Read Mid Grand Valley Dani 2 Tesalonika 3 Bible Online

2 Tesalonika 3 - Mid Grand Valley Dani bible

2 Tesalonika 3

¹Nagarlak lak nerugi. Wene ilugun oba ageikhe yi yokhisak. Ninoe Etagapogot ane ibat wialatluk hit werekma etoma wageikhemo hano waganhigip hak, itithogonat wialarik lagunem it aperek nen hano waganuagaluk, nit ninobasik sembayan ekhe dogono.

²It akhuni tha'bokhogonat nen, “Wene iti eberogonat,” iluk waganhasik anek werek 'buk. It aperek waganhidek meke inobabut korlo hagakhik, weak hagakhik, hagariogei meke nen, weagatninabuogoluk hagakhunem, Allah nen tilninakhe dogoak nen he, nit ninobasik sembayan isi dogonoat o.

³Meke re, ninetaiken ninoe Etagapogot oba hakotdisinem, ninane hologo hagakherek meke iti nen hinetaiken horlethinakhe dogolik, at obabut motok weak meke iti nen weagathinabigiluk hagakhunem hakhisik dogogin iti nen, hinetaiken at oba hakotdiluk dogono.

⁴Hakhisik werekma, nit ninakla nen he, “It nen, nit nen it inasuk wakhe lagagu meke etnogo, yogotak mothogon hagakhik, yabokane itithogon hagakhik, hagakhe dogogun o,” iluk ninoe Etagapogot ninom hunik dogolik eberogonat apekhe lago.

⁵Hit hinakla nen he, “Ninebe Allah akmu o,” iluk hutdigik, hinobabut Kristus obakhanini hapugutdiluk hagakhe lageikhe hagat, obabut waganhik, kokhogon hagakhe dogobageik nen, ninoe Etagapogot ebe hinetaikenma dogolik, hinakla kagalhe dogoak o.

⁶Nagarlak lak nerugi. Hit hinagarlak lak hinerugi aperek Allah a'buri mekeat, wene nit nen hinasuk wakhugu etnogo hologo hagakhidek here'isalok, iniki waganhidek kupli hagariogei meke iti, hinom hunik dogogup o.

⁷Nit he, hit ninom dogolik niniki nen waganhidek nina'it werlegat nekhe lagagu dek etnogo, hit nen nit ninobabut waganogo hagasusak hiniluat o.

⁸Nit nen he, hipiri hit hinoba ageikhe oko palhidek werlegat neke lagagu degat o. Hit aperek hinameke degerogo neke dogunogo iluk, nit dikene nen hibakone nen motok thereak-moreak ninekaerek nenat ninobatnerogon hagatdiluk oko palogo neke lagagu iti.

⁹Nit nen he, hit hinoba kino yokhisausak erlok mekeat he, hit nen nit ninobabut waganubageik nen iluk, kino yokhisigidek ninekaerek nen itithogon hagakhe lagagu iti.

¹⁰Nit alebageik ninom dogolik yokhisekhe dogolik, “Hit aperek yabu waganhidek hinobabut kupli meke iti, hipiri nikidek werlegat dogoak,” iluk, yokhisekhe lagaguat apigi.

¹¹Wene itithogon yokhisasugu mekeat he, it aperek nen he, “Akhuni it meke aperek inekaerek inayabu mekeat horligidek dogolik, it aperek inawene mekeat anhapok ilik liliogei,” iluk yoknisegama ninasuk holhosik nen yokhisogo iti.

¹²Nit nen he, akhuni hit meke inobabut itithogon hagariogei meke iti, inilaga isonhogo dogolik, inekaerek iniki nenat yabu waganogo inapiri mekeat neke dogoagaluk, ninoe Etagapogot Yesus Kristus ninom hunik dogolik, at nen ekherek meke inakla kagalogo inasuk wakho iti o.

¹³Nagarlak lak nerugi. Hano meke hagakhe dogolik, hina'it ageidek hagakhe dogono o.

¹⁴Wene holal waganogo hinoba la'i ago meke iti, it aperek nen inasuk hologo hagasusak ina'it meke iti, inekarli asuagaluk it inobabut itithogon hagariogei meke iti hutdisalok nen, hinom hundiluk dogogup o.

¹⁵Itithogon mekeat he, hinom wim palek negen hagakhe dogogup o. We, “Ninagarlak lak ninerugi Allah a'buri mekeat,” iluk, inasuk hanorogon wakhe dogono o.

¹⁶Ninoe Etagapogot ninetaiken hapugutdekherek meke etnogo ekaerek nen yi meke ti meke hasik hinetaiken hapugutdekho motok dogolik, hinebe tha'bokhogonat hakhisik dogoak o.

¹⁷An nen wene tha'bokhogonat holal waganhe dogolik, “At Paulus nen waganhemo higi,” iluk ekagat hutduagaluk, wene ilugun oba arat heagei wathinakhe dogolik nen, nekaerek niki nenat holal waganherek etnogo hak, yogotak yi heagei wathinakhe dogolik holal waganhi meke niki ekagat iti o.

¹⁸Ninoe Etagapogot Yesus Kristus obabut hano etnogo nen, hit tha'bokhogonat hanorogon hakhisik dogoak o.