Read Mid Grand Valley Dani Ibrani 10 Bible Online

Ibrani 10 - Mid Grand Valley Dani bible

Ibrani 10

¹It akhuni Yahudi meke wene Allah nen ninasuk wakhikhe wene iti tak-tagat hagakhe dogolik, ebe meke hagakhe lagoukha 'buk. Ebe yabokane hanotninabigin meke werek korlek, oba lisogon hagakhik, alino hagarogo hagakhik, hagakhe lagoukha. It itithogon hagakhe dogolik, yi tahun ti tahun kambing sapi Allah warekhe lagoukha meke iti meke anek warekho motok welagoukha iti nen, it akhuni kambing sapi Allah warisi aga lagoukha meke iti baga nen 'bogokhogon hanorinabusak erlok dek aga lageikhe iti.

²It 'bogokhogon horinabilepma, “Nit weak hagakho,” iluk inakla akin dogolik, wene munini ebekhe lagoukha meke iti, dek atluk nen, inako warogo Allah wogosi aga dogolep dek o.

³Akhuni weak hagakharek meke iti sapi inom, kambing inom, amep oba horinabusak erlok dek iti nen, yi tahun ti tahun kambing sapi warogo Allah wogokhe lagoukha iti baga, akhuni weak hagakhe lagoukha meke inakla eberisekhe lageikhe iti.

⁵Itithogon hagakhe lagoukha iti nen, at Kristus agat oba usa'aga dogolik, Allah men yogokhikhe, “Hat he, akhuni nen kambing sapi wathikhik, yi meke ti meke wokhikhik, hagakharek iti meke wokhekhe dogosak, ha'it iti nen, an nebe akhuni hakene hagarogo 'banhigin yi o.

⁶Hat hobasik kambing sapi warogo hetu hunhekharek iti inom, weak hagakharek meke horinabinogoluk kambing sapi warogo wokhekharek iti inom, hat ha'irat o.

⁷ Iti nen he, Allah nopase. An nen wene yokhisik. Hat hane baga, wene an nen yokhesu hak, An nen hat hakla warlok meke hagasigiluk wisigin, iluk wene an nobasik holal waganogo 'bisukhama werek iti, ebe hagasigiluk nebe wagarik welagei yi o,” iluk yogokhikhe.

⁸ At Kristus nen wene alebageik yogokhikhe iti, “Akhuni nen hat kambing sapi wathikhik, yi meke ti meke wokhikhik, hetu hunhikhik, weak hagakharek meke horinabinogoluk kambing sapi wathikhik, hagakharek iti, hat ha'irat o,” isikhe iti, Allah nen ninasuk wakhikhe wene iti tak-tagat hagakhe lagoukha meke hasik isikhe.

⁹ Wene itithogon arat yogokhikhesik nen, yabokane men yogokhikhe, “Allah nopase. An nen hat hakla warlok meke itiat hagasigiluk nebe wagarik welagei o,” iluk yogokhikhe. Itithogon yogokhikhe iti, Allah nen it alebageik hagakhe lagoukha wene iti degetdisalok, yabokane Kristus watlasigin itiat dogoak isikhe iti nen itithogon yogokhikhe.

¹⁰Nen, at Yesus Kristus Allah akla warlok meke iti hagakhe dogolik, at ebe opaki hasigat watlaga dogolik, Allah wogokhikhe iti baga, nit ninebe Allah hasik motok karelogo 'binanhikhemo welago.

¹¹It ap Allah iteerek inebe tomok nen akhuni inobasik hagakhe dogolik, hibiku-yogoku eran-alep kambing sapi warekhe lagoukha meke iti meke anek warogo Allah wogokhe lagoukha iti nen, Allah nen it weak hagakhe lagoukha meke korogo wokhausak, motok erlok dek ageikhe iti o.

¹²Itithogon mekeat he, at Kristus anek he, nit akhuni nen weak hagakhorek meke hasik iki opaki hasigat watlaga dogolik, ebe motok-motok Allah wogokhikhesik, alilu iki ebeke asi lageikhesik kok werek iti.

¹³Itithogon ebe kogat dogolik, at athili meke Allah nen apma nomologo 'bisa agunem isok nen al debelinabigin iti anek aban nen, therogo werek o.

¹⁴At Kristus opaki hasigat watlaga dogolik, ebe Allah wogokhikhe iti baga, nit akhuni ninebe Allah hasik 'binanherek meke 'bogokhogon motok hotninakhikhe.

¹⁵At Allah Agoreke nen, wene iti hasik abok yoknisekhe dogolik, wene alebageik men isikhe,

¹⁶ “At Allah nen, Yabokane an nen it wene ket meke warogo woginabigin iti, wene ebe yiat warogo woginabigin. Inasuk wakherek wene iti inakla 'bisigik, inetaikenma holal waganhik, hagasigin o,” iluk isikhesik nen,

¹⁷ “An nen iti weak hagakhik, inasuk warek dek korlo hagakhik, hagakharek meke iti arat obarlikmatdisalok, nakla eberek dogogin motok dek o,” iluk yabokane isikhemo holal waganogo 'bisukha iti.

¹⁸Iti nen he, nit akhuni ninasuk warek dek ninobabut weak hagakhorek meke, at Allah nen arat thagalogo degetdisikhe iti nen, nit weak hagakhorek meke hotninabuagaluk yabokane Allah hasik ninako kambing sapi warogo 'bisausak motok dek o.

¹⁹Nagarlak lak nerugi. At yesus amep ulabogo watlageikhe iti baga, nit o kakok palekma Allah ekaerek aila etoma ninayuk dekhogonat ukuok o.

²⁰Nit itithogon ukusak iti, o kakok palek su laberek hurli warek iti, at Yesus ebeatma, nit akhuni ninilugutninabiginmo ukuagaluk, holak at Yesus ebe watlageikhe iti baga, holak ket meke nit ninobasik ya'inanhikhe.

²¹Ya'inanhikhesik, at ebe Allah aila etomaat iteerek nit ninobasik kok welagarek o.

²²At ebe etoma werekma, nit ninakla nen, “Nit weak hagakho,” iluk ninakla wene munini ebekhorek meke hano hotninakhik, ninoado baga i elokhoken hano meke baga thobalninakhik, hagakhikhe iti nen, ninetaiken opakiat at oba hakotdiluk ninayuk dekhogon, at oba horokhogon ukekhe dogouok o.

²³At obabut he, “Wokhisagein,” iluk abok yoknisekherethek, ebe woknisekherek iti, nit nen, “Eberogonat hutukhogon woknisagein,” iluk akhuni inil oba ninane pakhogon ogorek meke iti isi motok dogolik, a'bethogon hago dogouok o.

²⁴Itithogon hago dogolik, nit-nit nakmu-hakmurogon dogolik, yomak-yomak hagakhe dogouogoluk, ninetaiken ago wat-wat hagakhe dogouok o.

²⁵Nit ninoe iki dogoluk degat wisigin iluk ninilu iti nen, it aperek nit natogokhunem huk ageikharek iti hak, nit huk ageidek, oba eberek-eberek nit-nit ninetaiken ago warogo ninasuk wat-wat hagakhe dogouok o.

²⁶Ebe wene Allah ane yoknisasukha meke ninilu dogoligat, nineram nenat, wene iti thagalogo here'isalok weak motogat hagakhe dogogun halok he, nit yabokane ninako kambing sapi Allah warisumo hotninabigin motok degat o.

²⁷Allah akla aga dageiluk o ilugun oba wene inoba 'bigik, kokhik, hagasigin iti baga, at athili meke inebe hetu aik oba inakhe dogolik, nit at ane here'isalok weak hagakhe dogogun halok, ninomat ninasinogo iluk, nit nen hutdiluk ninayukhogonat dogouok o.

²⁸Wene Allah nen ninasuk wakhikhemo, at Musa nen yoknisasikhe wene iti, it akhuni nen hologo mothogon hagakhidek thagalogo here'isekho halok, akhuni inebe pere a, henagan a, “Nit ninil oba it nen eberogonat wene iti thagalogo here'isalok hagakha o,” iluk pakhogon isi halok, inakmurinakhidek inebe motogat inakhe lagoukha apigi.

²⁹Iti hak, it akhuni nen Allah a'but mekeat he, inisok nen thagalogo here'isigik, Allah nen nit ninom hunisuogoluk Kristus watlageikhe iti baga, amep oba hano horinakhikhe mekeat he, yabokane inakla meanetdisigik, Allah obabut hano meke Agoreke etnogo inane sagun yogokhik, hagakho halok he, wene motok akin meke inoba 'biluk weagarinabigin o.

³⁰ “Ukum an nen wogeisigik, oko an nen 'bigik, hagasigin o,” iluk isikhe iti, tha nen isikhe nogo. Allah nenat isikhe ninilu. Nen, wene ageikhe men isikhe, “An inopase noba dopok nen na'buri wene inoba 'bigik, kokhik, hagasigin o,” iluk isikheat.

³¹Wene itithogon inoba 'bigin iti, nit weak hagakhunem ninebe Allah iluk motok welagarek meke ikimo 'binanhe halok, ninayuk motok asigin iti o.

³²Nagarlak lak nerugi. Hit alep Allah nen hinebe liatdinageikhemo werekma yi aik ti aik wiik-weakhogon hagathinakho korlek, hinaik hundiluk hinobakhanini hapugutdiluk hinobatnerogon welagagip iti hinakla ebetni o.

³³Itithogon hagakhe dogolik, hit aperek akhuni doalekma hinetaga wiik-weakhogon weak hagathinakhunem, hit aperek nen, “Nit ninomat weagatninabuak,” iluk inoba ukisinem hinomat weak hagathinakhik,

³⁴it aperek herle warogo kola'isugunem hinakmurinakhik, hagakhe lagagip iti o. Itithogon hagakhe dogolik hinakla nen, “Nit meke hano motok dogogin meke werek o,” iluk apekhe dogolik, hit meke yi meke ti meke horlugunem hinakla weak ageidek hinakla arleken akhekhe lagagip iti.

³⁵Halok he, alep weak hagathinakho korlek hinakla pugat welagagip meke iti kobokhogon thogotdigidek, yogotak ya itithogonat dogogun halok, oko kok meke wokhisagein iti nen, hinobatnerogon hago dogono o.

³⁶Hit nen Allah akla warlok apekherek meke hagakhunem, at nen, “Hit wokhisagein,” iluk abok yokhisasikhe meke iti waganubageik nen, hinobakhanini hapugutdiluk hagakhe dogosak o.

³⁷Allah ane baga yigithogon holal waganek werek, “At wisigin meke iti il opaki dogoluk nen wisigin. Erapigat dogoluk nen wisigin dek o. Ibat-ibarat wisigin o.

³⁸ At wisigin iti, aban wageidek werek korlek, it an na'buri wene inoba korogo an ninom hunogo 'bisigi meke inebe tomok, inetaiken noba hakotdiluk dogogun oba iniluk dogogun. Meke re, akhuni aperek inapuke dukhugun meke inebe tomok, it an noba hotokthek dek. Na'irat o,” iluk isikhemo holal waganogo 'bisukha.

³⁹Itithogonat meke re, nit he, it akhuni aperek alomatlasuogoluk inapuke dukhugun meke iti hakene welago 'buk. Dek o. Nit he, ninebe tilninabuagaluk ninetaiken at oba hakotdiluk welago meke welago o.