Read Mid Grand Valley Dani 1 Yohanes 3 Bible Online

1 Yohanes 3 - Mid Grand Valley Dani bible

1 Yohanes 3

¹At Allah nen he, “It yi an na'buri,” iluk itakninakhikhemo eberogonat nit ninebe at a'buri welago. Itithogon welagorek iti nen, ninebe at akmu motok welagarek iti 'bikhani! Itithogonat mekeat he, it akhuni agat oba meke inobabut inikhok meke emenogo nen Allah ebe inokodek iti nen he, nit ninebe inokodegat o.

²Nagarlak lak nerugi, nakmu lak o. Yogotak nit ninebe Allah a'buri welago meke re, yabokane ninebe dogogun meke thelekma ageidek aban limago werek o. Itithogonat meke re, nit ninilu re, Yesus ebe yogotak werek meke ninileken hutukhogon hugun iti nen, at wisigin itinem ebe wagunem, nit ninebe at ebe werek iti hagat, hagatlasugun o.

³Nit ninakla nen, “Itithogon hagatlasugun,” iluk oba eberek welagorek meke ninebe tomok nen, at Kristus ekaerek ebe karelek welagarek iti hak, nit itithogonat karelekhe dogosak o.

⁴Nen, akhuni nen weak hagakharek iti Allah aneat thagalharek iti nen, tha nen weak hagariogo halok, Allah aneat thagalogo hagariogo.

⁵At Kristus ekaerek weak hagakhidek dogolik, nit weak hagakhorek meke thagalogo degetdisagaluk ebe thelekmaat wageikhe iti hinilu o.

⁶Iti nenat, nit at ninom hunik motok welago meke, ninebe tomok weak hagakho motok welagorek dek. Meke re, it akhuni aperek weak anek hagakho motok welageikharek meke inebe tomok, at ebe inileken higidek inokodegat werek o.

⁷Na'buri o. It akhuni aperek nen nukhetdinagunogo iluk hinobabut hebelogo dogono o. Tha nen obabut mothogon hagakherek halok he, at Kristus obabut mothogon hagakherek iti hagat, hagakho werek o.

⁸Nen, at ageikhe nen obabut weak hagakho motok welagarek halok he, at Iblis obabut erlo baga nenat weak hagakherethekma nogo nen, at iti ebe Iblis a'but werek o. Meke re, at Allah a'but thelekmaat wageikhe iti, at Iblis obabut hagakherek meke iti, motok degetdisagaluk wageikhe o.

⁹Nen, akhuni Allah nen itaginakherek meke inebe tomok, at obabut waganiluk hagakharek iti nen, weak hagakho motok dogosak dek. Inebe Allah a'buriat dogolik weak hagakho motok welageikharek dek o.

¹⁰Allah a'buri inom, Iblis a'buri inom, ninetai ekerlogo inobabut ekagat hagatlariogo yi. Tha nen obabut mothogon hagakhidegat, agarlak lak erugi akmurinakhidegat, hagariogo halok, at iti ebe Allah a'but dek o.

¹¹Wene Allah nen he, “Hit-hit nakmu-hakmurogon dogono o,” iluk yoknisasikhe meke, akhuni aperek nen yokhisasukhama erloma nen hinasuk holhigip itiat o.

¹²Nit nen he, at Kain ebe Iblis obabut weak meke iti a'but ageikhesik ekaerek agot meke wakhikhe iti hagat, hagasusak dek o. At nen agot wakhikhe iti, nenaluk wakhikhe. At hagakhe lageikhe meke korlo motok nen, agot hagakhe lageikhe meke mot motok, iti nenat wakhikhe o.

¹³Halok he, nagarlak lak nerugi o. Akhuni agat oba meke nen, hit ina'it motok hagathinakho halok he, “Nayuk o,” iluk hinelabut hikhup o.

¹⁴Allah nen ninebe watlageikharekma nen wokninabiluk iniluk welageikharekma 'binanhemo welago iluk, nit-nit ninagarlak lak ninerugi ninom nakmu-hakmurogon welago iti nen hutdekhe lago o. Halok he, tha nen akhuni aperek akmurogon dek, a'it welagarek meke iti ebe watlageikharekma etomaat werek o.

¹⁵Inagarlak lak inerugi motok ina'it welageikharek meke iti, it inebe tomok akhuni inakharek mekeat o. Nen, it akhuni inakharek meke iti, inebe tomok naburlal-haburlal iteerek ageidek motok werek o, iluk ninilu o.

¹⁶At Kristus nen tak nit akmutninakhikhesigat, ebe nit ninobasik eram nenat watlageikhe iti nen, nit nen it akhuni aperek inakmurinakharek wene iti, hutdekhe lago. Hutdekhe dogolik, at hagakhikhe iti hagat, nit ninagarlak lak ninerugi inebe ninakmu nen, ninebe it inobasik watlasusak hanoat o.

¹⁷Meke re, tha nen at ameke yi meke ti meke agat oba meke 'biluk dogolik, agarlak ageikhe yi meke ti meke erlageik werekma ileken halogat he, ageikhe wogokhidek etaiken a'bet aga halok, at iti obabut he, Allah nen akmutninakherek iti hakene werek apegep? Motok dek o.

¹⁸Halok he, na'buri o. Nit nen akhuni aperek ninakmurinakhidek dogoligat he, ninape baga anek he, “Ninakmurinakhe dogouok o,” iluk ekhe dogosak erlok dek o. At he, inebe ninakmurinabiluk, niniki baga nen eberogonat yomageisekhe dogouok o.

¹⁹Nit nen ninobabut itithogon hagakhe dogolik, ninakla nen he, “Nit ninebe Allah eberogonat meke a'buri welago,” iluk hutdusak. Itithogon hutdekhe dogolik, nit weak hagakho, iluk ninakla akin welago halok, nit ninebe erlok dek meke re, at Allah anek he, ebe kok dogolik, yi wene ti wene tha'bokhogonat ilu anek welagarek, iluk, at ilhanem ninakla the ninayuk dekhogonat dogosak o.

²¹Halok he, nagarlak lak nerugi. Hinebe nakmu o. Nit ninakla nen, “An weak ageikhe hagakhi,” iluk wene munini ebekhidek, ninakla the welago halok he, at elokhoma ninayuk dekhogon dogolik

²²at nen wene ninasuk wakhikhe wene mothogon hagakhik, at ilhanem akla hanorogon anek hagakhik, hagakhe lago iti nen, nit yi meke ti meke kino yogokhunem, at nen woknisiliogo.

²³At nen wene ninasuk wakhikhe iti, ebe re, “Hit hinetaiken an na'but Yesus Kristus oba hakotdiluk, at nen yokhisekhe iti hagat, hit-hit nakmu-hakmurogon dogono o,” iluk ninasuk wakhikhe itiat o.

²⁴Nit Allah nen wene ninasuk wakhikhe wene iti hologo mothogon hagakhe lago halok he, at Agoreke woknisasikhemo ninakla werek, iti baga, nit at ninom hunik, nen at nit ninom hunik welago, iluk hutdekhe lago.