Read Mid Grand Valley Dani 1 Petrus 4 Bible Online

1 Petrus 4 - Mid Grand Valley Dani bible

1 Petrus 4

¹Akhuni yi aik ti aik halok, inebe watlatluk, yabokane weak hagakhe dogosak dek iti nen, at Kristus yi aik ti aik hilik hilik ebe watlageikhe iti hak, hit meneke, akhuni thin ikhalok inobabut hebelogo welageikharek iti hak, at Kristus obabut waganogo, yi aik ti aik hekhe dogolik hinobatnerogo dogono.

²Iti nen, hit nen akhuni yi meke ti meke warlok nen inetaiken nen nekerek iti meke here'isalok, hurli yogotak hurli nen, agat oba yoma hiniluk dogolik Allah akla warlok apekherek meke iti anek hagakhe dogono o.

³Hit alebat hinobabut it akhuni Allah ane inokodek meke nen inakla apalok hagakharek iti hak, hiniki doalegat arat hagakhe dogolik, weak hinekarli degat hagakhik, hinetaiken nen nukunem param hagarinakhik, eken apusu 'bit hakene doalegat nalok hunu-hunu palhik, pesta weak hagakharek meke nalok yugunat-yaganat hagakhik, apusu weak meke iti nikik, kaneke akla korlo asunogo iluk, hogorasusak dek meke hogorakhik, hagakhe lagagip iti.

⁴Itithogon hagakhe lagagip mekeat he, yogotak hit hinobabut it weak warlokhogon motok yugunat-yaganat hagarik lageikharek iti hak hinom hagakhidek thogotdekhe lagap iti nen, hit hinabok weak paliogei iti.

⁵Mekeat he, at Allah nen, akhuni iniluk meke men, watlagoukha meke men, initema waganogo wene inoba 'bigik, kokhik, hagasigiluk akla apekhesik werek. Itithogon wene inoba 'bisinem, it nen, wene inoba korauwogoluk, “Nit yigithogon hagakhe lagagu, tigithogon hagakhe lagagu,” iluk yogosugun weregat o.

⁶Iti nenat, it akhuni watlagoukha meke iti, Allah nen nit akhuni tha'bokhogonat wene ninoba 'bigik, kokhik, hagakherek iti hak inoba 'bisikhemo, inebe watlagoukha mekeat he, at Allah akla apasikhe baga inagoreke iluk welagarek iti hak iniluk dogoagaluk, at Kristus nen hano wene yogeisa lageikhe iti.

⁷Yi meke ti meke tha'bokhogonat ilugun oba hagatlasigin meke horogat asi aga iluk, sembayan ekhe dogouogoluk, hinetaiken thebekhogon dogolik, hinobabut hebelogo dogono.

⁸Wene kok hakene yi. Hit-hit nakmu-hakmurogon hagakhe dogolik, ageikhe nen ageikhe weagatdugun meke thagalogo motok degetdugun iti nen, hit-hit hinagarlak lak hinerugi hinom nakmu-hakmurogo motok hagakhe dogono.

⁹Hinagarlak lak hinerugi hinom, hit aperek nen it aperek inaila lageik, it nen hit hinaila wageik, hagakhe dogolik, inebe woginakhik, hinakla nen, “Na'it o,” iluk apigidek woginakhe dogono.

¹⁰At Allah obabut hano nen, ninebe dopok ninobabut tomok woknisasikhe tak-tagat, hinebe dopok nen iti meke hano ite dogolik, hit-hit yomak-yomak hagakhe dogono.

¹¹Itithogon hagakhe dogolik, Yesus Kristus hinom hunik dogolik hagakhunem, it akhuni aperek nen Allah hogorakhe dogoagaluk, hit aperek nen wene yogeisekhe dogolik, Allah aneat yogeisigik, hit aperek nen it aperek yomageisekhe dogolik, Allah obatne woknisekherek iti bagaat yomageisigik, hagakhe dogono o. Itithogon hagakhe dogolik, Yesus obatneak ikhok motok welagarek etnogo hogorakho motok dogoak iluk, “Amin,” igi iti.

¹²Nagarlak lak nerugi. Hinebe nakmu lak o. Hetu aik hegarek iti hak, Allah nen, hinobabut paligiluk yi aik ti aik hinoba agunem, hinakla nen, “Yi ninat hogorek dek meke ninoba ariogo,” iluk apugup o.

¹³At Allah nen Kristus ebe thelekmaat la'i agunem, hogorasugun itinem, hinakla arleken akhauwogoluk, hinakla nen, “At Kristus oba yi aik ti aik hilik hilik watlageikhe hak, nit at ninom hunik dogolik itithogonat hekhe lago,” iluk hinakla arleken akhekhe dogono.

¹⁴Akhuni aperek nen at Kristus hasik wenakhisekhe halok, hinakla nen, “Allah Agoreke hogorakharek meke etnogo ninoba duk ekhemo welago,” iluk hinakla arleken akhekhe dogono o.

¹⁵Mekeat he, it aperek nen akhuni inakhik, iniki abusak waganhik, weak hagakhik, it aperek inayabu meke thebelogo hagakhik, hagakhunem, yi aik ti aik inoba agarek iti hak, hit itithogon hagakhunem hinoba asunogo.

¹⁶Mekeat he, akhuni aperek nen, “Hat Kristus agot, hebe Kristen meke,” iluk yi aik ti aik hagathinakha halok, hinekarli agup o. “An Kristus agot halogat at etaga meke an netaga thalogo yokniriogei iti hanoat o,” iluk Alah hogorakhe dogono.

¹⁷Allah nen ninitema waganogo wene ninoba 'bigik, kokhik, hagasigin iti arat horogat asi aga. Itithogon hagakhe dogolik, nit Allah a'buri meke tak ninitema waganogo wene ninoba 'bigik, kokhik, hagasigin halok, yabokane it akhuni aperek Allah ane hano wene waganhidek meke nitithogon hagarinabigin apegep?

¹⁸ Akhuni nen Allah ane baga men isukha, “Akhuni mothogon hagariogei meke, Allah nen tilinabusak dek hakene werekma, tilinabigin iti halok, it Allah ebe inakla meanetdiluk weak hagariogei meke iti nikithogon hagarinabigin apegep?” iluk holal waganogo 'bisukha.

¹⁹Hit Allah akla apasikhe bagaat hinoba yi aik ti aik itithogon hekhe lagap halok he, hinakla nen, “At ninebe walninakhikhe meke iti at oba hakotdiluk dogosak, hano,” iluk hinetaiken at oba hakotdiluk dogolik hinobabut hano hagakhe dogono.