Read Mid Grand Valley Dani 2 Petrus 3 Bible Online

2 Petrus 3 - Mid Grand Valley Dani bible

2 Petrus 3

¹Nagarlak lak nerugi. Hinebe nakmu lak o. Surat alep ageikhe holal waganogo hinoba la'i agagi iti men, yabokane la'i agei iti men, hit wene ebe hinilu mekeat, hinakla mothogon ebesubageik nen iluk la'i aga lagei iti.

²Wene iti, it ap haganeat Allah nen inayoko 'bisikhemo at ane yogeisekhe lagoukha meke nen isukhaat. Nen, ninoe Etagapogot ninebe tilninakherek meke etnogo nen wene ninasuk wakhikhe meke, nit ninayoko 'biluk hinoba la'inani ageikhemo yokhisasuguat.

³Wene ebe yi tak hutdusak. O ilugun hurli baga, akhuni aperek inane sagun weak meke inetaiken oba nen nukunem inakla nen kagalogo weak hagakhe dogolik, hinoba witluk, inane sagun yokhisekhe dogolik,

⁴“Hinoe Etagapogot nen, An yabokane wisigin, iluk wene wathisasikhe etnogo ebe ki waga. Wageidek werek korlek ninopase lak arat watlagoukha mekeat, yi meke ti meke Allah nen ebekeram walhasikhemo welageikhe hagat, ikhok motok werek yi,” iluk inane sagun yokhisasugun o.

⁵Itithogon isi dogolik, wene yi obarlikmatdiliogei. Ebekeram Allah ane bagaat pogot walhasikhesik nen, agat i inom dapukhogon werekma, i upuke wemake la'isikhe iti baga agat walhasikhe, iluk wene iti inilu dogoligat, inokodek-inokodek iliogei iti.

⁶Itithogon walhasikhesik nen, yabokane nen i thaluk-palukhogon hagatlasuagaluk isikhemo, agat iti i iti bagaat weagatdisikhe iti.

⁷Meke re, pogot iti men, agat iti men, yabokane hetu baga weagatdigiluk Allah ane iti bagaat elanma hasik hago dogoluk nen, akhuni Allah ebe ina'it dogolik inobabut weak hagariogei meke iti, ukum inoba 'biluk weagarinakhik, pogot agat weagatdigik, opaki hasigat hagasigiluk eram nenat iki hago werek o.

⁸Meke re, nagarlak lak nerugi. Hinebe nakmu lak o. Wene opakiat yi obarlikmatdugup. Ninoe Etagapogot akla apekhe dogolik, niniki opakiat welagorek iti, 1.000 tahun hakene apekherek. Nen, 1.000 tahun iti, niniki opakiat welagorek iti hakeneat apekherek. Ipisak tak-tagat anek apekherek o.

⁹It akhuni aperek nen, “Ninoe Etagapogot nen wene watnisasikhe wene etnogo, ebe ibat wageidek erapigat werek,” iluk apiliogei iti, erapigat welageidek. Hit hinebe akmu nen, at akla nen, “It aperek nuk asunogo,” iluk akhuni tha'bokhogonat inobabut weak hagariogei meke here'isalok inobabut hebelasuagaluk, eram nenat akla apalok huk werek iti.

¹⁰Itithogon werek mekeat he, akhuni akhirak werek korlek yi meke ti meke inilarlurlu wagani ukegarek iti hak, ninoe Etagapogot wisigin iti, itithogonat wisigin o. Itinem, pogot ebe opaki hasigat hisakne ane hakene ilik-ilik dek ageik, yi meke ti meke pogot oba welagarek meke erlo inomat hetu nikik, agat ebe men, yi meke ti meke agat oba welagarek meke men, tha'bokhogonat dek ageik, hagasigin o.

¹¹Yi meke ti meke tha'bokhogonat itithogon dek asigin iti nen, hit hinobabut nikithogon hagakhe dogosak apegep. Allah nen hagasigin itinem pogot hetu 'bumo re, amulok nen tha'bokhogonat nikik, yi meke ti meke erlo inom herlenhogo nikik, hagasigin iti nen, weak hagakhidek hinobabut karelogo dogolik, hinebe Allah hasik 'bisalok, at ebe therogo dogolik, ebe ibat wisuagaluk hinobatnerogon hagakhe dogono.

¹³Itithogon hagakhe dogolik, ninakla nen, “Allah nen wene watnisekhe dogolik, Pogot ket meke hagakhik, agat ket meke hagakhik, hagasiginmo etoma ukiluk mothogon anek hagakhe dogogun,” iluk, wene watnisasikhe etnogo therogo welago.

¹⁴Nagarlak lak nerugi. Hinebe nakmu lak e. Itithogon wisigin iluk, therogo dogolik, wene hinoba 'bakhigidegat, weak ageidegat, Allah hinom hano werekma at ebe 'bithisasuak nen, at hasik obatnerogon hagakhe dogono.

¹⁵Itithogon hagakhe dogolik, hinakla nen, “Ninoe Etagapogot etaiken thebekhogon dogolik, ibat wageidek aban werek iti, tilninabigiluk eram nenat aban thetnisik werek,” iluk hinakla apano. At ninoe Paulus ebe ninakmu meke etnogo Allah nen akla kagalhikhemo wene itithogon iluk holal waganogo hinoba la'i ageikhe iti.

¹⁶At nen wene surat oba hibiku-yogoku holal waganogo hinoba la'i aga dogolik, wene iti meke hasik isiat welagarek o. Meke re, wene at nen holal waganogo hinoba la'i agarek meke iti, wene aperek hutdusak erlok dek negen werek o. Werekma re, it aperek inetaiken pere aborlok werek meke nen, wene iti inokodek dogolik, wene Allah nen isikhemo Paulus nen holal waganherek meke iti men, it aperek nen holal waganhukha meke iti men, wene mot werek mekeat he, mirlokhogon korlotdiliogei iti. Wene mirlokhogon korlotdekhe dogolik, inekaerek nenat inebe weagat dakhiliogei iti.

¹⁷Nagarlak lak nerugi. Hinebe nakmu lak o. Wene iti aban hagatlageidek werek korlek he, hinilurogo dogobageik iluk dopokhogon yokhisigi iti. Hinilu dogolik, hinekaerek hinetaiken horlerogonat dogono. It akhuni aperek inasuk warek dek hagakharek meke iti nen, wene korlo wene yokhisekhe dogolik, hit nen, “Eberogonat,” iluk hinakla apalok hinetaiken horle welagap meke iti kolelogo here'isalok hinebe nuk asunogo iluk, hinobabut hebelogo dogono o!

¹⁸Ninoe Etagapogot tilninakherek meke obabut hano etnogo nen woknisekherek meke iti waganhik, ebe hinilu ageik, hagakhe dogolik, hinetaiken horle atluk dogono. Yogotak ya men, yabokane men, at Yesus Kristus arligat hogorakho motok dogouok o, iluk, “Amin,” igi iti.