Read Mid Grand Valley Dani Kolose 1 Bible Online

Kolose 1 - Mid Grand Valley Dani bible

Kolose 1

¹Hit Allah a'buri o Kolose natogokhethep meke Kristus hinom hunik dogolik, at hasik hinobabut hupukhogon hagakhe lagap meke, nagarlak lak nerugi. An Paulus Allah akla apasikhe baga, Kristus Yesus nen nayoko 'biluk la'ani ageikhemo wagagi eke etnogo, ninagot Timotius nipisak nen wene yi holal waganogo hinoba la'i ago iti o. Ninopase Allah obabut hano etnogo nen, hano meke wokhisigik, hinetaiken hapugutdinagagik, hagakhe dogoak o.

³It aperek nen hit yogeisekhe dogolik, “Hit meke hano meke Allah nen wokhisagein meke pogot oba 'binageikhemo werek o,” iluk yokhisasukhama, hinetaiken Kristus Yesus oba hakotdiluk, hagakhunem, it aperek nen, “It inetaiken Kristus oba hakotdiluk Allah a'buri aperek tha'bokhogonat inakmurogon hagariogei,” iluk, hinabok isinem ninasuk holhosik nen, hibiku-yogokuat sembayan hit hinobasik ekhe dogolik, ninoe Etagapogot Yesus Kristus opase Allah itiat heagei wakhe lago o. Hit wene hano wene, Allah obabut hano nen hagarinakherek wene etnogo ebekeram yokhisa agoukhama, hinasuk holhigisip nen, eberogonat iluk hutdisigip iti hurli, Allah nen hanothinabiogo hak, hano wene iti o yi ai ti ai wialarik laga dogolik, Allah nen akhuni itithogonat hano hagarinabiogoat.

⁷Hano wene iti, at Epafras ninagarlak ninakmu meke nen yakulhisugunem yakulhigip iti o. At ebe Allah atuaneke nit ninom tak-tagat dogolik, Kristus nen ayoko 'biluk la'i ageikhemo, nit nen yokhisau hak ninobolukmo obabut hupukhogon yokhisiliogo iti.

⁸At ebe ninoba wagasik nen, men isikhe, “It inobabut, akhuni aperek inakmurinakharek iti meke, Allah Agoreke nen wogeisugunem, akhuni aperek inakmurogo hagariogei o,” iluk, hinabok hutukhogon yoknisa aga iti o.

⁹Hinabok itithogon isinem ninasuk holhosik, nit nen hit hinobasik sembayan igik, Allah ayoko 'bigik, thogotdigidek isi motogat welago. Itithogon isinem Allah Agoreke nen hinakla kagalhunem, hinakla motok kagalogo wene hutdiluk nen, at Allah akla warlok apekherek meke iti hit nen, hutukhogon hinilurogon dogobageik iluk ayoko 'bekhe lagoat o.

¹⁰Itithogon hinilu atluk nen, ninoe Etagapogot akla hanorogo, at warlok apekherek meke mothogon anek hagakhe dogosagat. Yi meke ti meke ai yakhunem erlo kok atluk nen eken hano ikherek hak, hit Allah obabut hinilu aga dogolik, yi meke ti meke hano meke hagakhe dogosak iti.

¹¹Ninopase Allah obatneak hogorakharek meke etnogo hinobatnethinakhunem, hit hinobatnerogo motok dogobageik iluk ayoko 'bekhe lageiat. Itithogon hinobatnethinakhunem, yi meke ti meke akin hinoba aga korlek, hinakla puk ageidek, hinobakhanini hapugutdiluk dogolik, hinakla arleken akhigik,

¹²ninopase Allah heagei wakhik, hagakhe dogosak iti. At ninopase nen, at a'buri aperek hinomat lia baga hinaierek erlok dogoagaluk hagathinakhikhemo welagap iti nen, arat heagei wakhe dogosak iti.

¹³Nit alep o mummo weak meke nen apma herle warogo haknisik werekma, Allah nen herle hisalogo wokninakhikhesik nen, a'but etaiken hunik meke etnogo haknisik dogoagaluk apma 'binanhemo welago.

¹⁴Allah nen herle hisalogo tilninakhikhe iti, ebe re, at a'but nenat herle hisalogo tilninakhikhesik, yi weak ti weak hagakhe lagagu meke iti, arat horogo degetdisasikhe.

¹⁵Allah ebe ninileken hogorek dek mekeat, ebe alino hakene, Yesus ebe itiat o. At Allah nen, yi meke ti meke, pogot oba meke inom, agat oba meke inom, ninileken hogorek meke inom, hogorek dek meke inom, winametdisasikhe iti. Ninileken hogorek dek meke ageikhe, malaikat inobatneak dogolik inapma hagasik werekma inane hologo welageikharek meke itiat. Allah nen itithogon tha'bokhogonat winametdisasikhe iti, ebe re, at Kristus nenat, ekaerek hasigat winametdisasikhe iti nen, yi meke ti meke tha'bokhogonat iti, yoarlemake negen werek korlek, kok he, Allah a'but makusa meke Kristus itiat.

¹⁷At ebe yi meke ti meke aban walhigidek werek korlek welageikhesik nen, yogotak yi meke ti meke obolukmo tomok werek iti, at nenat herogo werekma hano werek o.

¹⁸Nit Allah a'buri ninoe kok at Kristus dogolik, ninebe ninilugutninakherek iti nen, at ebe iki isok negen welagorek. Yi meke ti meke yoarlemake negen werek korlek, at Allah nen, “Kok he, an na'but makusa mekeat dogoak,” iluk, at ebe watlageikhesikmo nen, ilugutdisikhe iti.

¹⁹At Allah nen, “An nakla warlok nen, an nobabut nikhok motok welagarek iti hak, an na'but itithogonat nipisak tak-tak motogat dogoak o,” iluk, akla apasikhe tak-tagat welagarek o.

²⁰Yi meke ti meke agat oba meke inom, pogot oba meke inom, tha'bokhogonat Allah inom weak agoukhasik, wim palek hakene werekma, at Allah ekaerek inom dapulogo 'bisasikhe iti ebe, Yesus o baga meldiluk wakhukhama amep ulabogo watlageikhe iti baga dapulogo 'bisasikhe iti o.

²¹Alebageik, hit hinakla weak wene ebekhe dogolik, hinobabut weak hagakhe lagagip iti baga, Allah hinom hekhogon dogolik wim palek negen welagagip.

²²Itithogon mekeat he, hit hinebe at Allah ekaerek hasik 'bakhalok, at il oba wene hinoba dekhogon hano karelek dogoagaluk, a'but ebe watlageikhe iti baga, ekaerek hinom dapulogo 'binageisikhemo welagap iti o.

²³Halok he, hano wene hinasuk holhigisip hinakla nen, “Yabokane hano asigin,” iluk, apasigip meke iti, hinetaiken aborlok iluk kolelogo here'igidek hinobatnerogonat hago dogono. Hano wene iti, at nen yi ai ti ai akhuni inebe tha'bokhogonat yogeisasikhe wene iti yogeisilik nekhe dogoagaluk, an Paulus nayoko 'bisikhe iti.

²⁴An yogotak ya, at Kristus nen, “Allah a'buri tha'bokhogonat an nebeat o,” iluk nit ninobasik yi aik ti aik hekhe lageikhesik watlageikhe iti, ageikhe higidek meke obolukmo, an nebe hit hinobasik yi aik ti aik hagatnabiogei iti nen nakla arleken akhekhe lagei.

²⁵An he, Allah nen, hit hinobasik, at a'buri meke tha'bokhogonat inatuaneke dogoagaluk nayoko 'bisikhemo, wene Allah nen isikhe wene iti tha'bokhogonat yogeisilik nekhe dogosak mekeat, yogeisilik nekhe lagei iti o.

²⁶Wene iti, o muk haganeat erloma nen yi tahun ti tahun hagatlaga dogolik, akhuni itaklarik waga korlek, Allah nen akhuni yogeisigidek inilomasirogon at akla limago welageikhe. Meke re, yogotak nit at a'buri meke halok, thelekma pakhogon yoknisasikhe iti o.

²⁷At Allah akla nen he, it akhuni itikmanke meke tha'bokhogonat hano motok hagarinabigin wene iti kokhogon hogorasusak mekeat apasikhesik nen akla limago welageikhe meke, at a'buri halok thelekma pakhogon yogeisagaluk isikhe. Wene iti ebe re, Kristus hit hinakla werek halok, yabokane hanothinakhunem, hogothinabugun itiat o.

²⁸Iti nen, nit nen he, wene Kristus abok iti pakhogon akhuni tha'bokhogonat inebe dopok yogeisilik laga lago. Itithogon yogeisekhe lago iti baga, inebe dopok Kristus inom hunik dogolik, inetaiken horle atlukmo, Allah oba wogosik wisuogoluk, ninakla kagalek motok dogolik, inasuk wakhik, wene yakulisigik, hagarik laga lago iti o.

²⁹An wene iti hasik bogokhogon hagasigiluk, at Kristus obatne etnogo an nakla dogolik nobatnetnakho korlek, nobatnerogonat hagakho motok welagei iti o.