Read Mid Grand Valley Dani 2 Yohanes 1 Bible Online

2 Yohanes 1 - Mid Grand Valley Dani bible

2 Yohanes 1

¹At nen, Allah a'buri therisik dogoagaluk, at nen meldanhikhe meke hinoe etnogo nen, hit Allah a'buri itakhinakhikhe meke hinebe re, he opakiat meke ebe Allah nen wenakhikhe meke eagei inom hakenema, wene yi heagei warogo holal waganogo hinoba la'i agei o. Hinebe eberogonat nakmu o. An narligat anek hinebe nakmu welagei 'buk. It inebe tha'bokhogonat ninom ebeat wene yogotak ninakla dogoluk yabokane motok-motogat dogogin meke iti waganhukhasik inilu agoukha meke nen inakmuthinakhaat o.

³Iti nen, nagarlak lak nerugi. Nit ebe wene waganiluk, nit-nit nakmu-hakmurogon werekma, ninopase Allah a'but Yesus Kristus ipisak inobabut hano etnogo nen hano meke woknisigik, inakmutdinanhik, ninetaiken hapugutdinanhik, hagakhe dogoak o.

⁴Hit hinebe re, he opakiat meke eagei hakene dogolik, hinebe aperek ninopase Allah nen ebeat wene ninasuk wakhikhe etnogo mothogon hagakhe lagap meke hinobabut palhirik, nakla arleken motok akhekhe lagei o.

⁵Iti nen he, neru o. Wene ket meke holal waganogo heagei hinomat werekma hinoba la'i agei 'buk. Dek o. Nit ebeat wene iti hutdisugumo, at Allah nen nit-nit nakmu-hakmurogon dogoagaluk erlo baga nenat ninasuk wakhikhemo ninilu meke holal waganogo hinoba la'i agei iti o.

⁶Nit-nit nakmu-hakmurogon dogosak iti ebe re, wene Allah nen ninasuk wakhikhe wene etnogo mothogon hagakhe dogosak itiat o. Wene ninasuk wakhikhe iti re, ebe yi, “Hit-hit nakmu-hakmurogon hagakhe dogono,” iluk erlo baga nen ninasuk wakhikhemo holhugu iti hagat hagakhe dogosagat o.

⁷Itithogon hagakhe dogosak iti, it akhuni inebe doalegat nen, “Yesus Kristus iti abat itaklasi ageidek,” iluk, nukhetdisegarek meke inebe thelekma ageikhasik agat oba yi ai ti ai tha'bokhogonat liliogei iti nen, nakmu-hakmurogon hagakhe dogosak igi iti o. It iti inebe re, Kristus inom motok weak dogolik akhuni nukhetdisegarek meke etnogoat o.

⁸Nen, nit nen hit hagatdinagakhe lagagu etnogo hasik, hit aperek oko waganhidek nuk asunogo iluk, tha'bokhogonat waganubageik nen he, hinobabut hebelogo dogono o. Dogolik Allah nen, “Hit oko wokhisagein,” iluk wene abok yoknisasikhe etnogo, hit aperek nuk ageidek tha'bokhogonat horlobageik nen, hinobatnerogon hagakhe dogono o.

⁹Tha nen wene Kristus nen yakulnisasikhe wene iti baga dukhogon hagakho welageidek, ninat meke hagakherek halok he, Allah ebe iteerek ageidek werek o. Itithogon mekeat he, tha nen wene Kristus nen yakulnisasikhe wene iti baga dukhogon hagakho dogogin halok he, ninopase Allah inom, a'but Yesus inom, ipisak iteerek agasik werek o.

¹⁰Akhuni aperek nen wene Kristus nen yakulnisasikhe wene dek, ninat wene yakulhisa agunem, tha nen akhuni inobabut itigirlik meke heagei warogo aila waganhunem, at obabut weak hagakherek meke iti obabut horlekherek iti nen he, hit nen akhuni inobabut itigirlik meke heagei warogo hinaila woginabusak motok dek o.

¹²Wene doalegat hinoba la'isusak werek mekeat he, disu apusu thuesika baga holal waganusak, na'it o. Ninakla arleken akhekhe lago meke iti ebenageikmo arleken akhauwogoluk, opakimo wenekak ninom ninilhaoak hut-hut uogoluk, an nebe hinoba wisigin apekhe lagei o.

¹³He ageikhe Allah nen wenakhikhe meke, eagei nen inagosa he ebe heagei wasu hak, it Allah a'buri yoma meke nen, hit heagei wathinakha o.