Read Mid Grand Valley Dani Ibrani 5 Bible Online

Ibrani 5 - Mid Grand Valley Dani bible

Ibrani 5

¹It ap Allah iteerek inougi koktek inebe tomok iti, akhuni Allah a'buri nen, ap it meke ageikhe Allah hasik hagakhe dogolik, it meke yi meke ti meke 'bisinem, Allah wogokhik, weak hagakharek meke hasik inako wolok wagunem, warikhik, hagakhe dogoagaluk wenago meldisegarek.

²Itithogon meldisugunem, it inobatne dek erlok dek mekeat emenogo nen, it akhuni aperek itithogonat wene inokodek dogolik nil-hilhogon hagakharek iti, hutdiluk nen, inebe inakmurinabiluk it inobasik inoba enagorogon erlogat hagakharek iti.

³It inekaerek nen weak hagakharethek nogo nen, it akhuni aperek weak hagakharek meke hasik inako horlalok wagunem, it nen Allah warekharek iti hak, itithogonat it inekaerek hasik inako Allah warisusak tak-tagat warekharek iti.

⁴It itithogon hagakhe dogouogoluk, “An nebe Allah iteerek kok dogogin,” iluk inekaerek nen meldakhegarek dek. At Allah nenat, ap Harun ayoko 'bisikhemo meldisukha iti hagat, Allah nen inayoko 'bisi halogat meldisegarek.

⁵ At Kristus itithogonat, “An Allah iteerek kok dogogin,” iluk ekaerek nen wenago meldakhigidek. At Allah nenat wenago meldisikhesik wene men yogokhikhe, “Hat an na'but o. Hebe yogotak itakhakhi o,” iluk yogokhikhe iti.

⁶ Nen, ageikhe re, Allah ane holal waganek ageikhe baga yigithogon isikhemo weregat, “Ap Melkisedek an Allah iteerek kok welageikhe iti hak, hat an iteerek kok motok-motok dogonogoluk meldagagi o,” iluk yogokhikhemo holal waganek werek.

⁷At Yesus ebe agat oba yoma werekma watlasunogo iluk, Allah nen erlogat tilusak iti nen, de aga dogolik, ane kogat Allah etaga palogo ayoko 'bigik, kino yogokhik, hagakhe dogolik, opase ane ayukhogon hologo welageikhe iti nen, Allah nen ane asuk holhikhe.

⁸Itithogon yogokhikhe iti, at Yesus Allah ebe a'but mekeat he, Allah ane hologo hagasusak meke hasik yi aik ti aik hekhe dogolik yakulhikhe iti.

⁹Itithogon yakulhe dogolik, ilugun arat kobokhogon hagakhikhemo, nit at ane hologo dogogun meke ninebe tha'bokhogonat niniluk motok-motok dogoagaluk at ebe tilninakhikhe meke erlo arat hagarogo 'bisikhe iti.

¹⁰Itithogon hagarogo 'bisikhesik, at nen, “At Melkisedek hagakhe lageikhe iti hak, hat hebe an iteerek kok dogono,” iluk meldisikhe iti.

¹¹Wene iti hasik, nit nen hit yokhisausak meke doalegat werek mekeat he, hit hinobabut, wene ibat hutdusak erlok dek iti nen, nit nen hutukhogon yakulhisausak erlok dek negen o.

¹²Hit he, Allah ane alebat yakulhigisipmo, hit nen it akhuni aperek yakulisausak erlok mekeat he, erlok dek iti nen, wene ebekeram yakulharek meke iti, it akhuni apurukhugi inoba yakulusak o. It yekerugi hipiri a'bet meke nausak erlok dek nen, inagosa lak irlak apusu anek nasi welageikharek iti hak, hit he, wene horle meke yakulusak erlok dek nen, wene alep meke yakulisegarek meke iti meke anek yakulhe dogosak hinobabut hisekhe lagei o.

¹³Yekerugi inagosa lak irlak apusu anek nekarek iti, inebe yekerugiatma, wene yi hano, yi weak, iluk penasusak inokodek welageikharek iti.

¹⁴Meke re, it inarluetek anek he, inetaiken horle atlukmo nogo nen, wene yi weak, yi hano, iluk penasusak inilu nogo nen, hipiri a'bet meke it inapiri o.