Read Mid Grand Valley Dani Kolose 2 Bible Online

Kolose 2 - Mid Grand Valley Dani bible

Kolose 2

¹An nen he, hit men, it akhuni o Laodikia meke men, it aperek doalegat men, an nebe hinokodek meke hasik nobatnerogon hagakhe lagei meke iti, hit hinilurogon dogosak, iluk yokhisigi iti o.

²Hit hinetaiken ago warek dogolik, hit-hit hinom hunik nakmu-hakmurogon dogobageik iluk itithogon hagakhe lagei o. Hit itithogon dogolik he, “Wene iti eberogonat,” iluk, hutdiluk nen, wene munini hinakla ebekhidek motok 'bogokhogon dogolik, wene Allah akla limago welageikhe wene iti hutukhogon hinilu asugun o. Wene iti, Kristus ebeat o.

³Allah akla kagalek dogolik, yi wene ti wene motok ilu iti, at akla limago welageikhe mekeat he, Kristus arligat nen pakhogon yoknisekherek.

⁴It aperek inekalat mekeat he, inane hano eberogonat thalek nukhetdinaginogo iluk yokhisigi iti o.

⁵An nebe walegat welagei mekeat he, netaiken hit hinoba la'i agarik, ninom etoma welago hakene. Dogolik, hinetaiken Kristus oba hakotdiluk hinetaiken opakiat hinobatnerogon mothogon hagakhunem nileken hisekhe lageiatma, nakla arleken akhekhe lagei o.

⁶Hit nen he, “Kristus Yesus ninoe Etagapogot o,” iluk ebe horlasigip iti nen, hinom hunik motok dogono o. Itithogon dogolik, hinobabut wene yakulhisasukha tak-tagat,

⁷hinomaken Yesus oba a'bethogon ya'iluk, hinetaiken at oba 'bogokhogon hakotdiluk, hinom hunik dogolik nen, hinetaiken horle ago motok dogolik, Allah heagei wakho motok dogono o.

⁸Itithogon isi werekma, akhuni aperek inakla kagalek meke thalek, wene we meke inekalat yokhisekhe dogolik, nukhetdinaginogo iluk, hinobabut hebelogo dogono. Wene iti, Kristus nen isikhe meke tak-tak iliogei 'buk. Weat, akhuni itaklarik waga korlek, inopa lak nen, “O yoma yi meke ti meke herlaga, mokat inobabut weak meke itiat o,” iluk ekhe lagoukha meke tak-tagat nukhetdinagaliogei iti.

⁹Meke re, Allah ebe abisake motogat Kristus akla werekma akhuniat itaklasi ageikhesik welageikhe iti.

¹⁰Malaikat pogot oba meke inom, mokat obabut weak meke inom, inapma hagasik werekma inane holharek meke, at Kristus kok arligat ane holusak iti nen, hit meneke, at hinom hunik dogolik, hinetaiken 'bogokhogon horle agasip welagap iti.

¹¹Hit, at hinom itithogon hunik welagap iti nen, akhuni iniki nen inoado aperlagap palinakharek hak palhinakhukhama palek welagap 'buk. Dek o. At Kristus nenat hinobabut hinikhogat dogolik weak hagakhe lagagip meke iti palogo la'isasikhemo, hinoado etnogo palek dogou hak welagap iti.

¹²At Kristus watlageikhemo ebe warek thaldisukha hak, hit ima usa'inagekhe dogolik, hinom hunigat thaldinageisukha o. Nen, at hinom hunik warek werekma, Allah obatne baga ilugutdisikhe, iluk hinetaiken at obatne baga hakotdisigip iti nen, ima nen 'buakhogon lia'inageisinem, at hinom hunigat hiniluguthinakhikhe o.

¹³Hit alebageik nen, hinoado itikmanke hasik hinoado aperlagap etnogo palek dek, weak hagako motok dogolik, hinebe warek hakene werekma, at Allah nen nit weak hagakhe lagagu meke thagalogo degetdisalok nen, Kristus hinom hunigat werekma hiniluguthinakhikhe iti o.

¹⁴Wene at Allah nen ninasuk wakhikhe wene etnogo, nit nen here'isalok weak hagakho motok welagagu meke iti, holal negen waganek wene kok ninoba werekma, Yesus ebe o baga meldiluk wakhe dogolik, nit wene ninoba welageikhe meke iti inom pisuemaken oba warogo 'bisukha iti baga, Allah nen wene iti arat degetdisikhe iti o.

¹⁵At Kristus ebe o iti baga watlaga dogolik, Iblis agarumi koktek inobatne werek meke inom erlok degetdisalok, akhuni nen thili meke inom wim yakhe dogolik inobatne atluk, inebe iniluk herle warogo akhuni inil oba wogosik wageikherek hak, at Kristus nen thelekma inekarli wakhikhe iti.

¹⁶Iti nenat,it akhuni aperek nen, “Hipiri, i, iti meke nausak meke. Nen iti meke nausak dek meke,” igik, “Mulikin iti baga usekhe halok, iti baga dageikhe halok, itithogon hagasusak meke,” igik, “Thut holelhe halok, itithogon hagasusak meke,” igik, “Iniki ageikhe Allah hasik werlegat dogolik, itithogon hagasusak meke,” igik, isi korlek, hit yugunat hagakhunem, wene iti meke hasik, wene hinoba 'busak dek o.

¹⁷Akhuni inebe aban waga korlek inamukhak tak inelokhoma wagarek hak, Kristus ebe aban wageidek werek korlek, wisigin iluk wene tha'bokhogonat iti meke tak hagakhe lagoukha. Meke re, ebe re, Kristus at o.

¹⁸Nen, it aparek nen, inobabut inikhogat dogolik wirlidikhogonat hogorakhekhe dogolik men egarek iti, “Nit akhuni ninebe kepu o. Koktek he, malaikat Allah nen yoko usa'isa agarek meke itiat. Halok he, inapma dogolik, hogorinakhe dogosak,iluk an na'bikaka hegerek meke nen yokhisekhe lagei iti,” iluk inekalat Kristus hinom hunik meke ula'inaguogoluk yokhisiliogei iti. “Eberogonat,” iluk hinakla apugup o.

¹⁹Ninebe yi ninukuloak inom hunik werekma, niniki ninisok ekarlim ninomaken oba hunogo 'binanhikhemo, ninapiri nasinem apusu ninoak elolake lagunem, ninebe kok agorek hak, nit Allah a'buri Kristus ninom hunik werekma, at Allah nenat, kogotninakherek iti. Meke re, it iti itithogon ninoe kok Kristus inom hunik welagoukhasik nenat, yabokane kobologo la'isasukha iti nen, inane holhup o.

²⁰Hit Kristus hinom hunik dogolik watlagagip iti nen, mokat obabut weak meke agat oba yoma iki hago welagarek meke etnogo nen hinebe herle warogo hakhisik werekma, Allah nen herle hisalhinakhikhe iti. Meke re, hit hinobabut it aperek agat oba meke inobabut inikhogat dogolik hagakharek hagat, hagakhe lagap iti nenaluk. It iti nen, “Yi meke ti meke aperek hiniki a'bethogon hakhigik, thelonhogon hakhigik, ageikhe ituk walhigik, hagakhup o,” iluk inasuk wakhunem nenaluk holiluk hagakhe lagap.

²²Wene iti, akhuni nenat, yi meke ti meke nasinem dek agarek meke hasigat, “Yigithogon hagakhe dogouok,” iluk akhuni nen wene palharek hagat, inasuk wakhik, yakulisigik, iliogei iti.

²³It iti ineram nenat akhuni yogeisekhe dogolik, “Malaikat inapma dogolik hogorinakhik, hinakla nen, Nebe kepu, iluk igik, inetaiken hano asuagaluk, iniki inasuk inilhaoak palegarek hak, inoado baga wiik-weakhogon hagakhik, hagakhe dogosak o,” iluk wene inakla kagalek hano thalek yogeisiliogei iti. Meke re, inoba agaken dageisinem, wene iti baga nen inetaiken thebelusak erlok dek o.