Read Mid Grand Valley Dani Efesus 5 Bible Online

Efesus 5 - Mid Grand Valley Dani bible

Efesus 5

¹Hinebe Allah a'buri at akmu meke welagap iti nen, at obabut waganino.

²Akhuni nen yi meke ti meke Allah hasik 'bisalok, ebe warogo hetu hunekhunem, Allah akla hanorogo obasi hano meke liagakhe lagoukha iti hak, at Kristus nit ninebe akmutninakhikhesik nen, “It inobasik an nebe nasuak o,” iluk apasikhe baga ebe wakhukha iti baga Allah akla hano ageikhe iti hak, nit-nit nakmu-hakmurogo hagakhe dogouok o.

³Hinebe Allah a'buri dogolik hinobabut hagakhe dogosak mekeat hagakhe dogosak. Halok he, param ha'isigik, inekarli dek weak hagakhik, “Yi meke ti meke an anek woknetlep,” iluk inakla nen apigik, hagakharek iti meke, akhuni aperek nen, “It aperek itithogon weak hagariogei,” iluk hinabok weak thakhogon asunogo iluk, weak ageikhe hagakhup o.

⁴Param ha'isegarek meke abok igik, wene inetaiken dek egarek meke igik, inekarlimo meke hasik asagun abok igik, usak dek meke iti igidegat he, Allah at heagei wakhe dogono o.

⁵It akhuni param ha'isegarek meke inom, inekarli dek weak hagakharek meke inom, “Yi meke ti meke an meke anek dogolep e,” iluk inakla nen apalok hagakharek iti, inetaiken kaneke oba hakotdiluk dogolik hagakharek hagat, hagakharek halok, Kristus Allah ipisak inapma 'bisugunem, welageikharekma etoma iteerek asugun motok dek o, iluk hanorogon hinakla apano.

⁶It akhuni Allah ane mothogon hagasu'buk meke nen, wene igi itithogon hagakharekma, Allah akla aga dageiluk weagarinabigin iti nen, it aperek nen inane we yugunat ekhe dogolik, “Weak meke itithogon hagasumo hanoat,” iluk nukhetdinagunogo.

⁷Halok he, hit it iti hinom dapukhogon iti meke hagakhe dogosak dek o.

⁸Hit alebageik he, o mummo welagagip meke re, yogotak ninoe Etagapogot hinom hundiluk, o lia baga welagap iti nen, hinobabut o lia baga dogolik hagakhe dogosak mekeat mothogon hagakhe dogono o.

⁹O erlo hano meke nen eken hano mekeat ikherek hak, akhuni o lia baga dogolik yi meke ti meke hanorogo mothogonat inetaiken oba nen eberogonat hagakharek iti o.

¹⁰Hinakla nen, “Ninobabut nikithogon hagakhe dogogun oba ninoe Etagapogot akla hotok igin,” iluk, hinakla hutdiluk, hinobabut iti mekeat yakulino o.

¹¹It o mummo dogolik, hanorinabigin dek meke weak hagariogei meke iti, hinom dapukhogon hagakhe dogosak dek. At he, itithogon hagakhunem 'bualogo wenageisekhe dogono.

¹²It akhuni aperek limago hagariogei meke iti inabok ekhe dogou re, inekarli asusak iti nen, inabok ekhe dogosak dek o.

¹³Yi meke ti meke 'bualogo o lia baga 'bisinem, ekagat agarek iti o.

¹⁴Itithogon lia baga 'bisinem ekagat atluk, lia agarek iti nen he, men egarek iti, “Hat noge ekhe lagan iti, hebe hiluk asin o. Nen, warek hakene welagan iti, hiluk asin o. At Kristus nen liathabigin o,” iluk egarek iti o.

¹⁵Iti nenat, hinobabut hebelogo hagakhe dogono o! Akhuni inetaiken abit meke nen hagakharek hak hagakhidek, inetaiken kagalek meke nen hagakharek hak, hagakhe dogono o.

¹⁶Yogotak ya akhuni inebe doalekmake inobabut weak hagariogei iti nen, hit hinobabut we yugunat alomarogo hagakhe dogunogo iluk, ebekena hano asuak nen iluk hinobabut hano meke itiat hagakhe dogono o.

¹⁷Hinetaiken abit dogosak dek o. At ninoe Etagapogot akla warlok apekherek meke itiat erlo hera'iluk mothogon hagakhe dogono.

¹⁸Anggur eken apusu kokhogon nasinem iti nen hinebe hunu-hunu atluk weagathinabunogo nen, neke dogogup o. At he, Allah Agoreke itiat hinakla kerlekhogon waganino.

¹⁹Hit-hit wenekak ekhe dogolik, etai Mazmur meke igik, etai Allah meke igik, etai Allah hogorakharek meke igik, wakharek meke itiat waganiluk ekhe dogono. Hinetaiken oba nen etai isa igik, ekaka igik, wakhe dogolik, ninoe Etagapogot ebe hogorakhe dogono.

²⁰Hibiku-yogokuat yi meke ti meke tha'bokhogonat hasik, ninoe Etagapogot Yesus Kristus etaga palogo, ninopase Allah heagei wakhe dogono o.

²¹Allah itithogon heagei wakhe dogolik, Kristus alon halhe dogolik, hit-hit ageikhe nenat ageikhe apma dogolik inane hologo hagakhe dogono.

²²Nit Allah a'buri ninebe Kristus ebe hakene werekma, at nen tilninakhikhesik, ebe ninoe kok welagarek hak, humi inougi koktek, inaguniat iti nen, hit humi ninoe Etagopogot apma dogolik ane hologo hagakhethep hagat, hinaguni tomok inapma dogolik, inane hologo hagakhe dogono o.

²⁴Nen, nit Allah a'buri Kristus apma dogolik ane hologo hagakhorek hak, hit humi, yi meke ti meke hasik tha'bokhogonat hagasuogoluk, hinaguniat inapma dogolik inane hologo hagakhe dogono o.

²⁵At Kristus nen nit Allah 'aburi ninebe akmutninakhikhesik nen, “It inobasik nasuak,” iluk apasikhe baga ebe wakhukhama watlageikhe hak, hit ap he, hinagugi itithogonat hinakmurogon hagakhe dogono o.

²⁶At Kristus nen itithogon hagakhikhe iti, nit Allah a'buri tha'bokhogonat ninebe ninoba nino'ban dek, ninoado hurarlo dek, hano dogou hak, at il oba ukum ninoba dek, hano motok karelek dogoagaluk, ninebe ima usa'inanhunem, at ane etnogo baga, thobalogo 'binaniluk, at ekaerek hasik bakhagaluk ebe watlageikhe iti o.

²⁸Iti hak, hit ap nen he, hinekaerek hinebe hinakmu welagathep iti hak, hinagugi tomok inebe, “An nekaerek nebe hakeneat,” iluk, hinakmurogon dogono. Ap he, inagugi inakmurogon welageikharek meke iti, inekaerek inebeat inakmurogon welageikharek o.

²⁹Akhuni aperek nen inekaerek inebe ina'it aperek welageikharek nogo a? Dek o. Ninekaerek ninapiri hano meke nikik, ninebe aleligik, hagakhorek hak, at Kristus nen, “Allah a'buri an nekaerek nebe meke niki nisok hakene,” iluk itithogon alelogo haknisik welagarek.

³¹ Iti hasik, Allah ane men isikhe, “Iti nen he, ap nen agosa opase here'isalok, age inom dapulik dogolik nen, inebe pere meke, opakiat hagatlatluk dogoak o,” iluk, isikhemo holal waganogo 'bisukha iti o.

³²Wene isikhe iti akla limago wene kok meke ageikhe werek. Wene iti an nakla nen he, at Kristus nit Allah a'buri ninom hano dapulik dogosak meke hasik isikhe apigi.

³³Meke re, hit hinebe hasik inomat isikhe. Hit ap he, hinekaerek hinebe hinakmurogo welagathep hak, hinagugi tomok hinakmurogon welageik, hit humi hinaguni tomok inalonerinakhik, hagakhe dogono o.