Read Mid Grand Valley Dani 1 Tesalonika 3 Bible Online

1 Tesalonika 3 - Mid Grand Valley Dani bible

1 Tesalonika 3

¹Nit hit hinobasigat ninetaiken thebelusak erlok dek agama nen, men apogo. Nit o Atena yoma ninarligat dogogun o.

²Werek korlek, at ninagot Timotius, hano wene Kristus hagakhikhe wene etnogo ninomat, Allah hasik yogeisilik nekhe lago meke etnogo, akhuni nen yi aik ti aik hagathinabiogei iti nen, hit hinetaiken Kristus oba hakotdisigip meke aborlok unogo iluk, hinetaiken ago wathinakhik, hinasuk wakhik, hagakhe dogoagaluk hinoba la'i ago iti o. Yi aik ti aik hagatninabiogei iti, Allah nen nit ninobasik akla apekhe dogolik, “Itithogon hagathinakhe dogogun,” iluk isikhe hagat hagathinabiogei iti, hiniluat o.

⁴Nit alebageik hit ninom dogolik, “Yabokane yi aik ti aik hagatninakhe dogogunat o,” iluk, yokhisasugu etnogo tak-tagat hagatninabiogei iti hinilu o.

⁵Iti nenat, at Iblis ninakla kagalherek meke etnogo nen hinakla kagali isumo, nit nen hit hinobasik thereak-moreak hagakhe lagagu etnogo we yugunat alomatlasusak iti na'it o, iluk nelabut hisik dogolik, netaiken thebelusak erlok dek agama nen, “Inetaiken Kristus oba hakokthegat werek a? Dek a,” iluk at Timotius nen hinobabut paliluk nen, yoknisi isuagaluk, hinoba la'i agei iti o.

⁶Nen, at Timotius hinoba la'i ageima wagasik etnaga, yogotak apuke ninoba wagasik nen, hit hinetaiken Kristus oba hakokthek dogolik, akhuni aperek hinakmurogon hagakhe lagap meke iti yoknisigik, nit nen, “It inelokhokhen ninileken hiselo e,” iluk warlok apekhe lago hak, hit nen itithogonat ninoba eberek motok dogolik, “It inobabut hano etnogo ninileken hiselo e,” iluk, apekhe lagap meke iti, yoknisa agama nen, ninakla arleken akhekhe lago.

⁷Nagarlak lak nerugi. Nit yi aik ti aik wiik-weakhogon hagatninakho korlegat, hit hinetaiken Kristus oba hakokthegat welagap iti nen, hit hinobasik ninakla hano agama welago.

⁸Itithogon dogolik, hit ninoe Etagapogot hinom hunik dogolik, hapukhogon metek welagap iti nen, nit meneke yogotak ninetaiken yamuk ekhemo welago o.

⁹Nit ninopase Allah il obaat dogolik, hit hinobasik ninakla arleken akhekho motok welago iti hasik, Allah heagei motok wakhe dogolikmo yabokane heagei nikithogon wasu heat hagatlariogo.

¹⁰Hit hinetaiken Kristus oba hakotdisigip mekeat he, aban hakene iti nen, nit ninebe hinoba witluk nen hinetaiken yabokane ago watdinagei isuogoluk, sembayan hit hinobasik dikene hibakone isi motok welago.

¹¹Nit yabokane hinoba wisuogoluk meke re, ninopase Allah ekaerek inom, ninoe Etagapogot Yesus inom, ipisak nenat holak mothogon yaknisoak.

¹²Nit nen hit hinebe ninakmurogon welago hak, hit nen itithogonat hit-hit hinakmurogon hagakhik, akhuni tha'bokhogonat hinakmurinakhik, kokhogonat hinakmurinakhe dogobageik nen, ninoe Etagapogot nen hinobabut inakmurinakharek iti meke oba dukhogon ageikhe inombat wokhisekhe dogoak.

¹³Itithogon hagathinakhe dogoluk nen, ninoe Etagapogot Yesus ekaerek agarumi inomat wagunem, hinebe ninopase Allah ekaerek hasik 'bisalok, at il oba wene hinoba dek hano karelek werekma 'bithisa isuak nen, hinetaiken horlethinakhe dogoak o.