Read Mid Grand Valley Dani 2 Timotius 3 Bible Online

2 Timotius 3 - Mid Grand Valley Dani bible

2 Timotius 3

¹Wene yi hakla eberek dogono o. O ilugun oba weak motogat asigin meke werek o.

²Akhuni inetaiken hunik inekaerek inebe hasik inom, uang hasik inom, kogotdigik, inekaerek nen hogorakhigik, siatdakhigik, inane puk weak wenageisigik, inagosa inopase lak inane holhidek here'isigik, heagei warinakhidek inobabut weak hagakhik, Allah hasik hagakhidek ina'it motok welageik,

³akhuni inebe inakmurogo welageidek ina'irat welageik, it aperek inom korlo hagatdiluk thagalogo here'isalok dogou ina'it welageik, inabok weak palhik, inobabut akla aga apik awulagamhogon hagakhik, hano meke hagasu ina'it dogolik,

⁴inebe opakiat meke it aperek nen inasuagaluk yoko lageik, inobabut al hathokhogon hagakhik, inekaerek inalonetdakhalok hogorakhigik, Allah ebe inakmurakhidek, akhuni inakla arlekenhogon hagakharek iti mekeat warlok welageik,

⁵akhuni inil oba, Allah a'buri thalek dogolik, inakla nen Allah obatne iti meke here'isigik, hagakhe dogogun o. Yogotak akhuni inobabut iti hakene aperek hagariogei meke halok, hinom hunik dogogup o.

⁶Humi ato yi meke ti meke inakla nen warlok apalok, weak hagatluk inetaiken akin dogoligat, wene yakulho motok welageikharek mekeat he, ebe wene hutukhogon waganu 'bugat werekma, it ap inobabut itithogon hagariogei meke iti nen, humi iti inailake inabusagat ukiluk, inane baga nukhetdisalok nen, inebe herle warogo negen hageisiliogei iti o.

⁸Muk haganeat, it ap Yanes inom, Yambres inom, Musa ane thagalogo here'isalok hagakhukha hak, it iti ebe wene thagalogo here'isalok, weak hagakhe dogolik, inakla nen wene ebeat meke ebesusak dek, korlo meke eberiogei iti o. Itithogon hagariogei iti baga, inetaiken Allah oba hakokthek meke kobologo here'isega iluk, ekagat asigin iti o.

⁹It Yanes inom, Yambres inom, korlo hagakhukhama, it aperek nen, “Inetaiken dek,” iluk ekagat hutdisasukha hagat, it iti itithogonat inetaiken dek hagariogei iluk, akhuni tha'bokhogonat nen inobabut ekagat palumo, it inane iti kok asigin dek o.

¹⁰It iti inobabut itithogon ekagat asigin mekeat he, hat he, an nen wene yakulisegerek meke inom, nobabut hagakherek meke inom, “Itithogon hagasigin,” iluk nakla apegerek meke inom, netaiken Allah oba hakotdiluk welagarek meke inom, nakla hapukhogon welagarek meke inom, akhuni tha'bokhogonat nakmurogon welagarek meke inom, nobakhanini hapugutdiluk welagarek meke inom, haganeat nen hutdanhe laganat o.

¹¹Akhuni nen yi aik ti aik hagatnakhunem, noba aik weak hegerek etnogo hiluat o. Akhuni o Antiokia nen, Ikonium nen, Listra nen, weagatnakho korlegat werekma, ninoe Etagapogot nen iki ageikhe thogotdanhidek tilnakhe lageikhe iti o.

¹²Nit Kristus Yesus ninom hunik dogolik, Allah hasik hanorogon hagakhe dogouogoluk ninakla apekhe lago meke ninebe tomok tha'bokhogonat yi aik ti aik hagatninakhe dogogunat o.

¹³Weagatninakhe korlegat, it aperek weak hagakhe dogolik nukhetdisiliogei meke iti, it aperek nen nukhetdisugunem, it nen oko-oko nukhetdisigigat hagakhe dogolik, weak arik-arigat kokhogon weak akhagun iti o.

¹⁴It nen itithogon hagakharek mekeat he, hat anek he, nit ninebe hilu meke nen ebe wene yakulhikhugumo hat nen, “Eberogonat,” iluk waganhigin meke itiat a'bethogon herogo dogono.

¹⁵Hat hebe elege baga nenat Allah ane holal waganek iti hilu motok welagatek iti, hakla eberek motok dogosak o. Itithogon dogolik, hetaiken Kristus Yesus oba hakotdiluk werekma, Allah nen tilhabusak meke hutdinogoluk, at ane holal waganek iti bagaat hakla erlogat kagalusak werek o.

¹⁶Allah ane holal waganek iti tha'bokhogonat, at nenat inakla kagalhikhemo, holal waganogo 'bisukha meke iti baga, akhuni aperek wene ebe wene yakulisigik, korlo hagakhunem inasuk wakhik, inobabut hebelinakhik, Allah akla warlok apekherek meke mothogon hagakhe dogoagaluk inasuk wakhik, hagakhe dogosagat o.

¹⁷Akhuni inebe tomok inebe Allah hasik 'bisalok dogolik, yi meke ti meke at obasik hano hagakharek meke iti erlokhogonat inetaiken horlerogon hagakhe dogoagaluk, Allah ane holal waganogo woknisasikhe iti o.