Read Mid Grand Valley Dani Yakobus 5 Bible Online

Yakobus 5 - Mid Grand Valley Dani bible

Yakobus 5

¹Hit ap koktek meke nagarlak lak. Yabokane Allah nen weagathinakhunem yi aik ti aik hekhe dogogun iti nen, di ago de ago dogobageik iluk yokhisigi iti hinasuk holino o.

²Hinameke yi meke ti meke doalegat iti hirli ageik, hinasu doalegat etoma warlo nen dobak nikik,

³hit meke emas inom, perak inom, ikuru hakhigik, hagatlagasik holik werek iti re! Hinebe o ilugun oba dogoligat he, yi meke ti meke hinekaerek hasik hulogo 'bakhalok welagap iti nen, yabokane Allah nen wene hinoba 'bisinem, ikuru hago iti nenat, “It inobabut itigirlik,” iluk ekagat thelekmatdisinem yi meke ti meke hetu nen nekerek iti hak, hinebe ikuru hago iti nenat weagathinabigin o.

⁴Hinagarumi hineram nenat gandum eken palhisoagaluk inayoko 'begepma paliogei mekeat he, oko wogeisigidegat munenekhe lagap iti nen, it nen he, “Oko woknisauem!” iluk inane kokhogon iliogei iti la'isani o! Itithogon hagakhe lagapma it inane iti ninopase Etagapogot obatneak etnogo asuk holhesik werek o.

⁵Agat oba yoma hinameke yi meke ti meke hinikierek dogolik, hinakla arlekenhogo hagakhe laga iti re! Wam wasugun tak-tak asi agunem ebe kok asuagaluk hipiri kokhogon wogokharek iti hak, hit hinebe weagathinabigin meke horok asi aga korlek, hinekaerek nen hinebe erlakhekhe lagap iti re!

⁶It aperek mothogon hagariogei meke iti, it nen oko hit hinasusak dekmaat wene inoba 'biluk inebe inakhe lagap iti re!

⁷Iti nenat, nagarlak lak nerugi. Ninoe Etagapogot ebe aban wageidek werek korlek, hinakla puk ageidek hinobakhanini hapugutdiluk therogo dogono o. Akhuni nen wen waganekma hipiri ai ya'iluk therogo welageikharek iti hinakla hutdini o. Itithogon ai ya'iluk werek korlek miso o mo dageisi korlek nikik, usekhe korlek nikik, eran-alep nasi korlek inakla puk ageidegat, “Yabokane isarlo agunem ebe kok meke itakhagein,” iluk inobakhanini hapugutdiluk therogo welageikharek iti hak,

⁸ninoe Etagapogot ebe horogat wisigin iluk hinetaiken horlerogon dogolik, hinobakhanini hapugutdiluk therogo dogono o.

⁹Nagarlak lak nerugi. Itithogon therogo dogolik, Allah nen wene hinoba 'binogo iluk, hit-hit ekhe dogolik, “Nagarlak iti hagariogo na'it o,” iluk inabok palhidek dogono o. At Allah nenat wene akhuni inoba 'bigik, kokhik, hagasigin iti holagapema horok asi aga iti 'bikhani!

¹⁰Nagarlak lak nerugi. Haganeat it ap Allah ane yogeisekhe lagoukha meke emenogo nen, “Ninopase Etagapogot nen ekhe mekeat yokhisekhe lago,” iluk yogeisugunem, it akhuni aperek nen inebe weagarinakhe korlegat, inakla puk ageidek inobakhanini hapugutdiluk welagoukha meke emenogo inobabut waganini o!

¹¹Weagarinakhe korlek, inobakhanini hapugutdiluk welagoukha iti nen, nit nen inabok hano ekhe dogolik, “It hano ageikhasik inakla arleken akhiliogei,” iluk ogorek iti. At Ayub akla puk ageidek obakhanini hapugutdiluk welageikhe baga, ninopase Etagapogot obabut hano dogolik kokhogon akmurinakherek meke etnogo nen, ilugun oba hanotdisikhe iti abok hinasuk holhethebat o.

¹²Nagarlak lak nerugi. Wene ageikhe kok meke yi yokhisak. Allah nen wene hinoba 'binogo iluk, hit nen pogot oba meke ageikhe etaga palhik, agat oba meke ageikhe etaga palhik, ninat meke ageikhe etaga palhik, inetaga hupuk palhe dogogup. “I o,” uogoluk halok he, 'bogokhogon, “I o,” usak. Nen, “Dek o,” uogoluk halok he, 'bogokhogonat, “Dek o,” usak.

¹³Hit aperek hinakla weagat welagap halok he, sembayan ekhe dogono o. Nen, hit aperek hinakla arleken akhekhe lagap halok he, etai Allah aetai wakhe dogono o.

¹⁴Hit aperek hinoba u aga halok he, sembayan igik, ninoe Etagapogot etaga palogo minyak hinoba tialhik, hagasuagaluk it ap Allah a'buri therisik welageikharek meke inayoko 'bekhe dogono o.

¹⁵It nen inetaiken Allah oba hakotdiluk, sembayan ugun iti baga, ninoe Etagapogot nen hinoba u meke iti dek asuagaluk hano hagathinakhik, hit aperek weak hagakhep meke werek halok, thagalogo degetdisigik, hagasigin o.

¹⁶Itithogon hagasigin iti nen, hit aperek hinoba u meke dek asubageik nen, weak hagakhep meke hit-hit 'bual-'bual ekhe dogolik sembayan ekhe dogono o. It akhuni Allah akla warlok apekherek meke, mothogon hagakharek meke nen sembayan eberogonat obatnerogon ugun iti, obatneak werekma Allah nen hagarinabiginat o.

¹⁷At Elia iti, ebe nit hakene akhuni meke nenat, miso wageidek dogoagaluk sembayan isikhemo, mo dageigik, usigik hagakhe korlek 3 tahun welageikhesik, yabokane thut 6 oba inobat miso agat oba usa'ageidek motok hugat welageikhe.

¹⁸Itithogon huk werekma sembayan yabokane isikhemo, miso usa'ageikhemo yi meke ti meke yabokane agat oba nen aku dukhisikhesik eken ikhikhe iti.

¹⁹Nagarlak lak nerugi. Hinagarlak lak hinerugi meke ageikhe ebe wene here'isalok mirlokhogon nuk asi laga halok, hit aperek nen yabokane apuke suguluk Allah oba wolok wisugun iti hasik,

²⁰wene yi hinakla ebetni o. Tha nen weak hagakhe dogolik, ekaerek nen mirlokhogon nuk asi lagunem, at ageikhe nen apuke suguluk Allah oba wolok waga halok he, ebe watlasusak tak-tak mekeat tilhik, weak kogat hagakhe meke iti thagalogo degetdigik, hagasigin o iluk, werek iti hinakla nen hutdekhe dogono o.