Read Mid Grand Valley Dani Galatia 6 Bible Online

Galatia 6 - Mid Grand Valley Dani bible

Galatia 6

¹Nagarlak lak nerugi. At ageikhe weak hagakhunem hinileken hegep halok he, at iti apuke obabut hebelasuagaluk, hit Allah Agoreke eberogonat hinakla werek meke nen hinane erogat asuk watno. Asuk itithogon wakhunem, hit itithogonat hinoba asunogo iluk, hinekaerek hinobabut hebelogo dogono.

²Hit-hit hinoba akin meke werek halok, hinebe dopok ageikhe nen ageikhe yomak-yomak hagakhe dogono o. Itithogon hagakhe dogogun iti baga nen, wene Kristus nen ninasuk warogo yakulnisasikhe wene etnogoat mothogon hagakhe dogogun iti.

³Meke re, hat ageikhe hetaga dek dogoligat, “An kok,” iluk, hakla nen apekhe lagan halok he, hekaerek nen nukhetdakhekhe lagan iti.

⁴Hinebe dopok hinekaerek nenat, “An hano hagakhe lagei a? Weak hagakhe lagei a,” iluk, hinobabut palalok nen, “Hano hagakhe lagei,” iluk apegep halok he, erlok hogorakhausagat o. Itithogon mekeat he, nit hagakhe lago meke iti, ninekaerek ninoba dopok nenat usak iti nen, “It aperek hagariogei iti weak. Nen, an hagakhe lagei anek he, hano,” iluk usak dek o.

⁶Nen, at ageikhe nen hamo wene yakulhisugunem, hit hinasuk holhe lagap meke nen hinameke hano meke iti yomakhekhe dogono.

⁷At Allah dal-kalhogo yogosusak nogo? Motok dek o. Meke re, “Itithogon yogosusak erlogat,” iluk apagun halok, hinekaerek nen nukhetdakhagagun o. Akhuni nen yi meke ti meke ai yakharek meke, eken iti mekeat horle agunem, ebe palharek iti hak,

⁸at tha nen obabut ikhogat dogolik hagariogo halok, obabut iti bagaat alomatdakhagein iti. Meke re, at ageikhe tha nen, Allah Agoreke ipisak hunik dogolik, at meke hagariogo meke halok, Allah Agoreke iti nenat, iluk motok dogoagaluk hanotdigin iti.

⁹Halok he, ninobatne dek ageidek hano meke hagakhe dogogun halok he, yi meke ti meke ya'iluk morat asi lagunem, ebe palharek hak, yabokane ilugun oba ebe hano meke horlagun iti nen, nina'it ageidegat hagakhe dogouok o.

¹⁰Halok he, nit o yogotak hano meke hagasusak erlok welago ya baga, akhuni inebe tha'bokhogonat yomageisekhe dogoligat, kok hakene, ninagarlak lak ninerugi inetaiken Kristus oba hakokthek werek meke hanorogo yomageisekhe dogouok o.

¹¹Yogotak an nekaerek niki nenat holal kok meke waganogo hinoba la'i agei iti, hinileken ekagat 'bikhano!

¹²It akhuni aperek nen, “Hinaperlagap palini o,” iluk, inobatnerogon yokhisiliogei meke iti, it akhuni aperek nen inileken hisalok, “Hano hagariogei,” iluk apoagaluk hagariogei iti. Yesus ebe o baga meldiluk wakhukha wene etnogo yogeisugunem nen, akhuni Yahudi meke nen weagarinabunogo iluk, wene ninat meke inobatnerogon yokhisiliogei iti.

¹³It iti wene Allah nen ninasuk wakhikhe wene etnogo hanorogo holek welageidegat, inekaerek inaperlagap palekhe dogolik, “Hit itithogonat palani o,” iluk inekaerek nen hogorakhekhe dogouogoluk iliogei iti.

¹⁴Meke re, an yi meke hasik ti meke hasik hogorakhausak motok na'it o. Ninoe Etagapogot Yesus Kristus o baga meldiluk wakhukha meke etnogo hasik anek hogorakhaumo, erlok. At ebe wakhukha iti nen, akhuni agat oba inobabut inikhogat dogolik hagakharek meke iti arat obatnetdegetdisasikhe apigi. Halok he, akhuni watlatluk, yi meke ti meke hagasusak obarlikma agarek hak, akhuni inobabut inikhogat dogolik hagakharek meke etnogo obarlikmatdisasigi iti.

¹⁵Ninoado aperlagap palek halok inom, palhidek halok inom, ebe iti meke kok 'buk. At he, Allah nen ninebe ket ninat hagatninabiogo itiat kogat o.

¹⁶An wene hinasuk warogo yokhisigi meke yi, mothogon hagakhe dogogun meke, Allah nen, “An na'buri Israel mekeat o,” iluk, at nenat hinetaiken hapukhogon 'binagagik, hinebe akmuthinakhik, hagakhe dogoak o.

¹⁷Yabokane an Yesus atuaneke iluk, an noba nagalumo no'ban ekagat werek iti nen, it aperek nen an nakla murluk-marlakhogon hagatnabusak dek o. Motok na'it.

¹⁸Nagarlak lak nerugi. Ninoe Etagapogot Yesus Kristus obabut hano etnogo nen hinetaikenma dogolik eberogonat thethisik dogoak u hak, “Amin,” igi iti.