Read Mid Grand Valley Dani 2 Timotius 4 Bible Online

2 Timotius 4 - Mid Grand Valley Dani bible

2 Timotius 4

¹At Kristus Yesus ebe yabokane agat oba thelekmaat witluk nen, akhuni ninebe niniluk welago meke inom, watlagoukha meke inom, tha'bokhogonat wene ninoba 'bigik, kokhik, hagasigin o. Hagakhe dogoluk, yi akhuni ti akhuni tha'bokhogonat apma 'bisalok at ebe kok dogogin iti nen, an nen, ninopase Allah inom, Yesus inom, ipisak inil oba, hat nen ebe wene akhuni yogeisekhe dogonogoluk hasuk nobatnerogo warogo yokhisik. Akhuni hano wene yogeisugunem holusak werek korlegat inom, ina'it werek korlegat inom, holuagaluk wene iti hobatnerogon yogeisekhe dogono. Hakla puk ageidek yakulisekhe dogolik, weak hagakhunem hane pakhogon yogeisigik, inasuk wakhik, inetaiken ago warogo yogeisigik, hagakhe dogono.

³Yabokane, it akhuni nen ebe wene inasuk hanorogon holhidek dogolik, we wene inasuk holu warlok nen, yakulisekhe dogoagaluk it aperek inebe doalegat inayoko 'biluk, natogorinabugun iti.

⁴It iti ebe wene iti isinem inasuk labetdiluk, wene suakane pilinekharek wene iti pilinekhunem anek he, inasuk lanhogon holhe dogogun iti.

⁵It itithogon hagakho korlegat, hat yi meke ti meke hasik, hobabut hebelek dogolik, hoba yi aik ti aik hekhe dogolik, hobakhanini hapugutdiluk dogono o. Hano wene yakulisilik nekharek iti mekeat kogotdiluk Allah nen, “Itithogon yomageisekhe dogono,” iluk, hayoko 'bisikhe meke iti ageikhe here'isigidegat mothogon hagakhe dogono.

⁶Akhuni nen an nebe Allah hasik namep ulabogo nasugun oba arat hakok i aga o. Itithogon nasugunmo, an nebe nopase oba lausak tak-tagat agama welagei o.

⁷Tha ae 'busuk, tha ae 'busuk lageikharek hak, an netaiken Allah oba hakotdiluk motok dogolik, at hasik nobatnerogonat hano hagarik waga lagarik nen, hurli baga arat hagatlasi aga o.

⁸Akhuni inae walhugunem, inae 'busuk asugun meke oko hano meke wogeisegarek hak, an nebe arat lagunem, ninoe Etagapogot nen ukum ninoba 'bigik, kokhik, tak-tagat hagasigin itinem, at nen he, “Hat morat hano hagakhe laganma,” iluk, oko kare-kare mitago negen ageikhe woknisigin werek o. Meke re, an anek woknisigin 'buk. It aperek inakla nen, “Yesus wetnek o,” iluk, warlok nen therogo welageikharek meke tha'bokhogonat ninom woknisageinat o.

⁹At Demas etnogo agat oba meke yoma akla warlok nen, an thogotdaniluk o Tesalonika lagama o. Nen, at Kreskes, o Galatia lageik, Titus o Dalmatia lageik, hagakhama at Lukas anek nipisak welago iti nen, hat ibat noba wetnok nen he, hobatnerogon walhekhe dogono. Itithogon walhekhe dogoluk nen wisigiluk halok he, Markus etnogo obabut an Allah hasik hagakhunem hano yomakneasusak meke werek iti nen, ebe waganik-waganik noba wetno o.

¹²Nen, at Tikhikus etnogo, o Efesus loagaluk la'igima o.

¹³Hat waga dogolik nen, su thogei meke itikmanke ikherek meke etnaga inom, wene holal waganek ato emenaga, waganhe dogolik, ebe kok hak he, wene domba oado karek meke baga holal waganek etnaga inom, o Troas at Karpus aila etoma 'biluk wageima emenaga tha'bokhogonat wolok wetno.

¹⁴Nen, at Aleksander tembaga meke pisue negen hagakherek meke etnogo nen, an kokhogonat weagatnakhemo welagei. Meke re, at ninoe Etagapogot nen at hagakhe iti tak-tagat ukum oba 'bigin werek o.

¹⁵At iti ebe wene nit nen yakulisekhe lago meke ninane thagalogo here'isalok hagakhe lagama iti nen, hat hobabut hebelogo dogono.

¹⁶Akhuni nen wene noba 'biluk, nitema alebageik waganhunem, an nen, “An noba 'bukmoat o,” iluk wene noba korugunem, it tha'bokhogonat an nalilu ageikhe yomakneau degat here'aniluk dukhega iti hasik, Allah nen ukum inoba 'bigidek dogoak o, iluk sembayan ekhe lagei.

¹⁷Itithogonat meke re, an nen ebe wene hutukhogon yogeisugunem, it itikmanke meke inebe tha'bokhogonat inasuk holuagaluk, ninoe Etagapogot an nalilu dogolik, nobatnetnakhesik, singa helo yeke hakene anini weak meke etnogo apema werekma tilnabu hak, nasusak meke tilnakhe iti o.

¹⁸Itithogon tilnakhesik nen, yabokane akhuni nen yi weak ti weak hagatnabuogoluk hagakhunem, at nenat tilnakhe dogoluk nen, karelogo woknarik pogot oba, at apma dogogunmo etoma ukigin iti hasik, at hogorakho motok dogouok, iluk, “Amin,” igi iti o.

¹⁹He Priskila inom, agun Akwila inom, at Onesiforus a'buri inebe tha'bokhogonat inom, “Paulus nen heagei wathinakhe,” iluk yogeisano.

²⁰At Erastus etnogo o Korintus huk aga iti o. Nen, at Trofimus etnogo oba uat werek nen, o Miletus 'biluk wagei iti.

²¹Hat he, o miso nasinem thogei weak agarek etnogo aban ageidek werek korlek, ya bagaat ibat wisigiluk hobatnerogon walhekhe dogono. At Ebulus inom, Pudes inom, Linus inom, he Klaudia inom, ninagarlak lak ninerugi Allah a'buri meke tha'bokhogonat nen heagei wathakha o.

²²Ninoe Etagapogot hetaikenma thekharik dogolik he, at obabut hano etnogo nen, hinebe tha'bokhogonat hakhisik dogoak o.