Read Mid Grand Valley Dani Efesus 2 Bible Online

Efesus 2 - Mid Grand Valley Dani bible

Efesus 2

¹Hit alebageik he, Allah ane thagalogo weak hagakhe lagagip iti nen, hinetaiken hasik hinebe warek hakene welagagip.

²Etanem he, akhuni yoma inobabut inikhogat dogolik hagakharek hagat, mutluk laga lagagip. Itithogon mutluk laga dogolik, mokat inobabut weak meke inoe kok pogot abel wemake yoma iteerek dogolik, akhuni Allah ane ina'it nen inasuk holu'buk meke inakla ukisikhesik yogotak inakla kagalhoat welagarek meke etnogo ane holek welagagip iti o.

³Alebageik nit tha'bokhogonat nen it hagariogei hakeneat hagakhe lagagu. Ninobabut akhuni inobabut inikhogat dogolik hagakharek hagat, hagakhe dogolik, ninoba agaken dageisinem weak hagakhik, ninakla apalok weak hagakhik, hagakhe lagagu. Etanem he, akhuni inobabut inikhogat dogolik hagakharek meke ninom tak-tagat werekma, Allah akla aga dageiluk, weagatninabigiluk welageikhe.

⁴Itithogon weagatninabigiluk welageikhe mekeat he, yabokane at obabut hano motok nen, kokhogonat akmutninakhikhe.

⁵Nit weak hagakhe lagagu iti baga, ninetaiken hasik ninebe warek hakene werekma, Allah nen akmutninakhikhesik, Kristus ninom hunogo 'binaniluk ninomat ninilugutdinanhikhe. Nen, hit at obabut hano nenat tilninakhikhe iti o.

⁶Ninilugutdinanhikhemo, nit Kristus Yesus ninom hunik werekma, yabokane at ninom pogot oba kok dogolik it aperek ninapma hagasik dogoagaluk ninom meldinanhikhe iti.

⁷At Allah itithogon hagakhikhe iti, o yabokane dogogun iti baga dogolik akhuni nen, “Allah obabut hano motok nen akmutninakhikhe,” iluk ekagat hutdekhe dogoagaluk tilninakhikhe iti, ebe Kristus Yesus oba nenat tilninakhikhe.

⁸Hit hinetaiken at oba hakotdisinem, at obabut hano etnogo nen tilhinakhikhemo welagap iti, erlo hinekaerek nen tilegep 'buk. Yi meke ti meke oko degat wogeisegarek hak, at Allah nenat tilhinakhikhemo welagap iti o.

⁹Hit nen, “Nit hano hagakhe lagagu baga tilninakhikhe,” iluk, hit aperek hinekaerek nen hogorakhausak motok dek o.

¹⁰At nenat hano hagarogo 'binanhikhemo welago. Iti nit Kristus ninom hunik dogolik, yi meke ti meke hanorogon hagakhe dogoagaluk, ninobabut ket ninat winametdinanhikhe iti, ebe Kristus Yesus oba nenat winametdinanhikhemo welago.

¹¹Hit alebageik he, hinebe itimanke meke welagagip iti, hinakla ebetni. It ap Yahudi meke akhuni ineram nen inoado aperlagap etnogo palinakhukha meke iti nen, hit hinobasik, “Inoado aperlagap etnogo palek dek meke,” iluk ekhe lagoukha.

¹²Etanem, Kristus ebe hinom hunik degat walegat dogolik, hinebe Allah nen wenakhinakhikhe meke dek. Ninat mekeat welagagip. Itithogon werekma, at Allah nen, wene it inom wakhe dogolik, “Itithogon hagathinabigin,” iluk abok yogeisasikhe meke etnogo, hit hinokodegat dogolik, “Hano asigin,” iluk hinakla apigidegat, Allah apma ukigidek, agat oba yoma dogolik, Allah ebe hinokodegat welagagip.

¹³Alebageik he, hinebe walegat welagagip mekeat he, yogotak, Kristus Yesus hinom hunikhigipmo, at amep ulabogo watlageikhe iti baga, horok ya 'binageikhemo welagap o.

¹⁴Akhuni Yahudi meke inom, itikmanke meke inom, inom palek werekma, tumo holak palek leget negen kok halek welageikhe meke, at Yesus nen dapulogo 'binanherek meke etnogo ebe watlaga dogolik hurli palek etnogo misalogo degetdiluk nen, ninebe opakimo dapukhogon 'binanhikhemo welago iti o.

¹⁵At Kristus nen, ninukuloak etaga Yahudi eke inom, itikmanke meke inom, pere eta welageikhe meke, at ninom hunogo opakiat 'binaniluk ninukuloak etaga opakiat ket meke dapulogo 'binanigiluk wene Allah nen ninasuk warogo, “Yigithogon hagasusak, tigithogon hagasusak,” iluk yoknisasikhemo wene palek werek meke iti degetdisekhe dogolik, ninom hunogo 'binanhikhe iti o.

¹⁶At Kristus ebe o baga meldiluk wakhukhama watlaga dogolik, Allah ninom weak wim palek negen welagagu meke iti, degetdisalok, ninebe ebelake meke, ebelake meke inom, opakiat dapukhogon 'binaniluk, Allah oba woknisik wageikhe iti o.

¹⁷At Yesus nen itithogon woknisik wageikhemo, ebelake meke, ebelake meke ninom, at Allah Agoreke opakiat iti baga ninopase Allah oba ukusak erlogat hagatlageikhe, iluk, Yesus ebe alebageik wageikhesik, “Hinom dapukhogon 'binagagi o,” iluk, wene hano wene hit itikmanke meke walegat werekma yokhisigik, nit akhuni Yahudi meke horogat werekma yoknisigik, i wageikhe iti o.

¹⁹Itithogon wageikhe iti baga, hit hinebe itikmanke ninat meke, ap huso meke hakene welagagip etnogo, yogotak itithogon dek ageikhemo, hinebe Allah a'buri agagisip, it hinom, at Allah aila etoma hinaieregat agagisip welagap o.

²⁰At Kristus Yesus ebe o herlaga kok hakene la'iluk werekma, it ap at nen inayoko 'biluk la'isasikhe meke emenogo inom, it ap Allah ane yogeisiliogei meke emenogo inom nen, oba dukhogon halhe lagoukhama, hit hinebe nit nen oba dukhogon halogo 'binagasugumo welagap o.

²¹Nit tha'bokhogonat ninebe tomok, at Yesus ninom hunogo 'binaniluk nen, o thep hun-hun halharek hak, o iti abisakeat ninopase Allah ekaerek hasik ai halogo 'binaniogo iti o.

²²Iti hakene, hit Kristus hinom hunik werekma, it aperek hinom o opakiat Allah ai halekma Agoreke dogoagaluk, halogo 'binagaliogo iti o.