Read Mid Grand Valley Dani 1 Timotius 3 Bible Online

1 Timotius 3 - Mid Grand Valley Dani bible

1 Timotius 3

¹Wene yi, eberogonat meke igin o. It aperek inakla nen apekhe dogolik he, “An Allah a'buri therisik dogole,” iluk, inakla apega halok he, iti hano motok mekeat warlok nen apega iti.

²Iti nen, ap Allah a'buri therisik dogoagaluk, inobabut he, yi hakene meke meldisausak. Akhuni aperek nen, “At weak,” iluk wene oba 'bigidek meke halok, age opakiat meke halok, weak hagasuagaluk akla kagalhunem etaiken ekaerek therogo welagarek meke halok, etaiken kagalek meke halok, hagasusak meke tak-tagat hano hagakherek meke halok, ap huso wagunem woginakhik, hipiri inobasik hanorogon isakhik, werakhik, hagakherek meke halok, obabut wene hanorogon yakulisekherek meke halok,

³anggur eken apusu oba pirlakthek nekerek dek meke halok, akla aga weak hagakhidek, oba enago yamukhogon welagarek meke halok, akla nen uang motok warlok nen heakherek dek meke halok,

⁴ekaerek nen a'buri meke hano karelogo hagasik werekma, at a'buri nen inopase apma dogolik alon halogo hagakhik, ane isinem hologo hagakhik, hagakharek meke halok, inobabut itigirlik meke halok Allah a'buri therisik dogosak o.

⁵At ap ageikhe nen ekaerek a'buri honorogon karelogo hagasik dogou okodek halok he, Allah a'buri nikithogon therisik dogosak apegep. Erlok dek o.

⁶Ap ageikhe Allah ane aban kerat waganhe meke meldisinem, Allah a'buri therisik dogolik, ekaerek nen hogorakhaumo, Allah nen Iblis ukum wogokhikhe hak, itithogonat ukum oba 'busak iti nen, Allah a'buri therisik dogoagaluk meldusak dek o.

⁷Nen, ap Allah a'buri therisik dogosak meke iti, it akhuni itikmanke meke nen abok weak paliogei meke meldugun halok, at ebe inakla nen meanetdiluk ina'it motok lakhigik, 'bagei herle 'bilukmo kerlelagarek hak, Iblis nen akla kagaliluk ebe hakhigik hagasunogo iluk, abok hano iliogei meke halok, meldisausak o.

⁸Iti hagat he, Allah a'buri meke yomageisekhe dogoagaluk, inobabut yi hakene meke meldisausak. Inilaga yamukthek meke halok, inane pere egarek dek meke halok, anggur eken apusu nasi motok dek meke halok, uang, yi meke ti meke, hano meke, “An meke anek dogolep,” apegarek dek meke halok, meldisausak o.

⁹Ageikhe, wene, Allah akla limagoat welageikhesik nen thelekmatdisikhe wene etnogo, inetaikenma 'biluk, “An wene noba dek nakla thiokhogon welagei,” iluk wene iti obatnerogon herogo welageikharek meke halok meldisausak o.

¹⁰It ap iti aban meldisigidek dogolik inobabut tak palhe dogoumo, akhuni aperek nen, “At weak,” iluk, wene inoba 'bigidekma karelek welageikharek meke halok, ekagat hutdisalok nen, Allah a'buri meke aperek yomageisekhe dogoagaluk, meldisekhe dogosak o.

¹¹Iti hagat he, it iti inagugi inalaga isonhogo hagakhe dogolik inahusupi weak ilik nekharek dek meke halok, weak hagasuagaluk inakla kagalhunem inetaiken inekaerek nen therogo welageikharek meke halok, inobabut mothogon hagakharek meke halok, inobabut iti hakene halok, inaguni yomageisegarek meke dogoagaluk meldisausak o.

¹²It ap Allah a'buri aperek yomageisegarek meke dogosak iti, inagugi opakiat waganek dogolik, ina'buri inom, inagarumi inom, hanorogon karelogo hagasik welageikharek meke halok, meldisausak o.

¹³It nen Allah a'buri aperek hanorogon yomageisugunem, Allah a'buri nen inabok hano ekhe dogolik inane inalonhogon yogeisekhe dogogun.Itithogon isinem, it nen he, wene ninetaiken Kristus Yesus oba hakotdogorek wene iti hasik, inayuk dek pakhogonat yogeisekhe dogogun o.

¹⁴An ibat 'bikheasigiluk nakla apekhe dogoligat he, aban wageidek dogogin halok, nit Allah a'buri ninom dogolik ninobabut hagakhe dogosak meke hilu asuagaluk wene yi tha'bokhogonat holal waganogo hoba la'i agei iti o. O oak tilik oba nen o herlaga a'bethogon welagarek iti hak, nit Allah iluk motok welagarek meke a'buri natogokhorek iti baga nen, Allah ane ebe wene a'bethogon hago welagorek iti o.

¹⁶Wene iti, nit Allah apma dogolik eberogonat iluk apogorek wene limago welageikhe meke Allah nenat thelekmatdisikhemo, “Wene iti kok,” iluk pakhogon ekhe lago. Wene iti re, At Kristus ebe akhuniat winam ageikhe o. At Allah Agoreke nen, “At Kristus iti eberogonat,” iluk thelekmatdisikhe o. It malaikat Allah nen yoko usa'isa agarek meke inileken hasukhaat o. Agarumi nen at hagakhe lageikhe wene etnogo yi akhuni ti akhuni itikmanke meke yogeisilik lagoukha o. Akhuni o yi ai ti ai agat oba meke aperek doalegat nen, “At ebe eberogonat,” iluk inetaiken at oba hakotdisukha o. Allah nen pogot oba hogorakho motok welageikharekma lia'isikhemo welagarek o. Wene iti re, at Allah nenat thelekmatdisikhemo pakhogon ekhe lago o.