Read Mid Grand Valley Dani 1 Tesalonika 2 Bible Online

1 Tesalonika 2 - Mid Grand Valley Dani bible

1 Tesalonika 2

¹Nagarlak lak nerugi. Hit hinakla nen, “It Paulus lak ninoba wagoukha iti, we yugunat alomarogo wageidek,” iluk, hinekaerek hiniluat o.

²Hit hinoba aban wageidek o Filipi etoma werekma, akhuni etoma meke nen inakla erlok degetdinaniluk yi aik ti aik hagatninakhe lagoukha. Itithogon mekeat, ninopase Allah nen ane hano wene etnogo ninayuk dekhogon yokhisasuagaluk hagatninakhikhemo wagagusik yokhisasi werekma akhuni doalegat nen, “Wene iti nina'it o,” iluk, ekhe korlegat, ninobatnerogo yokhisekhe lagagu etnogo, hiniluat o.

³Wene yokhisekhe dogolik hinasuk wakhe lagagu iti, hit nuk asuagaluk korlo wene yokhisigik, ninetaiken pere dogolik yokhisigik, ninane 'bitokhogon yokhisigik, ekhe lagagu dek o.

⁴At he, at Allah nenat ninobabut palogo nen, “Hano wene iti, hirat wolok nekhe dogobageik,” iluk, ninayoko 'bisikhe tak-tagat yokhisekhe dogolik, akhuni inakla hanorogo iluk yokhisogorek 'buk. Dek o. Allah ninobabut paliogo meke etnogo akla hanorogo iluk yogeisogorek o.

⁵Nit ninakla nen, yi meke ti meke ninameke dogolep e, iluk apekhe dogolik, ninane baga nen agugurogo yogeisekhe lago dek iti, hit hiniluat o. Nen, Allah iluatma, at nenat, “Iti eberogonat,” iluk pakhogon uak.

⁶Hit nen nit hogotninakhik, it aperek nen hogotninakhik, akhuni meke nen itithogon hogotninabuagaluk ekhe lago dek o. At Kristus nen ninayoko 'biluk la'inani ageikhemo wene iteerek dogolik, ninane ninobatnerogon yokhisausak erlok welago.

⁷Itithogon mekeat, inagosa lak nen ineagei alelogo woginabiluk nen hagasik welageikharek hak, nit hit ninom dogolik alelogo hakhisik dogolik hagakhe lagagu iti o.

⁸Nit nen hit hinebe ninakmurogo welago iti nen, Allah ane iti anek suputhisasugu 'buk. Dek o. Hinebe ninakmu motok nen, ninakla arleken akhekhe dogolik, ninebe inomat wokhisasuguat iti o.

⁹Nagarlak lak nerugi. Nit Allah ane hano wene iti yokhisugunem, yi meke ti meke hasik, hit aperek hinoba tiolhinabunogo iluk, nit ninekaerek nen dikene hibakone ninobatnerogon hagakhik, mep dageik-dagokhogon hagakhik, hagakhe lagagu etnogo, hiniluat o.

¹⁰Nit hit wene eberogonat iluk waganhigip meke ninom dogolik, akhuni nen, “It weak hagakha,” iluk, wene ninoba 'busak degat karelek dogolik, mothogon anek hagakhe lagagu etnogo, hit Allah hinomat hinilumo re, “Iti eberogonat,” iluk usak iti.

¹¹Hit Allah apma ukiluk hogorakharekma etoma ukiluk dogobageik iluk hinayoko 'bisikhe meke etnogo akla warlok apekherek meke mothogonat hagakhe dogobageik nen iluk, nit nen inopase lak nen ina'buri inasuk wakharek hak, hinebe tomok hinasuk wakhik, hinetaiken thebelhik, hinakla kagalhik, hagakhe lagagu etnogo, hit hiniluat o.

¹³Nit nen wene Allah ane etnogo yokhisasugumo, hit nen, “Wene iti akhuni inane meke dek o. Allah aneat o,” iluk waganhigip iti, eberogonat Allah aneat waganhigip o. Iti nen nit huk ageidek Allah heagei wakho motok welago. At Allah nen hit hinetaiken Kristus oba hakotdisigip meke hinakla kagalho motok welagarek o.

¹⁴Nagarlak lak nerugi. It Allah a'buri aperek Kristus Yesus inom hunik dogolik, o Yudea etoma natogorliogei meke, inekaerek inagarlak lak Yahudi meke nenat, yi aik ti aik hagarinakhe lagoukha hagat, hit hinagarlak lak meke nenat yi aik ti aik hagathinabiogei o.

¹⁵It ap Yahudi meke nenat, it ap haganeat Allah ane yogeisekhe lagoukha meke inebe inakhik, ninoe Etagapogot Yesus ebe wakhik, hagakhukha hagat, nit yi aik ti aik hagatninabiogei iti, Allah nen hano iluk apekherek dek. Akhuni inom weak anek hagakhe dogolik,

¹⁶Allah nen it akhuni itikman meke tilinabuagaluk nit nen hano wene yogeisilik lagunem, akhuni inagolak palharek hak, it nen, “Wene hano wene iti yogeisausak dek,” iluk wene paliogei iti o. Itithogon hagakhe dogolik, hibiku-yogoku weak hagakharek mekeat obarluk hagariogei iti nen, Allah akla aga dageiluk, ukum kok meke inoba 'bekhe iti o.

¹⁷Nagarlak lak nerugi. Nit nen hit hinasokne 'binageiluk wagagusik, yogotak ya elanma hasik ninebe walegat welago mekeat he, ninetaike hit ninom opakimo welago hakene iti o. Itithogon dogolik, “Inelokhoken ninileken hisa lelo e,” iluk, haganeat nen ninakla warlok motok apekhe dogolik hinoba wisuogoluk walhekhe lagosik.

¹⁸Walhekhe dogolik, an Paulus nekaerek niki alep ageikhe wisigiluk walhigik, yabokane ageikhe wisigiluk walhigik, hagakhigi mekeat he, Iblis nen nagolak palhikhemo huk agagi iti o.

¹⁹Nit nen he, “Hano asigin,” iluk ninakla arleken akhekhe lago iti, thani inobasik nogo. Ninoe Etagapogot Yesus ebe witluk, “Hano hagakhep,” iluk, at il oba ekagat 'binanumo hogorakhagun iti, erlo ki baga nen nogo. Erlo ninat meke hasik 'buk. Hit hinebe hasigat hogorakhagun o.

²⁰Ninakla arleken akhigik, hogorakhigik, hagakhe lago iti hit hinebe hinobasigat o.