Read Mid Grand Valley Dani Yakobus 2 Bible Online

Yakobus 2 - Mid Grand Valley Dani bible

Yakobus 2

¹Nagarlak lak nerugi. Hinetaiken ninoe Etagapogot Yesus Kristus hogorakharek meke etnogo oba hakotdiluk dogolik, akhuni inoado itikmanke anek hinileken hisalok nen, aperek hinelokhoma 'bisigik, aperek hinoporlike 'bisigik, hagakhe dogogup o.

²Hinebe sembayan uogoluk natogorlek werekma, ap ageikhe iki ekaka baga emas meke ikhik, asu hano meke ikhik, hagatdiluk nen hinoba uki ageik, nen, ap ageikhe ameke dek meke asu weak meke ikhogo uki ageik, hagakha halok he,

³hit nen at asu hano ugu ukisigin meke iti yogokhe dogolik, “Noe. Hebe o perlagoma hanoma ya hurek lasi me o,” iluk yogokhik, nen, at ameke dek meke etnogo yogokhe dogolik, “Nagot o. Hat eta metek dogogin a? Nisok 'bigima agat oba yoma hurek lasisigin a,” iluk yogokhik, hagakhe lagap halok he,

⁴hit hinobabut motok weak hagakhe dogolik, hit-hit, “At iti kok. Nen, at iti erlok dek,” iluk penago 'bisekhe lagap iti.

⁵Nagarlak lak nerugi. Hinebe nakmu lak o. An wene igin meke yi hinasuk holini. It akhuni agat oba inameke dek meke iti, Allah nenat wenageinakhe dogolik, “Inameke doalegat dogou hak, inetaiken an noba hakotdiluk dogoak o. Nen, it an nebe inakmu meke, o an nen napma 'bisugunem dogogunmo etoma iteerek asugun iluk abok yogeisasigi meke iti, irat iteerek asugun o,” iluk wenageinakhikhe.

⁶Itithogon wenageinakhikhe mekeat he, hit nen it inameke dek meke hinakla meanetdisekhe lagap iti. Meke re, thani nen hit hinebe weagathinakhik, pemerintah meke nen hinitema waganuagaluk wokhisik lageik hagariogei nogo. It akhuni inameke doalegat meke iti nenat itithogon hagathinabiogei apigi.

⁷Nen, ninoe Etagapogot etaga hano liliogo meke etnogo etaga palogo ebe iteerek agagip meke iti, it inameke doalegat meke iti nenat, at etaga weagatdiliogei apigi o.

⁸ Meke re, hit nen mothogon hagakhe dogosak meke yi. Allah nen ninasuk wakhe dogolik wene kok, men isikhe, “Hit hinekaerek hinebe hinakmurogon welagathep iti hak, it akhuni aperek hinom welagap meke iti hinakmurogon dogono,” iluk isikhemo, holal waganhukha meke werek iti tak-tagat hagakhe dogogun halok, mothogon hano hagakhe dogogun o.

⁹Itithogon mekeat he, hit nen akhuni inoado itikmanke anek hinileken hisalok aperek hinelokhoma, bisigik, aperek hinoporlike 'bisigik, hagakhe lagap iti weagat hagakhe lagap o. Allah nen ninasuk wakhikhe wene etnogo thebelogo here'isalok weak hagakhe lagap iluk, wene iti bagaat ukum hinoba werek o.

¹⁰Hit aperek wene Allah nen ninasuk wakhikhe wene etnogo tha'bokhogonat herogo dogoligat, opakiat ageikhe thagalogo usa'egep halok he, “Wene iti tha'bokhogonat thagalogo usa'egebat o,” iluk eberogonat ukum hinoba agama werek o.

¹¹ Allah nenat, “Humi param ha'isugup,” iluk isikhe. Nen ageikhe, “Akhuni inakhup,” iluk, at nenat isikhe. Halok he, hat ageikhe nen, humi param ha'isigidek dogoligat he, akhuni inebe inakhen halok he, Allah ane thagalogo usa'egenat o.

¹²Ninebe niniki herle warek negen werekma, Allah ane iti bagaat hisalogo 'binanherek iti. Wene iti bagaat ninitema waganigin o, iluk, hinane mothogon igik, hiniki nen mothogon hagakhik, hagakhe dogono o.

¹³Hit nen he, akhuni hinakmurinakhidek halok he, Allah nen akmuthinakhidek, wene hinoba 'biginat o. Meke re, akhuni aperek inakmurogon welageikharek meke iti Allah nen initema waganhe dogolik wene inoba 'bisagein dek o.

¹⁴Nagarlak lak nerugi. Hat ageikhe tha nen, “Netaiken Allah oba hakotdiluk welagei o,” iluk ekhe dogoligat he, hiki baga nen akhuni aperek yomageisigidek halok he, hane anek, “Netaiken Allah oba hakotdiluk welagei,” iluk ekhe lagan iti baga ageikhe hagatlasigin nogo a? We yugunat ekhe lagan o. Nen, hetaiken anek itithogon hakotdiluk dogoumo, iti baga erlok tilhabigin nogo a? Erlok dek o.

¹⁵Hagarlak a? Heru a, Allah a'buri meke aperek inasu ugu dogosak meke inom, inapiri neke dogosak meke inom, dek nen werekma,

¹⁶hat nen at ebe hasik yomakhigidek dogoligat he, hane baga nen anek, “Nagarlak o. Hoba agaken thok-thok hipiri ha'ithogonat hakla arleken akhilik lan o,” iluk egen halok he, ageikhe hagatlasusak nogo? We yugunat o.

¹⁷Iti hagat, nit niniki baga nen yomageisigidek dogolik, “Ninetaiken Allah oba hakotdiluk welago,” iluk, iti anek ogorek halok, warek hakene dogolik we yugunat ogorek o.

¹⁸It aperek nen itithogon isinem men usak, “Hat nen he, Netaiken Allah oba hakotdiluk welagei ekhe lagan iti. Nen, an nen niki baga nen yomageisekhe lagei iti. Halok he, hat hiki nen yomageisigidek dogolik, hetaiken anek Allah oba hakotdiluk welagei iluk ekhe lagan iti, ebe ki? Inugutnean ta. An anek he, Netaiken Allah oba hakotdigirik welagei, iluk, niki baga nen, yomageisekhe lagei meke ekagat werek iti, inugutheageinat o,” iluk yogeisausak o.

¹⁹Hat ageikhe nen he, “At Allah ebe opakiat,” iluk eberogonat apekhe lagan iti hanoat mekeat he, Iblis agarumi inobabut weak meke inom nen, iti hagat eberogonat apekhe dogolik, ebe inayuk nen arlik halharegat o.

²⁰Hat hebe kepu negen ekhe lagan iti re! Allah eberogonat iluk iti meke anek apekhe dogolik, hiki baga yomageisigidek halok, we yugunat apekhe lagan iluk ekagat hutdinogoluk wene yi yokhisik.

²¹Ninopase Abraham nen ekaerek a'but Ishak ebe wolok lageihesik nen, helekit perlago 'biluk Allah ako warekhe lagoukha hak, warisigiluk hagakhikhe iti nenat, at Allah nen he, “Wene hoba meke korogo wokhigirik hapuke nipisak hunogo 'bagagi o,” iluk yogokhikhe apigi.

²²At etaiken Allah oba hakotdigik, iki baga nen hagakhik, ipisak dapukhogonat hagakhikhe iti o. Iki baga nen hagakhikhe iti baga etaiken Allah oba 'bogokhogon hakotdisikhe iluk, hat nen hutdusagat o.

²³ Itithogon hagakhikhe iti baga nen wene men iluk holal waganogo 'bisukha meke iti ebeat hagatlageikhe, “Abraham etaiken Allah oba hakotdisikhemo, at Allah nen he, Hat hobabut mot hagakhe dogou hak, hetaiken noba hakotdegenma, wene hoba meke korogo wokhigirik hapuke nipisak hunogo 'bagagi itiat o,” iluk yogokhikhemo hola waganogo 'bisukha. Iti nen he, Allah nen, “Abraham nipisak hunigat welago,” iluk isikhe iti o.

²⁴Iti hakene, Allah eberogonat iluk iti anek apaumo re, Allah nen, “Wene hoba meke korogo wokhigirik hapuke nipisak hunogo 'bagagi o,” iluk yogeisekherek dek higi. Itithogon apekhe dogolik, niniki baga nen inomat hagakhunem iti baga nen anek he, itithogon yogeisekherek iti 'bikhani!

²⁵Iti hakeneat he, he Rahab yugunisake hagakhe lageikhe meke iti nen, akhuni Israel meke nen inileken waganuagaluk la'isa agoukha meke emenogo wagoukhama limago woginakhikhesik nen, yabokane holal werlekmake oalogo ula'isasikhe iti. Itithogon hagakhikhe iti baga nen, Allah nen, “Wene hoba meke korogo wokhigirik hapuke nipisak hunogo 'bagagi o,” iluk yogokhikheat iti.

²⁶Ninebe ninagoreke dukhisinem watlagorek iti hak, ninakla nen, “Allah eberogonat,” iluk apekhe dogoigat, niniki baga nen ageikhe hagakhidek halok he, warek hakene dogolik, wen yugunat apekhe lago o.