Read Mid Grand Valley Dani Efesus 1 Bible Online

Efesus 1 - Mid Grand Valley Dani bible

Efesus 1

¹Hit Allah a'buri o Efesus natogokhe lagap meke hinetaiken Kristus Yesus oba hakotdiluk hinom hunik welagap meke, nagarlak lak nerugi. An Paulus, Allah akla apasikhe baga, at Kristus Yesus nen nayoko 'biluk la'ani ageikhe meke etnogo nen wene yi holal waganogo hinoba la'i agei iti o.

²Ninopase Allah ninoe Etagapogot Yesus Kristus ipisak inobabut hano etnogo nen, hano meke wokhisigik, hinetaiken hapugutdinagagik, hagakhe dogoak o.

³Ninoe Etagapogot Yesus Kristus opase Allah itiat hogorakhe dogouok o. Nit Kristus ninom hunik werekma, at Allah nenat hano meke tha'bokhogonat ninetaiken hasik pogot oba nen woknisasikhemo welago.

⁴At Allah nenat ninebe at ekaerek hasik 'bakhalok, at il oba karelek motok dogoagaluk, pogot agat aban walhigidek dogolik, wenakninakhikhe iti ebe at Kristus oba nenat wenakninakhikhe o.

⁵At Allah ninebe akmu nen, ekaerek akla nenat, “Yesus Kristus nen, it woginakhunem an na'buri asuak,” iluk, haganeat nen ninebe wenago wokninakhikhe iti o.

⁶At obabut hano nen a'but etaiken hunik meke akmu ageidegat woknisasikhe iti hasik, nit nen, “Eiye. Allah nayuk o,” iluk, hogorakhe dogouok o.

⁷Itithogon woknisasikhemo, ebe amep ulabogo wakhukha iti baga, ninoko palogo tilninakhik, nit weak hagakhe lagagu meke degetdisigik, hagakhikhe iti o. At Allah akla kagalek dogolik ninebe hutdinanhikhesik, obabut motok hano etnogo nen, ninebe kokhogon akmutninakhikhe iti o.

⁹At ekaerek itithogon hagatninabu warlok nen, “Itithogon hagarinabigin iti ebe at Kristus nen hagarinabuak,” iluk, wene at akla apasikhe meke limago welageikhesik thelekmaat yoknisasikhe iti o.

¹⁰Wene at akla limago welageikhe iti ebe, yabokane hagatlasusak oba hagatlasi agunem, at nen yi meke ti meke pogot oba welagarek meke inom, agat oba welagarek meke inom, tha'bokhogonat dapukhogon Kristus arligat apma 'bisagein meke hasik abok yoknisasikhe itiat o.

¹¹At Allah nen, “Yigithogon hagatlasuak, tigithogon hagatlasuak,” iluk akla apekherek tak-tagat yi meke ti meke tha'bokhogonat hagakhunem hagatlagarek iti nen, “It inebe an nekaerek na'buri asuak,” iluk wenago 'binanhikhemo, iteerek agagu iti o.

¹²At ebe hogorakho motok welageikharek meke etnogo, nit nen hogorakhe dogoagaluk, ninetaiken ebekeram Kristus oba hakotdisugu meke wenago 'binanhikhemo iti o.

¹³Iti hakeneat, hit nen wene ebe wene, hanotninakherek wene etnogo hinasuk holhigisip, hinetaiken Kristus oba hakotdisigipmo, Allah nen, “Nagoreke wokhisagein,” iluk, abok yoknisasikhe tak-tagat, “It an nekaerek na'buri o,” iluk ilekerlogo Agoreke wokhisasikhe iti o.

¹⁴Allah nen he, “An nen itithogon wokhisagein, iluk abok yokhisasigi meke iti, yabokane wokhisagaluk, Nagoreke alebageik hipiri yukuk meke hakene wokhisasigisik hinebe tilogo wokhinabiginat o,” iluk yoknisasikhe. Itithogon yoknisasikhe iti nen, Allah hogorakho motok welageikharek meke itiat hogorakhe dogouok o.

¹⁵Iti nen he, hit hinetaiken ninoe Etagapogot Yesus oba hakotdiluk, Allah a'buri aperek tha'bokhogonat hinakmurogon hagakhe lagap meke iti, akhuni aperek nen hinabok isinem nasuk holhi o.

¹⁶Itithogon holhirik nen, hit hinobabut hagakhethep iti hasik, hibiku-yogokuat kamotdigidek hinetaga ilik nen Allah heagei wakho motogat welagarek o.

¹⁷Hit hinobasik he, ninoe Etagapogot Yesus Kristus opase Allah hogorakho motok welageikharek meke etnogo nen, hinakla motok kagalek meke wokhisigik, at ebe hutukhogon hutdubageik nen yakulhisigik, hagakhe dogoak nen iluk, Agoreke wokhisoagaluk ayoko 'bekhe lagei.

¹⁸At nenat hinakla liathinakhunem, hit nen he, “Ninayoko 'bisikhe meke etnogo nen yabokane hanotninabigin,” iluk, hinakla arlekenhogon oba eberek welagap meke etnogo hinilu ageik, yi meke ti meke hano meke hogorakho motok dogogun meke at a'buri woknisagaluk kokhogon hulogo 'binanhikhe meke iti, hinilu ageik,

¹⁹at obatneak meke etnogo nen, nit ninetaiken at oba hakotdisugu meke, obatnerogon kogat yomaknisiliogo meke hinilu ageik, hagasubageik iluk ayoko 'bekhe lagei o. At obatne iti baga, Kristus ebe watlageikhesikmo ilugutdiluk pogot oba lia'iluk, at alilu iki ebeke kok Etagapogot dogoagaluk meldisikhe hagat, obatnerogon yomaknisiliogo iti o.

²¹Itithogon meldisikhe iti re, it pemerintah kok meke aperek tha'bokhogonat inom, inetagapogot meke aperek tha'bokhogonat inom, inougi koktek aperek tha'bokhogonat inom, koktek it aperek inapma hagasik welageikharek meke tha'bokhogonat inom, inetagapogot yogotakne werek meke inom, yabokane dogogun meke inom, tha'bokhogonat, inetaga dek mekeat he, at Kristus anek he, Etagapogot kogat siakthek dogoagaluk, meldisikhe iti o.

²²Allah nen yi meke ti meke pogot oba agat oba welagarek meke tha'bokhogonat waganogo at Kristus arligat apma 'bisalok Allah a'buri natogokhe lago meke yi meke ti meke hasik kok he, Kristus at woknisasikhe iti.

²³Nit Allah a'buri ninebe at Kristus ebeat o. Nen, yi meke ti meke, pogot oba agat oba welagarek meke tha'bokhogonat akla Kristus ebe kerlekhogonat dogolik, nit Allah a'buri at ebe hakene werekma, ninakla kerlekhogonat welagarek iti o.