Read Mid Grand Valley Dani Ibrani 9 Bible Online

Ibrani 9 - Mid Grand Valley Dani bible

Ibrani 9

¹Alebageik Allah nen wene warogo a'buri woginakhikhe wene iti tak-tak, it nen at akla hanorogo hagakhe dogoagaluk yakulisasikhemo, “Yigithogon hagakhe dogosak, tigithogon hagakhe dogosak,” iluk wene inilu welagoukha. Nen, o su ai meke elanma hasik hagakhe dogosak oba akhuni nen halhukhama welageikheat.

²O iti kakok palek thukhamke etaga, o kakok palek usama u hak, Allah ai halek ekhe lagoukha. Etoma isagal yibakharek meke inom, o meja perlago hipiri Allah hasik 'bisegarekma inom, welageikhe.

³Nen, o kakok palek itikmoke su baga hurli palek iti etaga, o kakok palek motok ebe usama u hak, Allah ekaerek ai ekhe lagoukha.

⁴O etoma apusu obasi hano meke Allah hunekhe lagoukhama emas meke hagarek inom, peti Allah ninom hunik welago iluk oado tha'bokhogonat emas meke laberek inom, welageikhe. Peti iti akla, manna neke lagoukha meke isoak emas meke akla ukharlek iti inom, ap Harun athegerluk aku dukhisi lageikhe meke iti inom, wene Allah nen ninasuk wakhikhe wene holal helekit oba waganek iti inom, welageikhe.

⁵Peti iti apot oba it malaikat hakene inebe pere, ina'bikha werek meme Allah ebe werek iluk alino hagarogo 'bisukha meke welagoukha. It iti, akhuni weak hagakharek meke Allah nen thagalogo degetdisalok, at inom hano dapulogo 'bisekhe lageikhe baga, ina'bikha nen thebelogo 'biluk welagoukha. Itithogon welagoukha mekeat he, wene iti tha'bokhogonat hasik yogotak ya opakitek-opakitek pilin-palinhogon usak erlok dek o.

⁶Yi meke ti meke tha'bokhogonat iti obolukmo tomok karelek werekma, it ap Allah iteerek meke inebe tha'bokhogonat hibiku-yogoku Allah akla hanorogo hagasuogoluk o kakok palek thukhamke iti ukekhe lagoukha.

⁷Itithogon ukekhe lagoukha mekeat he, o kakok palek itikmoke meke iti anek, ap Allah iteerek inoe kok meke iti anek ekaerek weak hagakhe lageikhe meke hasik inom, a'buri akhuni Israel meke inobabut hebelek dek nil-hilhek oba weak hagakhe lagoukha meke hasik inom, inako warogo amep wolok, Allah wogosigiluk tahun ebe wago tomok iki opaki hasik ukekhe lageikhe.

⁸Itithogon hagakhe dogosak iluk wene inasuk warek welageikhe iti oba lisogon, nit hutukhogon hutduagaluk Allah Agoreke nen, men yakulnisekherek, “O kakok thukhamke iti werek korlek, Allah ekaerek ai ebe meke thu hualhidek larek welageikhe,” iluk yakulnisiliogo.

⁹Wene iti, ebe o yogotak hagatlariogo meke hasik alino hagarek welageikhe. Wene alino hagarek meke iti tak-tagat hagakhe dogoagaluk, hipiri inom, i inom, yigithogon neke dogolik, yi meke ti meke oba yigithogon horekhe dogosak, iluk Allah nen yakulisasikhe meke tak-tagat hagakhe dogolik, inako Allah warekhe lagoukha iti, Allah nen wene ket ebe meke aban hagakhidek werek korlek, agat oba yoma elanma hasik dogolik, alino waganogo hagakhe lagoukha iti nen, wene inoba dek iluk inakla 'bogokhogon thelegetdusak erlok dek welageikhe.

¹⁰

¹¹It itithogon hagakhe lagoukha meke Allah nen he, “Yi meke ti meke yabokane itithogon hano hagatlasigin,” iluk abok isikhe iti hasik, at Yesus Allah iteerek inoe kok ebe wageikhe iti. Itithogon wageikhesik, it alep yi meke ti meke Allah nen walhasikhe meke kigilogo o halhukhama iti ukisikhe 'buk. Dek o. At he, o ebe meke kok hano halekma iki opaki hasik ukisikhesik, o hurli palek thukhamke thogotdiluk piokhogon o kakok palek itikmoke motok ebe usama iluk u hak, Allah ekaerek ai etoma ukisikhe. Itithogon ukisikhe iti, kambing inom, sapi inom, amep wolok ukisikhe 'buk. Dek o. Nit herle warek hakene werekma hisalek motok dogoagaluk, ninoko motok-motok palogo watlageikhesik, ekaerek amep wolok etoma ukisikhesik, nit ninobasik werek o.

¹²

¹³Nen, it akhuni alebageik hagakhe lagoukha iti baga hagakhe dogolik, akhuni nen usa meke iniki hakhalok, inoba thuesi baga korinakharek iti hak, it ap Yahudi meke nen usa meke iniki hakhausak dek meke hakhasi halok, hano asuagaluk kambing amep inom, sapi amep inom, sapi ebe warogo Allah hasik hetu hunekharek meke oak hetu nalok, wul agarek meke inom, waganogo inoado itikmanke meke hasik horinakhe lagoukha iti.

¹⁴It inoado itikmanke meke hasik sapi amep erlok dek meke baga erlok hano horinakhe lagoukha. Halok he, nit Kristus amep kok meke baga, “Wene hinoba dek,” iluk ninakla thelekhogon erlok motok 'binanherek o. Nit Allah iluk welagarek meke akla hanorogo hagakhe dogoagaluk, domba isi hano meke Allah warekhe lagoukha iti hak, at Kristus Allah Agoreke ikhok motok welagarek meke obatne baga, watlaga dogolik, ebe Allah wogokhikhe iti baga, nit alebat dek asigin meke we yugunat hagakhe lagagu meke, at nen, “Wene hinoba dek,” iluk, at amep oba ninakla thelekhogon 'binanhikhemo welago.

¹⁵Iti halok he, wene warogo alebageik wokninakhikhe meke iti baga dogolik, nit ninasuk warek dek weak hagakhe lagagu iti baga ninebe herle warek hakene welagagu meke. Itithogon werekma, at Allah nen Kristus watlageikhe iti baga herle hialninakhikhesik, nit at nen wanisasikhe meke ninom hundiluk, hano ikhok motok dogogin meke woknisagaluk, wene ket meke warogo wokninabiluk, Kristus ebe turlem heisogo meldisikhe.

¹⁶Ap ageikhe nen, “An niki 'biluk itithogon supusogo wogeisano,” iluk ekherek meke ebe iluk werek korlek, iki 'biluk horlegarek dek. Meke re, at ebe watlaga halogat, “At arat watlaga,” iluk thelekma isi halok, iki 'biluk horlegarek o.

¹⁷

¹⁸Itithogon hagakho halok, iniki 'biluk horlegarek iti hak, Allah nen wene alebageik meke woginakhikhe iti, mep warogo nenat aik obaat tetnokhogon isikhe.

¹⁹Allah nen, “Yigithogon hagasusak, tigithogon hagasusak,” iluk ninasuk wakhikhe wene iti tha'bokhogonat, at Musa nen it akhuni Israel meke yogeisasikhesik nen, yabokane sapi amep inom, kambing amep inom, i inom dapukhogon 'biluk nen, domba isi elokhoken mep hakene meke thukhat ilugun oba horlokhogon 'biluk, musan eka mep wakharek iti hak, mep warogo Allah nen wene ninasuk wakhikhe wene holal waganek iti baga watdigik, akhuni Israel meke inobake hisathigik, watdisigik, hagakhikhe.

²⁰ Itithogon watdisekhe dogolik, men yogeisasikhe, “Wene Allah nen ninasuk wakhe meke tak-takhogon hagakhe dogoagaluk, at nen, Hit wene arat warogo wokhinakhi, iluk mep watdinageikhe yi o,” iluk yogeisasikhe.

²¹Itithogon yogeisasikhesik nen, Allah ai su meke halek iti inom, yi meke ti meke Allah aila etoma at hasik hagakhe lagoukha meke tha'bokhogonat inom, obake mep warik lageikhe.

²²Allah nen wene ninasuk wakhikhe meke iti tak-tagat hagakhe dogolik, yi meke ti meke tha'bokhogonat hakene mep oba anek hokharethekma nogo nen, mep ulakhidek halok he, nit akhuni weak hagakhorek meke thagalogo degetdsausak erlok dek iti nen, mep wakhikhe iti o.

²³Agat oba yi meke ti meke tha'bokhogonat hosusak meke hokhe lagoukha iti, ebe pogot oba werek meke oba lisogon hagakhe lagoukha. Mekeat he, ebe meke pogot oba meke iti, kambing sapi iti meke warogo amep oba hosusak erlok dek iti nen,

²⁴at Kristus o Allah ekaerek ai iluk akhuni nen oba lisogon halhukhama iti ukisikhe 'buk. Dek o. At he, pogot ebe baga ukisikhesik Allah werekma etoma nit ninobasik werek o.

²⁵It ap Yahudi meke Allah iteerek inoe kok Allah aila iti ukekhe dogolik, ekaerek amep wolok ukisi lageikhe 'buk. Dek o. Sapi inom, kambing inom, amep wolok yi tahun ti tahun hagakhe korlek tahun ebe tomok iki opaki hasik anek ukisi lageikhe mekeat, at Kristus anek he, ekaerek amep wolok iki eran-alep ukigidek. Iki opaki hasigat ukisikhe iti.

²⁶At nen he, it alep hagakhe lagoukha iti hak hagatlepma re, agat walhasikhe hurli nen lok-logat nit yogotak ya hurli, yi aik ti aik hekhe dogolik iki eran-alebat watlaga dogolep. Itithogon mekeat he, o ilugun oba nit weak hagakhorek meke degetdisagaluk iki opaki hasigat kambing sapi Allah waresu hak, ekaerek ebe watlasi ageikhe iti.

²⁷Nit akhuni opaki hasigat watlatlukmo nen, yabokane wene ninoba 'bigik, kokhik, hagasigin iluk, at Allah nenat isikhe iti hak,

²⁸at Kristus meneke nit akhuni weak hagakhorek meke degetdisagaluk iki opaki hasigat kambing sapi Allah warekhe lagoukha iti hak, at ebe watlageikhesik, yabokane wisigin iti, nit weak hagakhorek meke degetdisagaluk wisigin 'buk. Dek o. Nit akhuni, at wagunem elokhoma therogo welagorek meke hanotninabigiluk wisigin o.