Read Mid Grand Valley Dani Filemon 1 Bible Online

Filemon 1 - Mid Grand Valley Dani bible

Filemon 1

¹Filemon nagarlak o. Nagarlak nipisak Kristus obasik hagakhorek meke hebe nakmu o. An Paulus, Kristus Yesus obasik niki herle warogo 'banhama welagei meke etnogo, ninagot Timotius nipisak nen, hat hebe inom, Allah a'buri aperek hat haila natogokharek meke inom, nineru Apia inom, ninagot Arkhipus, wim yakherek hak, Allah hasik ninom ninobatnerogon hagakhe lago meke etnogo inom, wene yi holal waganogo hinoba la'i ago iti o.

³Nagarlak lak nerugi. Ninopase Allah inom, ninoe Etagapogot Yesus Kristus inom, ipisak inobabut hano etnogo nen hano meke wokhisigik, hinetaiken hapugutdinagagik, hagakhe dogoak o.

⁴Hat hetaiken ninoe Etagapogot Yesus oba hakotdiluk, Allah a'buri aperek tha'bokhogonat hakmurinakhetek iti habok nasuk holhirik nen, sembayan hibiku-yogoku ekhe dogolik, hat hetaga iluk nopase Allah heagei wakhe lagei o.

⁶Nit ninetaiken Allah oba hakotdiluk, ninagarlak lak ninerugi Allah a'buri aperek inom, Kristus ninom hunik werekma, at nen yi meke ti meke hano meke woknisugunem hutdogorek meke iti, yabokane kokhogon hutduogoluk Allah ayoko 'bekhe lagei.

⁷Filemon nagarlak o. Hat nen akhuni Allah a'buri meke aperek tha'bokhogonat hakmurinakhe dogolik, inakla hanorinakhetek iti nen, an Allah ahsik hagakhe dogoagaluk netaiken ago watdanhe laganma nakla arleken motok akhekhe lagei o.

⁸Hat itithogon hagakhetek iti nen, nipisak Kristus ninom hunik dogolik, at hasik hagakhorethekma, an nen he, “At nagarlak nipisak,” iluk nekarli degat, “Itithogon hagatno,” iluk, an nen nane nobatnerogon yokhisusak erlok mekeat he,

⁹an Paulus yogotak nebe arat yaman agarik werekma Kristus Yesus hasik niki herle warogo 'banhama welagei. Itithogon dogolik, hat nakmurogo welagarek iti nen, nane erogat hoba ageikhe kino yokhisik o.

¹⁰Iti, an niki herle warek dogolik, at Onesimus etaiken Kristus oba hakotdekhe iti nen, ebe na'but hakene hagatlageik, an nebe at opase hakene hagatlageik, hagatlagosik nen, at ebe waganinogoluk yokhigi o.

¹¹At alebageik, hat hasik hanorogon hagasusak meke erlok dek negen welageikhe meke re, yogotak hat hasik anek 'buk. An nipisagat hasik hanorogon hagatnisekhe dogogin meke erlogat werek o.

¹²Iti nen, at ebe an netaiken hunik nen at apuke hoba la'i agei iti o.

¹³An hano wene yogeisilik nekherek iti hasik niki herle warogo 'banhama werek korlek hat nen yomakneekhe dogou hak, hobolukmo at nen yomakneekhe dogoagaluk ebe hakhausak mekeat he,

¹⁴hat nen, “I o, hano. Hipisak dogono,” iluk yoknikhidekma, an nen nabusagat wene ageikhe usak erlok dek o. An nakla warlok he, hat ebe iteerek meke hetaiken nenat inogoluk, la'i agei iti o. Meke re, hat hakla nen, “Na'it,” apekhe korlegat, an nen nane obatnerogon yokhisusak he, na'it o.

¹⁵At Onesimus hat here'ageiluk dukhisikhe iti, hiki elanma dogoluk nen, yabokane hipisak motok dogouogoluk waganiginmo, at Allah akla apasikhe baga hagatlariogo apigi.

¹⁶At yabokane hat hipisak dogogun iti, ebe hatuaneke dogolik, hat hasik hagakhe dogogin mekeat he, iti anek 'buk. At he, at ebe Allah a'but agasik ninagarlak ninakmu mekeat dogogin iti. At nen he, an nakmu mekeat dogolik, an hasik hano motok hagariogo iti, herlekha'bugat o. Hat hasik anek he, an ebe agat oba hatuaneke dogolik, hagarlak hipisak ninoe Etagapogot hinom hunik dogogun iti nen, ebeluk hetaiken motok hunik dogono.

¹⁷Iti nen he, hat nen, “Paulus ebe an nagarlak nipisak hunik welago meke,” iluk, apekhe lagan iti, Onesimus apuke hoba la'i agei iti, an nebe hoba wagunem, woknabu hak, at ebe itithogonat apuke waganino.

¹⁸At nen korlo ageikhe hagathakhemo, nomat oba 'begenma palegeke werek halok he, nomat tha'bokhogonat an noba 'bino.

¹⁹An Paulus itithogon nomat noba welagei, iluk tha'bokhogonat iti oko paligin meke nekaerek niki nen holal waganhi iti o. An nen, hat hano wene yakulhikhigimo hekaerek hebe hasik hano meke ite agatik welagan iti, nomat hoba 'bigima palegeke hoba werek iluk yokhisusak mekeat he, an itithogon usak dek. Hekaerek hiluat o.

²⁰Iti halok nagarlak o. Ninoe Etagapogot ninom hunik dogolik nakla arleken akhoagaluk an yomakneau hak, at ebe iti hanorogon waganino.

²¹Wene an nen yokhikhi meke iti hat nen hasuk hologo hagasiginat higi, iluk, nakla apigirik nen holal yi waganogo hoba la'i agei iti o. An nen, “Ebe waganino,” iluk yokhigi meke iti, hat nen itithogon hagakhe dogolik hano meke aperek inom hagasiginat higi, iluk, an niluat o.

²²Itithogon hagakhe dogolik hit tha'bokhogonat nen an hasik sembayan Allah ayoko 'bekhe lagap iti nen, at nen yabokane niki herle hisalogo ula'aniluk hinoba woknarik wisigin apekhe lagei. Halok he, an yabokane hinoba witluk noge usak hasik, hat nen haila etoma o kamar ageikhe karelogo 'baniluk dogono.

²³At Epafras nipisak Kristus Yesus obasik hagakhe lago iti nen, niniki herle warogo 'binanhama welago meke etnogo nen heagei wathakhe o.

²⁴Nen, an nagarlak lak Kristus obasik hagakhe lago meke, Markus inom, Aristarkhus inom, Demas inom, Lukas inom, inebe tha'bokhogonat nen heagei wathakhaat o.

²⁵Ninoe Etagapogot Yesus Kristus obabut hano etnogo nen hit tha'bokhogonat hinetaikenma dogolik thethisik dogoak o.