Read Mid Grand Valley Dani 2 Petrus 2 Bible Online

2 Petrus 2 - Mid Grand Valley Dani bible

2 Petrus 2

¹Alebat etoma, ap Allah ane yogeisekhe lagoukha meke thalek wagoukhasik, inekalat ekhe lagoukha meke, Allah a'buri inaklake melarik wagoukha. Iti hakene, yabokane ap ebe wene yakulhisiliogei meke thalek hagarogo witluk, inekalat ekhe dogogun meke hinaklake aperek winam atluk wisugunat o. Winam atluk nen, wene akhuni inebe weagarinakherek wene yokhisa ukisugun. Ukitluk nen, ninoe Etagapogot nen it ninomat tilninabigiluk ninoko palhikhe mekeat he, it nen, “At he, nit ninoe dek o. Ninokodek,” iluk la'belhe dogogun iti. La'belumo, inekaerek nen ukum ibat inoba 'bakhalok weak akhagun o.

²Itithogon mekeat he, it nen inetaiken nen nukunem inekarli degat yi weak ti weak hagakhunem, akhuni doalegat nen it inobabut waganogo hagakhe dogogun iti baga, it akhuni aperek nen, Yesus oporlik lageikharek wene, ebe wene iti, abok weak ugun o.

³It ap Allah ane yakulisegarek meke thalek winam asugun iti inobabut he, “Nit anek woknisanek,” iluk egarek meke iti nen, hit nen oko wogeisoagaluk, wene inekaerek inakla nen kagalogo inekalat yokhisekhe dogogun iti. Itithogon mekeat he, it inobabut hagakhe dogogun iti baga, at Allah nen, “It iti ukum inoba 'biluk inebe weagarinabigin,” iluk haganeat dik-dukhogon hagatdiluk welageikhe. “Huk huk, maga maga,” iluk welageidek weagarinabigin meke werek o.

⁴It malaikat Allah nen yoko usa'isa agarek meke aperek weak hagakhukhama, Allah nen here'isigidek, ukum yabokane inoba 'bigiluk nen, o mummo weakma iniki herle warek dogoagaluk usa'isasikhe iti.

⁵Iti tak-tak, akhuni haganeat welagoukha eta oba dogolik, Allah ina'it meke nen inobabut weak hagakhe lagoukhama Allah nen here'isigidek. I thalukhogon inasisuagaluk inoba usa'i ageikhemo inakhe dogolik, Nuh, akhuni inobabut Allah akla warlok meke hagakhe dogoagaluk wene yogeisekhe lageikhe meke inom, inebe 7 baga aperek inom, tilinakhikhe iti.

⁶Nen, iti tak-tagat, akhuni yabokane Allah ina'it atluk weak hagakhe dogogun meke, inakla nen, “Nit ninobabut itithogon hagakhe dogogun halok, Allah nen here'inanhidek, itithogonat ninasigin higi,” iluk hutdekhe dogoagaluk, akhuni o Sodom meke, Gomora meke inom, Allah nen ukum inoba 'biluk motok tha'bokhogonat hetu baga inakhikhe iti.

⁷Itithogon inakhe dogolik, at Lot anek, obabut mothogon Allah warlok meke hagakhunem, it akhuni etoma meke inekarli dek weak hagakhe lagoukha baga, at akla korlo ago motok werekma Allah nen tilhikhe iti.

⁸It iti inobabut hagasusak dek meke weagat hagakho werek nen, at Lot obabut mot meke inakla dogolik, ileken hisigik, asuk holhik, hagakhe dogolik, hibiku-yogokuat akla korlo ago motok welageikhe.

⁹Itithogonat, akhuni aperek Allah warlok meke hagakhunem inakla kagaligiluk wagunem, ninopase Allah Etagapogot nen tilinakhik, nen it aperek weak hagariogei meke halok, ukum yabokane inoba 'bigiluk, hagasik welageik, itithogon hagasusak ilu dogoligat erlok hagasigin o.

¹⁰It iti kok hakene, Allah inakla meanetdiluk, yi meke ti meke inetaiken nen nukunem motok weak hagarik liliogei iti, Allah nen ukum inoba 'bigin o. Inayuk dek inawulagam weak hagakhe dogolik, pogot oba meke hogorinakho welageikharek meke etoma, it inayuk degat inabok weak palhe dogogun iti.

¹¹It malaikat Allah nen yoko usa'isa agarek meke iti, inobatneak. Yi meke ti meke hagasusak erlogat mekeat he, it pogot oba hogorinakharek meke iti, wene inoba 'buagaluk, ninoe Etagapogot oba wogosik lalok nen, it nen inabok weak palharek dek. Mekeat he, it ap Allah ane yogeisegarek meke thalek inekalat ekhe dogogun meke iti, inobatne motok dek. It nen yi meke ti meke hagasusak erlok dek dogoligat, it pogot oba hogorinakharek meke iti inabok weak palhe dogogun iti.

¹²It ap Allah ane yogeisegarek meke thalek inekalat yogeisekhe dogogun meke iti, wam etaiken dek meke ebe ha'iluk wasuagaluk ebe itaklagarek iti hak, it ap iti nen wene hutdigidek dogolik inabok weak palhe dogogun iti baga, inekaerek inebe wam wakharek iti hagat, Allah nen inasigin iti.

¹³It nen it aperek weak hagarinakhe dogogun iti baga, Allah nen oko weak hagarinabigin iti. It he, inetaiken thebelu'buk dikeneat weak hagasu warlok nen hagakhe dogogun iti. Su hano werek korlek, mirli meke oba dabulageik, huriagap hagatlageik, hagakherek iti hak, hit pesta isago nukunem, it iti inetaiken thebelu 'buk, yi meke ti meke inetaiken nen nukunem yi weak ti weak hagakhe dogoligat, hinoba ukitluk, hinom opakimo neke dogogun iti.

¹⁴It ap iti inilekenma, humi param hagarinabusak iti anek wogosik ina'it ageidek weak hagakho motok dogogun iti. Itithogon hagakhe dogolik, akhuni inetaiken obatne dek werek meke nukherinakhe dogogun iti. Inobabut he, “Yi meke ti meke nit anek woknisanek,” iluk ekhe dogouogoluk haganeat nen yakulhukhasik nen, iti mekeat inilu dogolik hagakhe dogogun iti. Itithogon hagakhe dogogun iti nen, Allah nen homan 'bisalok weagarinabigin werek o!

¹⁵It iti holak mothogon lageikharek holak iti here'isalok nen, haganeat at Bileam Beor a'but holak nomokhogon lageikhe itike mutluk laga dogogun iti. At Bileam akla nen, “An weak hagakhunem oko woknesuak,” iluk akla warlok apasikhemo,

¹⁶Allah nen, “Hat weak hagakhun o,” iluk asuk wakhikhe. Wam keledai apot oba yasuklatuk lagunem, wam keledai ane dek mekeat he, at nen Bileam yogokhe dogolik, “Hat Allah ane yogeisekhe lagan meke yi re, motok weak hagakhen o,” iluk akhuni inane bagaat wenagakhikhe iti.

¹⁷It ap iti inobabut, o hibi baga i elesi 'berelagarek iti hak, 'berelageik, oisa hisakne nen wolok lagarek iti hak, yugunat wogosik lageik, hagakhe dogogun o. Allah nen it iti o mum hikhakthek etoma dogoagaluk, inoboluk hagarogo 'bisasikhemo werek o.

¹⁸Akhuni aperek inagarlak lak inerugi korloat hagakho korlek nen, here'isalok dukhisuogoluk hagakhunem, inetaiken nen nukunem yabokane weak hagasuagaluk, it ap iti inekaerek hogorakhekhe dogolik we yugunat inekalat inakla kagalhe dogogun.

¹⁹Akhuni tha'bokhogonat nen, yi meke ti meke obatne atluk obatne degetdisinem, obatne asigin meke iti atuaneke welageikharek iti nen, it iti, inekaerek inebe weagarinakherek meke iti atuaneke dogolik, it akhuni aperek yogeisekhe dogolik, “Hit nit ninobabut waganugun halok he, yabokane hinasokneat asugun o,” iluk we yugunat yogeisekhe dogogun iti.

²⁰Akhuni agat oba weak hagakharek meke yoma here'isalok, lo dukhitluk nen, ninoe Etagapogot Yesus Kristus tilninakhikhe meke ebe inilu atlugat, yabokane inapuke weak hagakharek meke iti oba ukugunem nen, mul erloma ukugunem inebe ha'isalok hagakherek hak, hageinabumo erlok degat asugun iti. Erlok degat atluk, alep weak welagoukha iti, hemurlugat hano negen. Meke re, yabokane weak asugun iti, motok kok negen weak atluk dogogun o.

²¹It iti ebe wene mothogon mutluk lageikharek iti inilu ageidek dogolepma, hano negen dogolep. Mekeat he, inilu atluk nen, wene Allah nen ninasuk wakhikhe wene iti here'isalok, nomokhogon lageikharek iti nen, motok weak asugun o.

²² It iti, akhuni nen inane dagakhogon men iluk egarek iti hak hagakhe dogogun, “Yeke nen 'be'bak u'biluk, yabokane apuke na lagarek iti.” Nen, “Wam oado hano kume warek meke yabokane 'bisi hile wasi lagarek iti,” iluk egarek iti hagat, it itithogon eberogonat hagakhe dogogun iti.