Read Mid Grand Valley Dani 1 Tesalonika 5 Bible Online

1 Tesalonika 5 - Mid Grand Valley Dani bible

1 Tesalonika 5

¹Nagarlak lak nerugi. Akhuni aperek iniki abusak waganuogoluk hibako inokodegat werekma wageikharek hak, ninoe Etagapogot wisigin itinem itithogonat werekma wisigin iluk, hit hutukhogon hiniluat welagap iti. Halok he, an nen, “Itinem hagatlasigin, yinem hagatlasigin,” iluk holal waganogo hinoba la'isusak dek o.

³Akhuni nen he, “Nit hano la'bukhogon welago,” iluk, isi korlegat, humi ineagei inakla meke inokodegat werekma inebe itaginabusak tak-takma ineak hinet weak wakharek hak, itithogonat it inokodegat werekma weagarinakhunem lo dukhusak degat asigin o.

⁴Meke re, nagarlak lak nerugi. Hit o mummo dogolepma, akhuni inokodegat werekma iniki abusak waganuogoluk wagunem inakmaken lageikharek hak, itinem hit hinokodegat werekma hinakmaken lelep iti o. Meke re, hit o mummo welagap dek iti nen, hinakmaken lausak dek o.

⁵Akhuni o dikene lia baga welageikharek hak, hit tha'bokhogonat lia iti iteerek mekeat welagap o. Nit he, o hibako mummo welageikharek hak, iti meke iteerek welago 'buk. Dek o.

⁶Halok he, it aperek noge negen iliogei iti, nit itithogon ekhe dogosak erlok dek o. Ninobabut hebelogo dogolik, ninetaiken ekerlogoat dogouok o.

⁷Akhuni noge egarek iti, hibakoneat noge egarek o. Nen, anggur eken apusu nalok hunu-hunu hakene palharek iti, hibakoneat nalok hunu-hunu palharek o.

⁸Meke re, nit o lia baga welagorek meke yi, ninobabut hebelogo dogosak. Ninobabut hebelogo dogolik akhuni aperek nen inasunogo iluk thin inobakha baga ikharek hak, ninetaiken Allah oba hakokthek dogolik, akhuni inebe ninakmurogon welagorek iti mekeat ikhigik, inukuloakma inasunogo iluk inukulasu a'bet meke dakulharek hak, Allah nen tilogo hanotninabigin iluk, ninakla hano welago iti mekeat dakuligik, hagakhe dogouok o.

⁹Allah akla aga nit ninoba 'biluk weagatninabigiluk wenakninakhikhe dek. Ninoe Etagapogot Yesus Kristus nen tilogo hanotninabuagaluk wenakninakhikhe o.

¹⁰At Yesus ebe nit ninobasik ninom niniluk motok dogouogoluk watlageikhesik nen, yabokane wisigin iti, ninebe watlatlukmo wisigin a? Niniluk werekma wisigin a. Hano anek. At ebe witluk, ninom niniluk motok dogogun iti o.

¹¹Iti nen, hit yogotak ya hagakhe lagap hagat, hit-hit hinasuk wat-wat igik, hinetaiken ago wat-wat igik, hagakhe dogono o.

¹²Nagarlak lak nerugi. Hinougi hakhisik werek iti, ninoe Etagapogot nen meldisasikhemo dogolik, hit hinobasik inobatnerogo hagakhik, hinasuk wakhik, hagariogei iti nen, irat inapma dogolik, hinane inalon halogo yogeisekhe dogono o.

¹³It itithogon hagakharek iti nen, hinakla nen he, “Irat ninougi inalon halogo dogouok o,” iluk apekhe dogolik, inebe hinakmurogon dogono. Itithogon hinakmurogon dogolik, hit-hit hinetaiken hapukhogon hagakhe dogono.

¹⁴Nagarlak lak nerugi. Hit nen he, it aperek yabu waganu'buk iniki waganu weak meke iti inasuk wakhik, inayuk weak meke iti inakla kagalhik, inobatne dek meke iti yomageisigik, hagakhe dogolik, akhuni tha'bokhogonat inobasik erogat hagakhe dogono.

¹⁵Akhuni nen hit aperek weagathinakhunem, oko-oko weagarinakhidek dogolik, hit-hit hinobasik inom, akhuni tha'bokhogonat inobasik inom, inobabut hanorogo hagakharek iti mekeat kogotdekhe dogono.

¹⁶Hinakla arleken akhasi motok dogono.

¹⁷Sembayan hunik-hunik isi motok dogono.

¹⁸Allah akla nen he, “Hit Kristus Yesus hinom hunik dogolik, yi meke ti meke tha'bokhogonat hasik an heagei watnakhe dogosak o,” iluk apekherek iti nen, itithogonat hagakhe dogono.

¹⁹Allah Agoreke ane thebelogo 'bigik,

²⁰Allah ane at Agoreke nen inakla kagalogo yogeisekherek meke iti, hinakla meanetdigik, hagakhe dogogup o.

²¹Yi meke ti meke waganuogoluk, “Yi hano, yi weak,” iluk hinakla nen walhalok, hano meke halogat, hiniki a'bethogon herogo dogolik,

²²weak meke yi weak ti weak hagariogei halok, tha'bokhogonat hagakhidek walekhogonat dogono.

²³Itithogon werekma, at Alah ninetaiken hapugutdinanherek meke etnogo nen, hinebe abisakeat ekaerek hasik 'bakhalok dogoak o. Werekma, ninoe Etagapogot ebe wagunem, hinetaiken inom, hinebe inom, hinobabut inom, wene hinoba 'busak motok dek karelek werekma wisuak nen, at nenat hakhisik dogoak o.

²⁴At ninopase Etagapogot Allah ninayoko 'bisikhe meke etnogo nen, “Itithogon hagathinabigin,” iluk abok yoknisekherek tak-tagat hagakherek etnogo nen hakhisik dogoluk, eberogonat hagathinabiginat o.

²⁵Nagarlak lak nerugi. Nit ninobasik sembayan ekhe dogono o.

²⁶Hit nen he, “Paulus lak nen heagei itithogon wathinakha o,” iluk, Allah a'buri dogolik inobabut hagakharek hagat, hinagarlak lak hinerugi Allah a'buri meke aperek tha'bokhogonat heagei hanorogon warinabik lano o.

²⁷Wene holal waganogo la'i ago meke iti, hinagarlak lak hinerugi Allah a'buri meke aperek tha'bokhogonat inil oba etaga thalubageik iluk nobatnerogon ninoe Etagapogot etaga baga yokhisigi iti o.

²⁸Ninoe Etagapogot Yesus Kristus obabut hano etnogo nen hanorogon hakhisik dogoak o.