Read Mid Grand Valley Dani Kolose 4 Bible Online

Kolose 4 - Mid Grand Valley Dani bible

Kolose 4

¹Nen, hit it iti inougi koktek meke, hinakla nen he, “Ninoe Etagapogot pogot oba werek o,” iluk hutdiluk hinagarumi hinatuaneke meke iti, yi meke ti meke wogeisausak tak-tagat wogeisekhe dogono.

²Sembayan Allah heagei wakhe dogoligat, hina'it ageidek hunik-hunigat ekhe dogolik, hinobabut hebelogo dogono.

³Sembayan ekhe dogolik, nit ninobasik, men ekhe dogono, “Allah ninopase. Wene Kristus nen hagakhikhe wene, alep hakla limago welageikhe meke etnogo, it Paulus lak nen yogeisilik nekhe dogoagaluk, thu hualisano,” iluk, sembayan nit ninobasik ekhe dogono. Wene iti hasigat niki herle warogo 'banhama yoma welagei.

⁴Wene iti, an nen yogeisausak tak-tagat, hutukhogon yogeisekhe dogeik nen he, sembayan ekhe dogono.

⁵It akhuni Allah ane inokodek meke hasik he, hit hinakla motok kagalek dogolik, “Nit Allah a'buri hagasusak meke hano asuak nen ya bagaat hagakhe dogouok,” iluk iti mekeat hagakhe dogono.

⁶Hinane yi meke ti meke hasik it aperek yogeisekhe dogolik, yi meke ti meke mayu hilhunem ituk hano egarek hak, “Wene iti hano,” iluk, waganuagaluk, hinane eanerogon yogeisekhe dogono. Itithogon yogeisugunem, it hinoba hinok waganhunem, wene oko inebe dopok yogeisobageik nen, hinilurogon dogono.

⁷At Tikhikus ninagot ninakmu meke, nit ninomat ninoe Etagapogot atuaneke dogolik, at hasik obabut hupukhogon hagakherek meke nen wene an nabok yabokane yokhisasigin etnaga o.

⁸Hit nen, “It inebe itithogon werek higi,” luk, wene hinilu atluk nen, hinetaiken hapuk uagaluk, iti hasigat hinoba la'isigin iti.

⁹At ipisak wisuagaluk, ninagot Onesimus, ebe ap hit meke obabut hupunhek ninakmu meke etnogo, ipisagat la'isasigin iti o. It witluk nen he, wene nit yoma hagakhe lago meke tha'bokhogonat yokhisasugun o.

¹⁰Aristarkhus an nipisak niniki herle warek welago meke nen heagei wathinakhik, Barnabas agarlak Markus etnogo nen heagei wathinakhik, ega o. At Markus hasik wene alep yokhisasigi etnogo hagat, at ebe hinoba waga halok, hanorogo waganino.

¹¹At Yustus, etaga ageikhe Yesus etnogo nen, heagei wathinakheat o. Inoado aperlagap palek meke, inebe henagan eta anek Allah apma dogogun wene etnogo ninom nen yogeisekhe dogolik, yomakneasinem nakla hano ariogo.

¹²At Epafras, Kristus Yesus atuaneke, ebe hit mekeat etnogo nen, heagei wathinakheat o. At nen he, hit hinakla nen, “Allah ane iti eberogonat,” iluk hutdiluk nen, hinetaiken horle atluk hinebe metegat dogolik, yi meke ti meke Allah akla apekherek hak hagakhe dogobageik iluk sembayan hit hinobasik obatnerogonat isi motogat welagarek.

¹³Itithogon isi dogolik, hit hinobasik inom, akhuni o Laodikia meke inobasik inom, Hierapolis meke inobasik inom, obatnerogon hagariogo iluk, an nen obabut palhirik nen yokhisigi iti o.

¹⁴At Lukas, ebe dokter dogolik u hagarinakherek meke ninakmu meke etnogo nen heagei wathinakhik, at Demas nen heagei wathinakhik, egaat o.

¹⁵It ninagarlak lak ninerugi Allah a'buri o Laodikia welageikharek meke etoma inom, he Nimfa etnogo inom, Allah a'buri aperek at aila natogorliogei meke inom, “Paulus lak nen heagei wathinakha,” iluk yogeisano.

¹⁶Wene holal waganogo hinoba la'i ago meke iti, arat etaga thalhep halok he, it Allah a'buri o Laodikia natogorliogei meke inasuk holuak nen etaga thaluagaluk la'ino. Nen, it Laodikia meke inoba la'isigi etnaga, hit hinoba la'i agunem, etaga thalinoat.

¹⁷At Arkhipus etnogo wene men iluk yogotno, “Ninoe Etagapogot nen hayoko 'bekhe dogolik, Yabu an nobasik itithogon hagatno, iluk yokhekhe meke iti, ilugun oba arat kobokhogon hagatno,” iluk yogotno.

¹⁸Yi anek he, an Paulus nekaerek niki nen holal waganogo heagei wathinakhi. Hit nen he, “Paulus iki herle warek werek,” iluk noba eberek dogono o. Allah obabut hano etnogo nen hakhisik dogoak o.