Read Mid Grand Valley Dani Yakobus 1 Bible Online

Yakobus 1 - Mid Grand Valley Dani bible

Yakobus 1

¹An Yakobus ninopase Allah ninoe Etagapogot Yesus Kristus ipisak inatuaneke etnogo nen, wene yi hit hinukuloak etaga 12 oba nen yi ai ti ai thirlik-pirlikhogon lalok welagathep meke tha'bokhogonat hinoba la'i agei. Nagarlak lak nerugi.

²Nagarlak lak nerugi. Yi akin ti akin hinoba agunem hinakla arleken akhekhe dogono o.

³Itithogonat hinoba agunem, Allah nen he, “Inetaiken an noba hakotdiluk werek a? Dek a,” iluk, hinobabut paliogo iti baga hinetaiken thebekhogon hinobakhanini hapukhogon dogosak meke hagathinabiogo iti hinilu o.

⁴Hinetaiken aban negen ageikhe welageidek tha'bokhogonat erlogat horle asuagaluk hinakla puk ageidek hinetaiken hapukhogon dogono o.

⁵Meke re, at Allah obabut hano nen akhuni tha'bokhogonat akmu dogolik wenageisigidek wogeisekherek iti nen, hit aperek hinakla kagalek dek halok, at kino yogosumo hinakla kagaliginat o.

⁶Akhuni aperek nen he, “Allah nen woknisigin a? Dek a,” iluk, wene munini ebekhe dogolik kino yogokharek meke iti, hisakne nen i hoklabu thabulik-pabulikhogon hagakherek iti hak yogokharek iti nen, hit itithogon kino yogosugun halok he, “Woknisigin a? Dek a,” iluk, wene munini ebekhidek hinetaiken Allah oba hakotdiluk nen kino yogokhe dogono o.

⁷Akhuni itithogon kino yogokharek meke iti, inetaiken pere dogolik yi meke ti meke hagasuogoluk, “An itithogon hagasigin,” iluk dopokhogon usak erlok dek iti nen, “Ninoe Etagapogot nen ageikhe woknisiginat,” iluk apausak erlok dek o.

⁹Hit Allah a'buri hinameke dek meke aperek inapma dogolik, “An Allah nen kogotdanhemo welagei o,” iluk hinakla arleken akhausak o.

¹⁰Meke re, mo aninirogon yakhe dogolik, o eka tha'bet ageik, eken lologo usalok elokhoken weak ageik, hagatlagarek hak, itithogonat, it koktek inameke doalegat meke iti yi meke ti meke aban hagakho werekma inebe dek asugun meke werek iti nen he, hit aperek hinameke doalegat hinebe kogat dogolik, o eken lologo usekherek iti hak, “An nameke doalegat yi dek asiginat o. Allah nen netaga thebelogo 'banhemo welagei,” iluk, hinakla arleken akhausagat o.

¹²Hit aperek yi akin ti akin hinoba aga korlek, hinobakhanini hapugutdiluk dogogun halok, hinakla arleken akhekhe dogono o. Itithogon hinobakhanini hapugutdiluk dogogun halok, Allah nen he, “An nebe hinakmu meke hiniluk motok dogogun meke wokhisagein o,” iluk, abok yoknisasikhe etnogo hit hinobabut palogo nenat wokhisagein o.

¹³At Allah weak hagasuagaluk akhuni nen akla kagalharek dek. Nen, at nen meneke, akhuni aperek weak hagasuagaluk inakla kagalherek degat iti nen he, hit aperek hinakla nen, “An weak hagasuagaluk Allah nenat nakla kagaliogo,” iluk apausak erlok dek o.

¹⁴Itithogon mekeat he, ninebe tomok ninekaerek ninakla nen, yi meke ti meke warlok weak apogorek iti nenat ninebe wokninakhik, litnisigik, hagakhe dogolik, ninakla kagalherek iti o.

¹⁵Yabokane ninakla nen yi meke ti meke warlok weak apogorek meke iti, humi nen ineagei itaginakharek hak, ninakla aga halok, eak itago weak hagakhorek iti. Nen, weak hagakhorek meke iti horle aga halok he, eak itago ninebe watlagorek iti.

¹⁶Nagarlak lak nerugi. Hinebe nakmu o. Hinekaerek nen nukhetdakhaunogo iluk yokhisigi iti o.

¹⁷Ninopase Allah pogot oba meke etnogo nenat yi meke ti meke hano meke woknisigik, hano motok meke woknisigik, usaknisa agarek iti. At nenat pogot obake lia welagarek meke iti winametdisikhesik nen, at ebe ninat hagatlageik, abel dagakhogon mum ageik, lia ageik, hagakherek dek.

¹⁸Yi meke ti meke winametdisikhe meke tha'bokhogonat makusanegen nirat dogoagaluk, at ekaerek akla apalok ane ebe wene iti bagaat itakninakhikhemo welago.

¹⁹Nagarlak lak nerugi.Hinebe nakmu lak o. Wene yi hinakla eberek dogono o. Hinebe tomok wene hinasuk ibat ibat holiluk nen, hinane baga nen erogat igik, hinakla aga dagei agunem hinetaiken thebelogo dogoluk nen erogat igik, hagakhe dogono o.

²⁰Akhuni inakla aga weak hagakharek meke iti, Allah akla warlok apekherek meke hagakharek dek.

²¹Iti nenat, yi weak ti weak hinekarli dek hagarik nekhethep meke iti here'isigik, weak kogat hagarik nekhe lagap meke iti here'isigik, hagakhe dogono o. Wene hano wene Allah nen hinakla ai yago 'bisikhe meke iti baga erlok tilhinabusak iti nen, hinetaiken thebekhogon at apma ukiluk, at nen wene hinakla kagaliogo meke iti waganhe dogono o.

²²Wene Allah ane iti hinasuk anek holiluk huk asumo nen, hinekaerek nen nukhetdakhagun iti nen, hinasuk holiluk, hutukhogon hagakhe dogono o.

²³Akhuni aperek wene Allah ane iti inasuk anek holiluk, wene iti mothogon hagakhidek halok, akhuni inelokhogen inamukhak oba lakhalok inebe werlekmake lalok, “Nebe itigirlik higi,” iluk eberek welageidek ibat ibat obarlikma agarek iti hakeneat o.

²⁵Nit akhuni herle warek negen werekma, wene hano wene Allah nen ninasuk warogo 'bogokhogon yoknisekherek iti baga hialninakherek. Halok he, tha nen wene iti asuk anek holiluk nen, obarlikmatdekherek 'buk. Hutukhogon hutdiluk, oba eberek motok dogolik, wene iti mothogon hagakhe halok, yi meke ti meke hagakhunem, Allah nen akla arlekenhogon yomakhekhe dogogin o.

²⁶Nen, tha nen, “An Allah apma dogolik mothogon hagakhe lagei,” iluk apekhe dogoligat, ane ilugun oba yugunat ekherek halok kuda ape herle wakherek iti hak, at itithogonat ape hanorogo therogo welageidek halok ekaerek nen nukhetdakhekhe dogolik, “Allah akla hanorogon hagakhe lagei,” iluk ekherek thalek, we wirlidikhogonat hagariogo o.

²⁷Ninopase Allah nen, “Akhuni nen an nakla hanorogo mot hano motok hagakhe dogosak he, yigithogon. Yekerugi irlagakot meke inom, humi thoge meke inom, nuk atluk werekma yomageisigik, akhuni agat oba weak hagariogei meke iti inobabut waganhidek inekaerek nen kareligik, hagakhe dogosak o,” iluk akla apekherek iti o.