Read Mid Grand Valley Dani Efesus 4 Bible Online

Efesus 4 - Mid Grand Valley Dani bible

Efesus 4

¹An ninoe Etagapogot hasik niki herle warogo 'banhama dogolik, hit wene ageikhe hinasuk wasik. Nagarlak lak nerugi. Hit hinobabut he, at Allah nen hinayoko 'bisikhe tak-tagat hagakhe dogono o.

²Hit-hit nakmu-hakmurogon yomageisigik, hibiku-yogoku hinetaiken thebekhogon hagakhik, hinobabut enago welageik, hinobakhanini hapugutdiluk welageik, hagakhe dogono o.

³Allah Agoreke nen ninebe opakiat meke hunogo 'binanhemo dogolik, inebe hano dapukhogon welageikharek iti meke kogotdekhe dogono o.

⁴Allah nen hinayoko 'bekhe dogolik, “An nen hanothinabigin o,” iluk, abok opakiat meke yokhisasikhe hak, at ebe opakiat meke hinom hunikhik, Agoreke opakiat meke waganhik, hagakhigip iti o.

⁵Ninoe Etagapogot ebe opakiat o. Ninetaiken at oba hakotdogorek meke iti opakiat. Ninebe ima usa'inanharek meke opakiat.

⁶Ninebe tha'bokhogonat ninopase Allah opakiat. At arligat ebe kok Etagapogot upu yaat welagarek. Nit tha'bokhogonat nen yi meke ti meke hagakhorek iti, ebe at nenat hagakherek o. Hagakhe dogolik, ebe nit tha'bokhogonat ninakla welagarek iti o.

⁷Meke re, at Kristus nen suputnisekherek tak-tagat, Allah obabut hano nen, yabu asokhotegat hagakhe dogoagaluk ninobabut dopok woknisasikhe.

⁸ Iti nenat, Allah nen men iluk isikhe, “At ebe pogot oba upu walek eloma dageigiluk, at athilimeke iniki herle warogo 'bisalok wogosik dageisikhesik nen, hano meke ageikhe akhuni oko dek supusogo usa'isa ageikhe,” iluk isikhemo holal waganogo 'bisukha iti o.

⁹“At ebe dageisikhe,” iluk isikhe iti ebe re, at ebe agat wema baga usasikhesik nen dageisikhe, iluk u hak isikhe iti o.

¹⁰At ebe agat oba inom, pogot oba inom, yi ai ti ai tha'bokhogonat inom, dogeigiluk he, agat oba usa'ageikhesik nen, yabokane apuke pogot oba upu walek eloma dageisikhe iti o.

¹¹Nen, supusogo usa'isa ageikhe iti ebe, nit Allah a'buri ninebe tha'bokhogonat Kristus ebe hakene werekma, o halharek hak halogo 'binanhunem, ninebe tha'bokhogonat Allah hasik hagakhe dogoagaluk, ninebe tomok ninayoko 'biluk meldinanik lageikhe iti o. It aperek Allah ane wolok loagaluk inayoko 'bigik, it aperek Allah ane yogeisekhe dogoagaluk inayoko 'bigik, it aperek hano wene akhuni itikmanke hasik yogeisilik loagaluk inayoko 'bigik, it aperek Allah a'buri therisik dogolik wene yakulisekhe dogoagaluk inayoko 'bigik, ninebe tomogat itithogon ninayoko 'bisikhe iti o.

¹³Itithogon hagakhe dogoluk, ninetaiken at oba hakotdiluk dogolik nen, ninebe opakiat meke hakene hagatlageik, Allah a'but iti ebe hutukhogon ninilu ageik, at Kristus yi meke ti meke hasik etaiken bogokhogon horle motok welagarek hak, nit ninetaiken itithogonat horle ageik, hagasugun iti o.

¹⁴Itithogon hagakhe dogolik, ninobabut yekerugi inobabut hisakne nen i hoklabu sabulogo lageik-wageik hagakherek iti hagat, nit itithogon hagakhe dogoak nen iluk, it akhuni aperek inobabut mirlok-marlokthek meke nen inekalat mekeat he, eberogonat thalek nukhetdinanuogoluk, wene ninat wene eran-alep yoknisariogei iti inane holusak dek o.

¹⁵Meke re, ninobabut inarluetek inobabut hakeneat waganhe dogosak. Akhuni inebe ninakmurogo dogolik, wene eberogonat anek igik, yi meke ti meke hasik hagakhe dogolik, ninululoak ebe Kristus etaiken 'bogokhogon horle dogolik hagakhe lageikhe hak hagakhik, hagakhe dogolik, at obabut waganhe dogosak o.

¹⁶Ninebe niniki ninisok ninoba hunik welagarek meke aperek tha'bokhogonat ninomaken oba hunik hano dogolik, asokhotek tomok hagasusak meke hagakhunem, ninebe hano welagorek iti hak, nit ninoe Etagapogot Kristus ebe baga ninom hunik dogolik, ninobabut tomok hagakhe dogosak meke mothogon hagakhe dogogun halok, akhuni inarlue aga dogolik inetaiken horle agarek hak, akhuni aperek inebe ninakmurogon hagakhe dogolik, ninebe Kristus ebe hakene ninobatne atluk dogogun iti.

¹⁷An ninoe Etagapogot nipisak hunik dogolik at nen yokhisau hak wene yi hinasuk warogo yokhisak. It akhuni itikmanke meke inobabut hagariogei iti hak, hit hinobabut itithogon hagakhe dogogup o. It iti, we yugunat alomarogo meke oba ebekhe dogolik,

¹⁸inakla mumat werek. Inetaiken helekit hakene abisake nen, hano wene inokodegat dogolik, Allah akhuni inilugurinakherek meke etnogo inom hunik dek nekalogat meke welageikharek iti o.

¹⁹It inobabut he, “Weak hagakhe lago,” iluk, inayukhogon welageikharek dek. It nen ekhe dogolik, “Nit he, weak hagarekhe dogogun o” iluk, yi weak ti weak inekarli degat warlokhogon hagariliogei iti o.

²⁰Mekeat he, at Kristus nen, “Hit weak itithogon hagakhe dogono,” iluk, yakulhisigidek o.

²¹Hit at abok holhigisip hinom hunik dogolik, ebe wene Yesus hagakhikhe wene iti, yakulhisasukhama waganhigip apigi.

²²Alebageik he, hinakla yi warlok ti warlok apekhe lagagip iti nen nukhetdinageisinem, hinebe alomatlarik lagagip iti nen he, hinobabut alep meke iti su nokorlogo here'isegarek hak, here'isano o.

²³Iti here'isalok, hinetaiken inom, hinakla ebekhe lagap meke iti inom, Allah nen hinobabut ket meke hagathinakhe dogoak o.

²⁴Hinebe eberogonat, at Allah nen ekaerek hasik 'bakhalok, at nen, hinobabut mothogon hagakhe dogoagaluk, at obabut hakene ket meke hagathinakhe meke iti, su ket ikhegarek hagat ikhekhe dogono o.

²⁵Nit tha'bokhogonat ninebe at Kristus iki isok hakene ninom hunik welago iti nen, inekalat egarek meke iti here'isalok, hinagarlak lak hinerugi hinom hinane eberogonat meke anek ekhe dogono o.

²⁶ Hinakla aga dageikhe halok, weak hagakhup. Hinakla aga apik werekma, Iblis nen hinakla kagalinogo iluk, o mulikin korokhogon ukigidek werek korlek, thagalogo hanoratno o.

²⁸Hit aperek nen hiniki abusak waganhe lagap meke halok, yabokane itithogon waganhidek dogolik, it inerlageik meke yomageisekhe dogouogoluk, hinekaerek nen yabu hano meke anek hiniki obatnerogon waganhe dogono o.

²⁹Wenekak uogoluk halok he, weak meke ekhe dogogup o. Wene hano meke isinem it aperek inetaiken aban meke inasuk holugun meke iti Allah nen hanorinakhunem, inetaiken horle asuagaluk, wene hano meke anek ekhe dogono o.

³⁰Allah nen yabokane hinebe hanothinabigiluk ilekerlogo, at Agoreke wokhisasikhemo hinakla werek iti, akla korlotdugup o.

³¹Inane puk weak igik, inakla aga hetperigik, inakla aga dageigik, wene oko-oko yakhik, inekalat inabok weak palhik, egarek meke iti here'isekhe dogolik, weagarinakharek meke inom tha'bokhogonat here'isekhe dogono o.

³²Here'isalok nen, hit-hit hinobabut enago hinakmurogo hagarinakhe dogolik, hit weak hagakhe lagagip meke at Kristus nen thagalogo degetdisikhe meke, Allah nen degetdisasikhe iti hagat, hinagarlak lak hinerugi aperek nen weagathinakho halok he, wene iti degetdisekhe dogono o.