inakla arleken akhigik, inetaiken hapukhogon welageik, inobabut inobakhanini hapugutdiluk welageik, inobabut enago welageik, inobabut hano welageik, inobabut dopokhogon welageik,

²³inetaiken thebekhogon welageik, inekaerek nen inasuk warek welageik, hagakharek itiat o. Inobabut itithogon hagakhunem, wene ageikhe inoba 'begarek nogo? Motok dek o.

²⁴Ninebe Kristus Yesus agarumi meke, ninobabut ninikhogat dogolik, yi warlok ti warlok apekhe lagagu meke iti, Kristus Yesus ebe o baga meldiluk wakhukha iti baga warogo 'bisugu.

²⁵Iti halok yogotak Allah Agoreke nenat ninobabut ket meke hagarogo 'binanhikhemo niniluk dogolik, at nen yoknisekherek meke anek mothogon hagakhe dogosak o.

²⁶Itithogon hagakhe dogolik, ninekaerek nen hogorakhigidegat, nit-nit ageikhe nen ageikhe inakla weak asuagaluk hagakhidegat, nit-nit ua palogo ageikhe nen ageikhe nina'it disigidegat, hagakhe dogouok o.