Read Mid Grand Valley Dani 1 Petrus 1 Bible Online

1 Petrus 1 - Mid Grand Valley Dani bible

1 Petrus 1

¹Nagarlak lak nerugi. An Petrus, Yesus Kristus nen nayoko 'biluk la'ani ageikhe meke etnogo nen, wene yi holal waganogo hit ninopase Allah nen, hinebe alebat wenakhinakhikhe meke, yogotak ya elanma hasik yi ai ti ai thirlik-pirlikhogon lo lagagisip, o propinsi Pontus men, Galatia men, Kapadokia men, Asia men, Bitinia men, akhuni inaklake inaklake dopok welagathep meke etnogo, hinoba la'i agei o. Hinebe Allah nenat akla apalok wenakhinakhikhesik, Yesus Kristus ane hologo hagakhe dogoagaluk apma 'binagagik, amep oba hothinakhik, hagasigiluk nen, “An nekaerek na'buri asubageik iluk wokhinakhi o,” iluk at Agoreke nen wokhinakhikhe iti o. Allah obabut hano etnogo nen hano meke wokhisigik, hinetaiken eran-alep hapugutdinagagik, kokhogonat hagakhe dogoak o.

³Ninoe Etagapogot Yesus Kristus opase Allah etnogoat hogorakhe dogouok. At Allah ninebe akmu motok nen, Yesus Kristus watlageikhesikmo nen ilugutdisikhe iti baga nit ninilugutninakhikhe iti. Ninilugutninakhikhemo dogolik, ninakla nen he, “At nen, yabokane hanothinabigin, isikhe iti tagan-hagan asigin dek,” iluk ninakla arleken akhekhe lago.

⁴Itithogon hanotninakhunem iteerek asugun meke iti, hirli ageidek weak ageidek, dek ageidek, ikhok motok dogogin meke pogot oba ageikhe hit 'binageikhemo werek o.

⁵Hinetaiken at Allah oba hakotdiluk welagap iti nen, at obatne baga hakhisik dogoluk nen, yabokane hinebe hanothinabigin meke ilugun hurli baga winametdigin iti.

⁶Iti nenat, yogotak ya, Allah nen hinobabut paligiluk hagakhe korlek, hinoba akin-pakinhogon hekhe dogolik, elanma hasik hinakla weak ariogo mekeat he, hinakla arleken akhekhe dogono o.

⁷Emas oko kogat palharek meke iti hano a? Weak a, iluk hetu aik oba walhegarek iti hak, Allah nen, “It inetaiken an noba eberogonat hakotdiluk werek a? Dek a,” iluk, ekagat asuagaluk apasinem, hinoba yi akin-pakinhogo hekhe lagap iti o. Emas iti, we yugunat dek asigin mekeat he, ebe wene kok he, hinetaiken Allah oba hakotdiluk welagap itiat o. Hit hinetaiken at oba hakotdiluk dogogun halok he, at nen hinobabut palhe dogoluk nen, Yesus Kristus thelekmaat la'isigin itinem, hogothinakhik, hinalonethinakhik, kogotdinagagik, hagasigin o.

⁸Hit nen alebat, at ebe hinileken higidek mekeat he, ebe hinakmu welagap iti o. Itithogon dogolik, yogotak ya hinileken higidek mekeat he, hinakla nen, “Yabokane hano motok hagatninabigin,” iluk hinane baga nikithogon pilinogo usak heat dogolik, hinakla arleken motok akhekhe lagap iti o.

⁹Hinakla nen he, “O ilugun hurli baga tilninabuak,” iluk hinetaiken at oba hakotdiluk dogolik, yogotak iteerek aga lagabat o.

¹⁰Ninebe tilninabigin wene iti, it alebat ap Allah ane yogeisekhe lagoukha meke emenogo nen wene iti hasigat herakhik, hinok waganhik, hagakhe lagoukha. Itithogon herakhe dogolik, Allah obabut hano etnogo nen, “Hano hagarinakhe dogogin,” iluk ebe hit hano hagathinabiogo iti hasigat aban werek korlek yogeisekhe lagoukha iti.

¹¹Itithogon yogeisekhe lagoukha iti, at Kristus Agoreke inakla dogolik yogeisekhe dogolik, men isikhe, “Kristus aik hilik hilik watlasigin. Watlatluk nen yabokane iluk agunem hogorakhe dogogun,” iluk yogesasikhemo it nen ekhe dogoligat, “Nikithogon hagatlasigin. Meranem nen hagatlasigin,” iluk hinok hutukhogon waganhe lagoukha.

¹²Hinok waganhunem, at Allah nen he, “Wene iti, hit hinekaerek hasik, dek o. It yabokane aban meke inobasik hagakhe lagap o,” iluk hit hinobasigat isikhe. Itithogon yogeisasikhesik welageikhesik nen, yabokane Allah Agoreke pogot oba nen usa'i ageikhemo, it ap hano wene Yesus Kristus hagakhikhe wene etnogo yokhisoagaluk inakla dogolik yogotak pakhogon yokhisiliogei ebe iti hasik ekhe lagoukha iti. Wene iti, it malaikat Allah nen yoko usa'isa agarek meke emenogo nen, “Eiye. Nit wene iti hutukhogon ninilu atlo e,” iluk apegarek.

¹³Iti nen, wene iti hutdiluk nen, holak pirlirli luogoluk inobakha herle a'bethogon wakharek iti hak, hinobabut hebelogo, hinetaiken ekerlogo dogono. Itithogon dogolik, hinakla nen, “Allah nen Yesus Kristus ebe thelekmaat la'i agunem hano meke woknisasigin o,” iluk hinetaiken at oba la'iluk oba eberek motok dogono o.

¹⁴Hit alebat wene iti hinokodek dogolik, yi meke ti meke warlok nen hinetaiken oba nen nukunem hagakhe lagagip iti, yabokane hinobabut iti meke waganhup o. Yekerugi nen inopase lak inane holek dogolik mothogon hagakharek iti hak, hit Allah ane hinasuk hologo mothogon hagakhe dogono.

¹⁵ At Allah nen he, “An nobabut weak hagakhidek karelek motok welagarek iti nen, hit meneke an nobasik hinobabut karelek motok dogono o,” iluk isikhemo holal waganogo 'bisukha iti nen, hit nen yi meke ti meke hagakhe dogolik, hinobabut at Allah hinayoko 'bisikhe meke obabut hakeneat karelek motok dogolik hagakhe dogono.

¹⁷At Allah obabut akhuni inoado baga anek ileken hisalok, aperek elokhoma 'bisigik, aperek oporlike 'bisigik, hagakherek dek o. Inobabut hagakharek dopok mothogonat wene inoba 'bigik, kokhik, hagakherek iti nen, hit nen he, “Allah ninopase o,” iluk ayoko 'bekhe dogolik, agat oba yoma elanma hasik hinebe ap huso negen dogolik, at ebe hinayukhogon hagakhe dogono o.

¹⁸Alebageigat hinopa lak hagakhe lagoukha iti hak, it inobabut waganogo dek asigin meke hasik yugunat alomarogo hagakhe lagagip iti nen, hiniki herle warek negen werekma, Allah nen hinebe hinoko palogo tilhinakhikhe iti hiniluat o. Oko iti dek asigin meke emas oba, perak oba hinoko palhinakhikhe 'buk.

¹⁹At he, oko kok meke baga palogo tilhinakhikhe o. Domba eak weak dek hano utholik meke Allah hasik amep ulabogo warisu hak, at Kristus amep ulabogo watlageikhe iti baga, hinoko palogo tilhinakhikhe iti.

²⁰Kristus, Allah nen pogot agat yoma aban walhigidek dogolik, akla apalok ayoko 'bisikhesik welageikhesik nen, ebe yogotak o ilugun hurli baga hit hinobasik thelekmaat la'i ageikhemo hinebe tilhinakhikhe iti.

²¹Ebe watlageikhesikmo Allah nen ilugutdiluk hogorakhe dogoagaluk meldisikhemo, hinetaiken Allah oba hakotdiluk, “Yabokane at nen hanotninabigin,” iluk oba eberek welagap iti.

²²Ebe wene iti hinasuk holhe dogolik, hinakla nen weak meke horogo la'isalok, hinagarlak lak hinerugi Allah a'buri meke aperek eberogonat hinakmurogon hagakhe lagap iti, hinom hunik motok dogolik nakmu-hakmurogon hagakhe dogono.

²³Allah nen yabokane itakhinakhikhe iti, akhuni watlageikharek meke nen itaginakharek iti hak itakhinakhikhe 'buk. Allah iluk ikhok motok dogolik ane dek asigin dek motok dogogin meke baga itakhinakhikhe o.

²⁴Iti, Allah ane men iluk holal waganek werek hak, “Akhuni tha'bokhogonat he, inebe oka hakeneat o. Hano iluk hogorinakharek iti, o eken hogorakharek iti hak hogorinakharek iti. Eka puk ageik, eken lologo usasigik, hagakherek iti.

²⁵ Meke re, Ninoe Etagapogot ane iti motok dogogin o,” iluk isikhemo holal waganogo 'bisukha iti. At ane iti ebe re, nit nen hano wene yokhisogorek itiat o.