Read Mid Grand Valley Dani 1 Tesalonika 4 Bible Online

1 Tesalonika 4 - Mid Grand Valley Dani bible

1 Tesalonika 4

¹Nagarlak lak nerugi. Wene ilugun oba ageikhe yi yokhisak. Nit ninoe Etagapogot Yesus nen, “Hinobabut Allah akla hanorogon, yigithogon hagakhe dogono, tigithogon hagakhe dogono,” iluk, isikhemo yakulhisa agagu etnogo hinilu. Itithogon yakulhisasugumo, hit nen itithogon hagakhe lagap mekeat he, yabokane ageikhe inom kokhogon hagakhe dogobageik iluk, ninoe Etagapogot Yesus ninom hunik dogolik hinasuk warogo yokhisigi iti o.

³Allah akla nen he, men apekherek iti, “Hit hinebe an nobasik 'baniluk karelek motok dogolik, param ha'isegarek iti meke ha'isigidek motogat dogono.

⁴Itithogon dogolik, hinagugi dopok woginabiluk nen, hinom hano dogolik, hinebe an nobasik 'baniluk karelek dogolik, hinobabut inalon halogo hagakharek tak-tagat hagakhe dogono.

⁵It akhuni itimanke meke, an nebe inokodek dogolik inoba agaken dageisinem yugunat ha'isiliogei iti, itithogon hagakhe dogosak dek o.

⁶Iti meke hasik mothogon hagakhe dogolik, hinagarlak lak hinerugi inilomarogo inaguni inagugi meke param ha'isausak dek o,” iluk, Allah akla nen itithogon apalok yoknisekherek iti. Itithogon ekherek iti nen, alebageigat nit nen ekhe dogolik, “It akhuni param itithogon ha'isegarek meke, ninoe Etagapogot nen ukum inoba 'bigin werek o,” iluk, ninobatnerogon hinasuk warogo yokhisasugu o.

⁷Allah nen, nit weak hagakhe dogoagaluk ninayoko 'bisikhe dek o. Ninebe at ekaerek hasik 'bisalok, karelek dogolik, mothogon hagakhe dogoagaluk ninayoko 'bisikhe iti o.

⁸Wene iti hit aperek nen here'isekhe lagap halok he, nit akhuni ninane meke here'isekhe lagap 'buk. Dek o. Allah nen Agoreke hit wokhisekherek meke etnogo ane mekeat here'isekhe lagap o.

⁹Nen, hit-hit hinagarlak lak hinerugi hinom hinakmurogon dogobageik iluk, Allah nen erlogat yakulhisiliogo iti nen, yabokane an nen nikithogon halok, “Hit hinagarlak lak hinerugi hinom hinakmurogon hagakhe dogono,” iluk, holal waganogo hinoba la'isusak. Degat o.

¹⁰Hit hinagarlak lak hinerugi o Makedonia etoma meke tha'bokhogonat itithogon hinakmurinakhe lagap mekeat he, nagarlak lak nerugi o. Yabokane kokhogonat hinakmurinakhe dogobageik iluk, hinasuk warogo yokhisigi iti o.

¹¹Nit nen alebageik yokhisasugu hagat, hinobakhanini hapugutdiluk dogolik it aperek inawene meke thogotdisalok hiniki nen hinekaerek hinobaga meke dopok waganhe lagap meke itiat kogotdekhe dogono.

¹²Itiat kogotdiluk nen, it aperek nen waganekmake nilik nekharek iti hak hagakhidek dogolik, akhuni itikmanke meke nen, “It hano,” iluk uagaluk inil oba hinobabut mothogon hagakhe dogono.

¹³Nagarlak lak nerugi. It akhuni aperek nen, “Hano hagatlasigin,” iluk inakla nen hutdigidek dogolik he, akhuni watlagunem inakla weak ariogo iti hak, hit itithogon hinakla weak aga dogunogo iluk, wene akhuni watlariogei meke iti hasik hinokodek dogosak iti na'it. Hinilu asubageik iluk hutukhogon yokhisak o.

¹⁴At Yesus ebe watlageikhesik nen iluk ageikhe iti eberogonat iluk hutdekhe lago. Iti nen, akhuni at inom hunik dogolik watlariogei meke yabokane Allah nen inilugurinabiluk, Yesus inom motok iniluk dogoagaluk eberogonat woginabigin iluk hutdekhe dogouogat o.

¹⁵Wene ninoe Etagapogot nen isikhe meke yi yokhisak. At ebe wagunem, it watlagoukha meke here'isalok nit niniluk meke tak alebageik oba dagagun dek o.

¹⁶Ninoe Etagapogot pogot oba nen usa'agunem, it malaikat meke inoe kok meke ane kokhogon igik, Allah apikon ane huthasinem ane kokhogon igik, isinem, akhuni Kristus inom hunik dogolik watlagoukha meke tak inilugurinabigin o.

¹⁷Yabokane nit niniluk dogogun meke ninomat oisa akla hotnokhogon woknisik dageiluk nen, ninoe Etagapogot ninom turlem upu etoma abuk asi dageiluk nen, at ninom motogat dogogun o.

¹⁸Iti nenat, wene iti baga hit-hit hinakla hanorogon, hinetaiken ago wat-wat ekhe dogono o.