Read Mid Grand Valley Dani 1 Tesalonika 1 Bible Online

1 Tesalonika 1 - Mid Grand Valley Dani bible

1 Tesalonika 1

¹Hit Allah a'buri o Tesalonika natogokhe dogolik, ninopase Allah inom, ninoe Etagapogot Yesus Kristus inom, hinom hunik welagap meke, nagarlak lak nerugi. An Paulus, Silas Timotius ipisak ninom nen, wene yi holal waganogo hinoba la'i ago iti o. Ninopase Allah obabut hano etnogo nen hano meke wokhisigik, hinetaiken hapugutdinagagik, hagakhe dogoak o.

²Nit nen sembayan hit tha'bokhogonat hinobasik hinetaga hunobo ekhe dogolik, Allah heagei wakho motogat welago.

³Ninopase Allah il oba sembayan itithogon ekhe dogolik, hit hinetaiken Allah oba hakotdiluk dogolik hagakhe lagap meke inom, akhuni aperek hinakmurogo dogolik, hinobatnerogo yomageisekhe lagap meke inom, hinakla nen, “Ninoe Etagapogot Yesus Kristus nen hano hagatninabigin,” iluk hinebe hinobakhanini hapugutdiluk welagap meke inom, nit nen hit hagakhe lagap meke iti hasik obarlikmatdigidek, eberek motok welago.

⁴Nagarlak lak nerugi. Hit hinebe Allah akmurogo dogolik wenakhinakhikhemo welagap iti ninilu o.

⁵Nit hano wene wolok yokhisa agagu etnogo, ninane baga anek yokhisekhe lagagu 'buk. Allah Agoreke etnogo ninakla dogolik, obatnerogo yomaknisekho korlek, ninakla nen, “Wene yi eberogonat,” iluk ninetaikenma hutdisugusik nenat yokhisekhe lagagu iti o. Nit o etoma ninom dogolik, hit hinobasigat hagakhe lagagu etnogo hit hiniluat o.

⁶Hit yi aik ti aik hagathinakho korlegat, hinakla arleken akhekhe dogoagaluk Allah Agoreke nen hinakla kagalhikhemo, hinakla arleken akhekhe dogolik, hano wene waganhigisip nen, nit ninobabut waganhik, ninoe Etagapogot obabut waganhik, hagakhigip iti o.

⁷Ninoe Egatapogot nen hagakhikhe wene etnogo hit werekma nen wikalarik wikalarik o Makedonia, Akhaya, lageikhe iti. Meke re, iti anek 'buk. Hit hinetaiken Allah oba hakotdisigip meke iti, hinabok o yi ai ti ai tha'bokhogonat lageikhemo inilumo, nit nen yabokane hinabok yogeisausak dek aga. Iti nen he, akhuni o Makedonia meke inom, o Akhaya meke inom, hano wene eberogonat iluk waganhukha meke tha'bokhogonat nen, “It hano hagariogei,” iluk, hinobabut waganogo hagariogei iti.

⁹It nen wene men iliogeiat, “It akhuni o Tesalonika meke nen, Paulus lak inebe woginabiluk nen, Eberogonat, Allah iluk motok welagarek meke itiat o, iluk apma dogolik, at hasik hagakhik, at a'but pogot oba nen usasigin iti ebe therogo welageik, hagasuogoluk kaneke here'isalok, inelokhe dagakhogon Allah wogokhukhasik werek o. Allah nen a'but watlageikhesikmo ilugutdisikhe meke, ebe Yesus itiat o. Nen, Allah akla aga dageiluk ukum akhuni inoba 'bekhe dogolik, nit Yesus iti nenat tilninabigin o,” iluk, hinabok hano iliogeiat o.