Read Mid Grand Valley Dani 1 Timotius 5 Bible Online

1 Timotius 5 - Mid Grand Valley Dani bible

1 Timotius 5

¹Hat nen, ap inarluetek halok he, hane obatnerogo negen yogeisigidek, hopase lak negen hane liokhogonat inasuk wakhe dogono. Nen, ap elege iti re, hagarlak lak negen hinom welageik,

²humi inarluetek iti, hagosa lak negen hinom welageik, humi tugum meke inom homagarlugi tharlisik meke inom, herugi negenat, hakla weak meke ebekhidek hilaga isonhogon hinom welageik, hagakhe dogolik, inasuk hanorogon wakhe dogono.

³Nen, humi thoge akhuni it meke nen yomageisausak meke dekma inarligat werek meke halogat, inalon halhe dogono.

⁴Itithogon mekeat he, it thoge meke iti ineagei, inagonai itago meke aperek werek halok, it iti nenat, “Nit ninebe erlo opakiat nen itago meke,” iluk, it nen hagasusak meke yakuluak o. Iti at Allah akla nen he, “An napma dogolik, inopase lak nen kogorinakhe lagoukha hak, oko it tak hanorogon yomageisekhe dogosak o,” iluk akla warlok apekherek iti nen, itithogonat yomageisekhe dogoak o.

⁵Meke re, humi thoge eberogonat akhuni erlo it meke dekma inarligat dogolik, “Allah nenat yomaknisagein,” iluk, inetaiken at oba hakotdiluk, dikene hibakone ayoko 'bigik, kino yogokhik, hagakho motok welageikharek.

⁶Meke re, it humi thoge aperek it warlok meke, yugunat hagariogei meke iti, inebe iniluk werek mekeat he, warek hakene werek o.

⁷Humi thoge iti hasik, it aperek nen wene inoba 'bigidek hano dogoagaluk, wene itiat inasuk hanorogon wakhe dogono.

⁸It ap aperek nen Allah ane eberogonat iluk waganhukhasik dogoligat he, inekaerek ina'buri itiat kogotdiluk yomageisigik, akhuni erlo it meke halok aperek inomat yomageisigik, hagakhidek halok he, Allah ane here'isalok dukhisukhasik hakeneat werek o. It akhuni itikmanke meke nen wene waganhidek dogolik, weak herlekha'bugat negen hagariogei mekeat he, it iti wene waganhukhasik nen akhuni it meke yomageisigidek iti nen, weak kok negen hagariogei o.

⁹It humi thoge meke Allah a'buri nen yomageisekhe dogoagaluk inetaga holal waganugun halok he, inebe itaklagoukhasik oba nen umur 60 tahun aban hagatlageidek meke inetaga waganusak dek o. Umur 60 tahun arat hagatlaga meke halok inetaga holal waganusak. Meke re, inaguni opakiat motok waganek werekma thoge 'bisega meke halok he, inetaga waganusak.

¹⁰It akhuni aperek nen it humi thoge meke iti inabok ekhe dogolik, “It inobabut hano hagariogei,” iluk egarek meke halok, inetaga holal waganusak. Hano hagakharek iti, inekaerek ineagei hanorogon kogorinakhik, ap huso wagunem, inebe hanorogon woginakhik, Allah a'buri aperek inisok obake thobalinakhik, it aperek weak werekma yomageisigik, iniki ageikhe huk agedek yi meke ti meke hasik yomageisekho motok welageik, hagakharek meke halok, inetaga holal waganusak o.

¹¹It humi thoge tugum aban meke iti, Kristus inom hunik werek mekeat he, here'isalok, inoba agaken nen inetaiken thebelusak dek asumo, ap ageikhe waganusak iti nen inetaga holal waganhun o.

¹²It iti thoge 'bisugunem, it nen he, “Nit ninobabut Kristus hasik anek ninilaga isonhogo hagakhe dogogun o,” iluk nen, yabokane itithogon hagakhidek here'isega halok, inekaerek nen wene inoba 'bakhagun iti o.

¹³Itithogon hagakhe dogolik, inobabut iniki waganu'buk o kuluk ya haklageik nekharek. Itithogon nekhe dogolik, aperek weak motok men hagariogei. Inahusupi weak ekhe dogolik it aperek inawene mekeat lapogoke igik, wene aperek usak dek meke ninat meke igik, ilik liliogei iti o.

¹⁴Halok he, it humi thoge aperek Iblis oporlik mirlokhogon horla lageikha iti nen, it aperek nit Allah a'buri ninom wim palek hakene meke nen ninabok weak palunogo iluk, it humi thoge tugum meke iti, inaguni tomok woginabiluk nen, ineagei itago hanorogon karelogo hagasik dogoagaluk igi iti o.

¹⁶Meke re, he ageikhe etaiken Allah oba hakotdiluk welagarek meke agosa ageikhe thoge meke werek halok, Allah a'buri tha'bokhogonat inoba akin asunogo iluk, at nenat yomakhekhe dogosak o. Itithogon yomakhekho korlek, it Allah a'buri tha'bokhogonat nen, humi thoge meke aperek akhuni it meke nen yomageisausak dek meke halok, yomageisekhe dogosak o.

¹⁷ Allah nen men isikhemo holal waganogo 'bekhe dogolik, “Sapi isok nen gandum oado wulel tagalogo eken yibilhe dogolik aperek naunogo iluk ape herle wasusak dek o. Aperek noagaluk here'isekhe dogono,” iluk isikhemo, holal waganogo 'bisukha iti o. Nen, ageikhe, “Akhuni yabu yi meke ti meke hasik hagakhunem, iniki oko wogeisekhe dogosak o,” iluk isikhemo holal waganogo 'bisukhaat. Iti nen he, ap Allah a'buri hanorogon hagasik welageikharek meke iti, it Allah a'buri tha'bokhogonat nen, “Iniki oko arat yomakhogo,” iluk apigidek, aperek inomat oba dukhogon yomakhekhe dogosak o. Itithogon hagakhe dogolik, kok hakene re, it aperek Allah ane inobatnerogon yogeisigik, yakulisigik, hagariogei meke iti, inalonhogon yomageisekhe dogosak o.

¹⁹Akhuni aperek nen he, “At Allah a'buri therisik werek meke etnogo weak hagakhemo,” iluk, wene oba 'buogoluk hagakhunem, inebe pere a, henagan a, inileken hutukhogon hega meke nen, “Eberogonat,” iluk ega halogat, wene oba 'busak o. Nen, itithogon igidek halok, wene oba 'busak dek o.

²⁰It aperek inayuk asuagaluk, it eberogonat weak hagakhe meke akhuni inil obaat inekarli warogo inasuk hanorogon wakhe dogono.

²¹Wene yokhigi meke iti, hat nen he, akhuni aperek helokhoma 'bisigik, aperek hoporlike 'bisigik, hagakhidek inom tak-tagat yogeisekhe dogono, iluk Allah inom, Kristus Yesus inom, inil obaat, malaikat Allah nen wenageinakhikhesik yoko usa'isa agarek meke inom, inil obaat yokhigi iti o.

²²Akhuni aperek Allah hasik hagakhe dogoagaluk, inukuloak ibat-ibat thebelinakhe dogogun o. Nen, it aperek weak hagakhunem hinom hagakhidek hilaga isonhogo dogono.

²³U nen hibiku-yogokuat hobatne dek agarek etnogo nen helabut hasik i anek neke dogogun. Anggur eken apusu aperek herlekha'bugat inom neke dogono.

²⁴It akhuni aperek weak hagakharek meke iti wene inoba 'bigik, kokhik, hagakharekma aban lageidekma, thelekma agarek iti o. Nen, it aperek weak hagakharek meke thebelek dogoluk nen yabokane thelekma asigin meke werek o.

²⁵Iti hagat, it aperek hano hagakharek meke ibat thelekma agarek iti o. It aperek itithogon hano hagakhunem limago motok dogogin dek o. Thelekma asiginat o.