Read Mid Grand Valley Dani 1 Timotius 6 Bible Online

1 Timotius 6 - Mid Grand Valley Dani bible

1 Timotius 6

¹Akhuni aperek nen Allah etaga weak igik, at ane nit nen yakulisekhe lago meke hasik, “Wene iti weak,” igik, unogo iluk, Allah a'buri meke it aperek inatuaneke atluk hagariogei meke iti, inekaerek inougi meke iti inapma dogolik, inakla nen, “Noe iti alon halhe dogosak,” iluk, inalon halhe dogoak o.

²Itithogon inalon halhe dogolik, it inatuaneke meke iti inakla nen, “An noe iti etaiken Allah oba hakotdiluk welagarek iti nen nipisak Allah a'buri opakiat meke nagarlak nipisak,” iluk inougi inebe inakla nen meanetdisigidegat, “An noe yomakhekhe lagei yi, etaiken Allah oba hakotdekhesik werek mekeatma nakmu o,” iluk, yabokane ageikhe inom kokhogonat yomageisekhe dogosak o. Wene igin yi tha'bokhogonat hat nen yakulisigik, inasuk wakhik, hagakhe dogono.

³It akhuni aperek nen hano wene ninoe Etagapogot Yesus Kristus nen hagakhikhe wene etnogo inom, “Allah apma ukiluk, itithogon hagakhe dogosak,” iluk wene yakulisekhe lago meke iti inom, here'isalok, ninat wene yakulisiliogei meke aperek werek.

⁴It iti nen he, wene ebe inokodek mekeat he, inekaerek hogorakeke dogolik akhuni aperek inom inane meke hasik wene palhik, inom weak ageik, hagakhe dogouogoluk, ina'it dogosak meke kogotdiliogei iti nen, ilugun oba, akhuni aperek inetaiken dek atluk, ebe wene inokodek atluk, it-it inom ua palhik, wenemuk palhik, inekalat inabok weak palhik, inakla nen yugunat wene weak meke it aperek inoba 'bigik, tugi-tugi wene-wene paldigidek hagakho motok welageikharek iti. Itithogon hagakhe dogolik inakla nen he, “Nit Allah apma ukiluk hagakhe lago iti baga, ninikierek hagatlasugun,” iluk, eberogonat thalek apiliogei iti o.

⁶Meke re, ninagosa lak inakla nen itaklaga dogolik, yi meke ti meke ninikimo wolok wagorek dek iti hak, ninebe watlaga dogolik, yi meke ti meke aperek wolok lugun degat iti nen, ninikierek dogou hak, nit Allah apma ukiluk dogolik ninakla nen, “Erlogat welago,” iluk, ninobakhanini hapugutdiluk dogoumo, ebeat meke thaburagun iti o.

⁸Nen, neke dogosak meke inom, ninoado baga ugu dogosak meke inom, werek halok he, “Iti erlogat werek,” iluk apausak o.

⁹Itithogonat meke re, akhuni nen he, “Kok he, uang itiat,” iluk inetaiken hunik dogolik nen, ilugun oba yi weak ti weak hagariogei erlo itiat o. It aperek nen uang iti meke herasuogoluk, inetaiken Allah oba hakotdiluk welageikharethek nenat he, here'isalok yabokane o baga tharlukhogon waregarek hak, it inekaerek inakla wiik-weakhogon hagariliogei iti o. Iti nen he, akhuni aperek nen, “Yi meke ti meke doalekhogon horlalok, ninebe kok dogolo e,” iluk apiliogei iti 'bagei herle 'bilukmo ukiluk wakharek hak, Iblis nen inakla kagalhunem, yi meke ti meke warlok apausak dek mekeat he, weagarinabigin meke warlok iluk apiliogei iti nen, inebe weak akhigik, nuk akhigik, hagakharek iti o.

¹¹It itithogon hagakharek mekeat he, hat he, hebe Allah a'but welagan iti nen, iti meke hagakhidek lo here'isalok dogono. Itithogon dogolik, Allah akla apekherek tak-tagat hagakhik, apma ukiluk, at hasik hagakhik, hetaiken at oba hakotdiluk welageik, akhuni hakmurinakhik, hobakhanini hapugutdiluk welageik, hobabut enago welageik, hagakhe dogeigiluk, iti mekeat kogotdekhe dogono.

¹²Akhuni inae walhauwogoluk tha ae 'busuk tha ae 'busuk walhegarek hak, niniluk motok dogogun iti meke horla lagaluk, hetaiken Allah oba hakotdiluk dogolik, at hasik hobatnerogon hagakhe dogono. Itithogon hagakhe dogoluk, iti meke horla lanogoluk, Allah nen hayoko 'bisikhemo, hat nen he, “Netaiken Kristus oba hakotdiluk itithogon hagakhe dogogin,” iluk akhuni doalegat inil oba pakhogon isigin iti tak-tagat hobatnerogon hagakhe dogono.

¹³Allah akhuni ninebe inom, yi meke ti meke inom, tha'bokhogonat ninilugutninakherek meke etnogo il obaat, Kristus Yesus akhuni nen ap Pontius Pilatus oba wolok lagoukhama, ane eberogonat pakhogon yogokhikhe etnogo il obaat, wene yi hasuk warogo yokhisigin.

¹⁴Hat nen wene at nen yoknisasikhe wene iti tha'bokhogonat mothogon hagakhe dogolik, weak meke hagakhidek karelek werekma, akhuni aperek nen wene hoba 'busak degat dogoluk, hurli ninoe Etagapogot Yesus Kristus ebe thelekmaat wisigin iti hurli hagatlasuagaluk yokhigi iti o.

¹⁵At Allah nen, “Iti hurli thelekmatdigin,” iluk apasikhe bagaat thelekmatdisinem wisigin o. At Allah hogorakho motok welageikharek meke, arligat obatne werek o. Iti nen, inetagapogot welageikharek iti tha'bokhogonat hasik he, inoe Etagapogot at arligat o. Nen, yi akhuni ti akhuni inougi koktek welageikharek meke iti, tha'bokhogonat inoe kok he, arligarat o.

¹⁶Nen, at ebe watlageidek ikhok motok welagarek he, at arligat o. At ebe o lia baga motok werekma, inileken sirluk-pabuk iluk, oba horokhogon lausak erlok dek o. At ebe akhuni ageikhe nen inileken higidegat. Itithogon hausak erlok dek. Obatne motok dogogin meke iti, hogorakho motok dogouok o, iluk, “Amin,” igi iti.

¹⁷Yi meke ti meke tha'bokhogonat dek asigin mekeat he, it ap koktek inetaga werek meke iti inakla nen hogorakeke dogolik, “Nameke agat oba meke yoma motok doalegat yi nen nebe hano dogogin,” iluk, apekhe dogunogo. At he, at Allah yi meke ti meke tha'bokhogonat ninakla arlekenhogon horlekhe dogoagaluk kokhogon woknisekherek etnogo nenat hanotninabigin iluk hutdekhe dogoak nen inasuk wakhe dogono.

¹⁸It iti hanorogon hagakhe dogolik, inameke doalegat dogou hak, akhuni aperek hanorogon yomageisekhe dogolik, inameke dek meke wogeisigik, supurisigik, hagakhe dogoagaluk inasuk wakhe dogono.

¹⁹Itithogon hagakhe dogogun halok he, yi meke ti meke yabokane meke hasik natogorlogo 'begarek hak, hano hagakhe dogolik, yabokane motok dogogin meke hasigat 'bakhekhe dogoluk nen, ninebe eberogonat ninilugutninabumo dogogun iti mekeat horloagaluk inasuk wakhe dogono o.

²⁰Timotius na'but o. Allah nen hayoko 'bekhe dogolik, “Yi meke hagakhe dogono,” iluk, hoba 'bisikhe meke itiat hanorogon herogo dogolik, hobatnerogon hagakhe dogono. It aperek nen Allah ane usak meke iti igidegat dogolik, we yugunat, dek asigin meke hasigat wenemuk yakhe dogolik, “Wene ninilu,” iluk iliogei iti inokodek dogolik iliogei o. It iti nen, “Wene ebeat meke arat hutdogo,” iluk ekhe dogolik, Allah ane eberogonat meke here'isalok nuk asi dukhega iti nen, wene iti meke waganhidek here'isalok dogono. Allah obabut hano etnogo nenat hakharik dogoak o.