Read Mid Grand Valley Dani 1 Yohanes 2 Bible Online

1 Yohanes 2 - Mid Grand Valley Dani bible

1 Yohanes 2

¹Nen, na'buri o. Hit weak hagakhe dogunogo iluk, wene yi holal waganogo hinoba la'i agei o. Itithogonat mekeat he, tha nen weak hagakhe halok, ninopase Allah werekma nit yomaknisekherek meke ap ageikhe turlem heisogo werek. At iti ebe Yesus Kristus obabut mot hagakherek meke etnogoat o.

²At ebe itithogon turlem heisogo dogolik, nit yi weak ti weak hagakhorek meke thagalogo degetdisalok hotninakherek. Itithogon hotninakherek iti nit weak hagakhorek meke ninobasik anek 'buk. At he, yi akhuni ti akhuni agat oba meke tha'bokhogonat weak hagakharek meke inobasik ninomat hotninakherek o.

³Wene Allah nen ninasuk wakherek wene iti, hologo mothogon hagakhe lago halok he, at ebe ninilu o, iluk iti baga nen ninetai ekerlogo hutdekhe lago.

⁴Meke re, tha nen, “An he, Allah ebe nilu,” iluk ekhe dogoligat he, at nen wene ninasuk wakherek wene iti hologo mothogon hagakhidek halok he, at ekalat ekherek iti. Halok he, ebe wene iti akla motok dek o.

⁵Itithogon mekeat he, tha nen Allah ane hologo mothogon hagakherek halok he, yi meke ti meke bogokhogon hagakharek iti hak, at iti Allah motok akmurogo welagarek o. Nen, nit itithogonat welago halok, nit Allah ninom hunik welago, iluk iti bagaat ninetai ekerlogo hutdekhe lago.

⁶Nen tha nen, “An Allah nipisak hunik welagei,” iluk ekherek halok he, obabut at Kristus hagakhe lageikhe iti hagat, hagakhe dogosak o.

⁷Nagarlak lak nerugi nakmu lak o. Wene ket wene hinasuk warogo holal waganogo hinoba la'i agei 'buk. O haganeat Allah nen hinasuk warogo yokhisasikhemo erloma nenat herogo welagathep mekeat o. Wene iti, at Allah nen hinasuk haganeat wakhikhemo holhigip meke etnogoat o.

⁸Itithogon mekeat he, o mum werekma lia arik lagarek iti hak, lia ebeat meke yaknisa ageikhemo yariogo iti nen he, wene ket wene hinasuk warogo hinoba la'i agei iti o. At Kristus nen wene iti mothogon hagakhunem ebeat ageikhe iti hak, hit meneke itithogonat, wene iti mothogon hagakhunem ebeat ariogo iti.

⁹Nen, ap tha nen, “An nebe lia baga welagei,” iluk ekhe dogoligat he, agarlak lak erugi motok a'it halok he, o haganeat nen logat yogotak ya, at ebe mum obaat werek o.

¹⁰Itithogon mekeat he, tha nen agarlak lak erugi akmurogon welagarek halok he, at ebe lia baga motok dogolik, akhuni nen it aperek waroagaluk ineram nen holak palharek iti hak, it aperek weak hagasuagaluk nukhetdisekherek dek o.

¹¹Itithogon mekeat he, tha nen agarlak lak erugi motok a'it welagarek halok he, at ebe o mum oba werek o. Itithogon werekma, mum nen ileken mumetdekhemo ebe o mum oba nekhe dogolik, “Koma laga lagei heat,” okodek obakha palek werek o.

¹²Na'buri o. Weak hagakhe lagagip meke Allah nen a'but Yesus hagakhikhe iti baga thagalogo here'isekhe iti nen, an nen holal waganogo hinoba la'i agei o.

¹³Nopase lak o. At alebageik erlo baga nen welagarek meke etnogo ebe hinilu agagisip welagap iti nen, holal waganogo hinoba la'i agei. Nen, elege nagarumi o. Hit nen at obabut weak meke etnogo arat obatne degetdisigip welagap iti nen, holal waganogo hinoba la'i agei o.

¹⁴Yekerugi na'buri o. Ninopase Allah hinilu agasigip welagap iti nen, holal waganogo hinoba la'i ageik, hit nopase lak, at alebageik erloma nen welagarek meke etnogo ebe hinilu agagisip welagap iti nen holal waganogo hinoba la'i ageik, hit elege nagarumi, hit hinobatne werekma Allah ane hinakla werekmaat, at obabut weak meke arat obatne degetdisigip iti nen, holal waganogo hinoba la'i ageik, hagakhi iti o.

¹⁵Meke re, akhuni agat oba meke inobabut inikhok hagakharek meke iti inom, yi meke ti meke agat oba welagarek meke iti inom, hinetaiken hunik dogosak motok dek o. Tha nen it akhuni agat oba meke inobabut inikhok hagakharek meke iti, etaiken hunik welagarek halok he, ninopase Allah etaiken hunik welagarek motok dek o.

¹⁶Nen, akhuni agat oba meke inobabut inikhok hagakharek he, inoba agaken dageigik, yi meke ti meke inileken nen halok warlok apigik, agat oba meke hasik hogorakhigik, hagakharek iti tha'bokhogonat, erlo ninopase Allah 'buk. Erlo re, agat oba mekeat o.

¹⁷Akhuni agat oba meke inobabut inikhok hagakharek iti inom, yi meke ti meke warlok iluk hagakharek iti inom, dek arik wiriogo mekeat he, akhuni Allah akla warlok apekherek meke hagakharek meke iti anek he, iniluk motok dogogun o.

¹⁸Na'buri o. O yogotak he, o ilugun oba welago o. Akhuni aperek nen, “Yabokane ap ageikhe Kristus inom motok weak meke wisigin,” iluk yokhisasukhama, hinasuk holhigip iti hak, o yogotak he, Kristus inom weak meke inebe doalegat arat thelekma asi ageikhasik werek iti nen he, nit nen, “O yogotak eberogonat o ilugun oba welago,” iluk ninetai eketlatluk hutdekhe lago.

¹⁹It akhuni iti inebe re, nit meke palek mekeat he, it inebe eberogonat nit werekmake meke dek o. It inebe eberogonat nit werekmake meke dogolepma re, inebe nit ninom motogat dogolo. Meke re, it iti inebe tha'bokhogonat nit meke dek, ninat meke ekagat hagatlasuagaluk dukhisukha iti o.

²⁰Itithogon meke re, hit anek he, Yesus Kristus Allah nen ekaerek 'bakhasikhe meke etnogo nen Allah Agoreke wokhisasikhemo ebeat wene hinebe tha'bokhogonat hinilu agagisip welagap o.

²¹An nen wene holal waganogo hinoba la'i agei iti, ebeat wene hinokodek nen 'buk. Hinilu welagap iti nenat la'i agei o. Nen, inekalat egarek iti erlo, Allah ebeat meke nen 'buk. Erlo ninat, iluk hiniluat o.

²²At ekalat ekherek meke iti ebe tha apegep. At iti nen, “Yesus ebe Kristus dek o,” iluk kolelogo la'isekherek meke iti dek nogo? Itiat o. At Kristus inom motok weak meke ebe re, ninopase Allah a'but Yesus inom inebe kolelogo la'isekherek meke itiat o.

²³Tha nen, “Allah a'but iti, ebe na'it,” iluk kolelogo la'ekhe halok, opase Allah ebe waganhidegat o. Nen, tha nen, “Allah a'but ebe itiat o,” iluk ane pakhogon ekhe halok, opase allah ebe waganheat o.

²⁴Nen, hit he, wene alebat hinasuk holhigip meke iti, hinakla waganiluk nen, eberek motogat dogono. Itithogon eberek dogogun halok he, hinebe ninopase Allah a'but Yesus ipisak hinom hunik dogogun o.

²⁵Nen, at ekaerek nen, “Wokhisagein,” iluk abok yoknisasikhe etnogo, ninebe naburlal-haburlal hagatninabigiluk isikhe o.

²⁶Wene yi tha'bokhogonat it akhuni hit nukhetdinagouogoluk walhiliogei meke hasik holal waganogo hinoba la'i agei o.

²⁷At Kristus nen Allah Agoreke wokhisasikhemo hinakla dogolik, yi meke ti meke hasik, ekalat yakulhisigidek, eberogonat anek yakulhisiliogo iti nen, akhuni aperek nen wene hit yakulhisausak erlok dek o. Wene at nen yakulhisiliogo meke iti mothogonat hagakhe dogolik, Kristus hinom hunik motogat dogono o.

²⁸Na'buri o. Kristus wisigin itinem ebe wagunem, nit ninekarli ageidek, ninayuk degat, at elokhoma apma ukuok nen, hit at hinom hunik motok dogono o.

²⁹At Kristus Allah a'but obabut hano mothogon anek hagakherek etnogo hinilu halok he, hit hinakla nen he, “It akhuni aperek inobabut hano mothogon hagakharek meke inebe tomok Allah a'buri yabokane itaginakhemo werek,” iluk hinilu asusagat o.