Read Mid Grand Valley Dani Ibrani 2 Bible Online

Ibrani 2 - Mid Grand Valley Dani bible

Ibrani 2

¹Iti nenat, akhuni ku baga lagunem i nen wogosik lagarek iti hak, nit nen ebe wene iti here'umo werlekmake woknisik launogo iluk, wene ninasuk holhugu meke iti ninobatnerogon herogo dogouok o.

²Wene iti, nit ninopa lak yogeisoagaluk, Allah nen it malaikat inayoko 'biluk la'isa ageikhemo yogeisasukha meke eberogonat hagatlageikhe. Nen, it aperek wene iti hologo mothogon hagakhidek meke, inebe tomok wene mothogonat inoba 'biluk weagarinakhe lageikhe iti.

³Iti hak, nit yogotak tilninabusak wene kok iti ninobakhanini here'isagun halok, weagatninabiginat o. Ebekeram he, wene at ninoe Etagapogot ebe nenat akhuni aperek yogeisasikhemo inasuk hokhukha meke nen hutukhogon yoknisasukha meke eberogonat hagatlageikhe.

⁴Wene iti pakhogon yogeisilik nukhunem, it akhuni aperek nen, “Wene iti eberogonat,” iluk hutduagaluk, Allah nen inane legerogo yi meke ti meke hagasusak dek meke elalin obatnerogon hagakhik, at akla warlok meke tak-tagat inobabut tomok Agoreke supusogo wogeisigik, hagakhikhe meke iti, nit nen ninobakhanini here'isagun halok he, here'inanigin apegep a? Weagatninabiginat o.

⁵Nit nen, “Yabokane agat ket meke baga dogogun,” iluk ekhe lago iti dogolik, Allah nen it malaikat meke inane hologo dogoagaluk kok meldisasikhe 'buk. Dek o.

⁶Wene akhuni inobasik Allah ane baga ap ageikhe nen holal yigithogon waganhikhemo werek, “Eiye! Allah nopase. Nit ninebe akhuni meke itaklagagu mekeat, hat nen ninoba eberek welageik, helokhoma 'binanhik, hagakhetek iti nikithogon nen.

⁷Iniki pererlagat oba elanma hasik it malaikat meke inetagawerek koktek hakene werek korlek, nit ninetaga dek erlok dek negen hagarogo 'binanhigin mekeat he,

⁸ yi meke ti meke tha'bokhogonat nit ninane hologo dogolik, hogotninakhik, ninalonetninakhik, hagakhe dogoagaluk meldinanhigin iti,” iluk holal waganogo 'bisukha. Yi meke ti meke aperek usa'isigidek tha'bokhogonat nit ninane hologo dogoagaluk isikhe mekeat, yogotak yi meke ti meke tha'bokhogonat ninane holhidek aban werek hekhe lago.

⁹Mekeat he, at Yesus anek he, arat kok meldisikhemo werek hekhe lago. Allah obabut hano nen, Yesus akhuni tha'bokhogonat inobasik watlasuagaluk malaikat inetagawerek kok negen werek korlek, at etaga dek erlok dek negen hagarogo 'bisikhemo, ebe yi aik ti aik hilik hilik watlageikhe iti baga, Allah nen at etagawerek kok meldisikhemo werek iti.

¹⁰At Allah iti, yi meke ti meke at ekaerek hasik, ekaerek nenat walhasikhe meke nen, akhuni at a'buri doalegat hogorinakhe dogogunmo wogosik loagaluk, holak waganherek meke Yesus at o. At nenat akhuni erlok inebe tilinabiluk wogosik laga dogoagaluk, yi aik ti aik hilik hilik watlasuagaluk apasikhe iti, erlok apausak meke iti tak-tagat apasikhe.

¹¹Yesus ebe, it akhuni weak hagakharek meke horinakherek meke iti inom, it akhuni arat horinakhikhe meke inom, inom dapukhogon inopase opakiat. Iti nen, at Yesus ekarli degat, “It akhuni iti an nagarlak lak nerugi,” iluk ekherek iti.

¹² At Yesus nen Allah yogokhe dogolik, “An nen, hat hebe nagarlak lak nerugi yakulisigik, ha'buri natogokharek meke emenogo inakla dogolik, hogothakhik, hagakhe dogogin o,” iluk yogokhikhesik nen,

¹³ ageikhe inom ap ageikhe yogokhe dogolik, “An netaiken Allah oba hakotdiluk dogogin o,” iluk yogokhikhesik nen, “Allah nen na'buri woknikhikhe meke emenogo ninom welago yi 'bikhan,” iluk yogokhikhe.

¹⁴At nen, “Akhuni iti an na'buri,” iluk isikhe iti, nit akhuni watlagorek meke ninobasik isikhe iti nen, at ebe watlaga dogolik, nit akhuni watlagorek meke erlo at Iblis iki baga welagarek meke iti, at Yesus nen at Iblis ebe obatne degetdisigik,

¹⁵nit akhuni ninebe itaklagorethek niniluk dogolik, watlasusak ninayuk nen niniki herle warek negen welagagu meke hisalogo 'binanhik, hagasigiluk, nit watlagorek meke ninobabut waganogo watlageikhe iti.

¹⁶Itithogon hagakhikhe iti, eberogonat malaikat meke elokhoma 'bisalok akmurinakhikhe 'buk. Dek o. Allah ane baga holal waganek werek tak-tagat, nit ap Abraham nen itago meke yi elokhoma 'binaniluk, ninebe akmutninakhikhe iti.

¹⁷Itithogon hagakhikhe iti, yigithogon iluk. Nit akhuni weak hagakhorek meke, at nen degetdisagaluk, at ebe Allah iteerek kok dogolik, obabut Allah hasik hupukhogon hagakhik, nit akhuni akmutninakhik, erlogat hagakhe dogeigiluk, at ebe nit akhuni agarlak lak erugi hakeneat atluk, nit hagakhorek meke tha'bokhogonat ninobabut waganusak mekeat waganhikhe iti.

¹⁸Itithogon waganhikhesikmo, at weak hagasuagaluk akla kagalhunem, yi aik ti aik arat hasikhesikmo nogo nen, nit akhuni weak hagasuagaluk ninakla kagaligiluk wagunem, at nen erlogat yomaknisausak werek o.