Read Mid Grand Valley Dani 3 Yohanes 1 Bible Online

3 Yohanes 1 - Mid Grand Valley Dani bible

3 Yohanes 1

¹Gayus nagarlak o. An nen Allah a'buri therisik dogoagaluk meldanhikhe meke hinoe etnogo netaiken oba nen hebe eberogonat nakmu welagei, iluk, wene yi holal waganogo hoba la'i agei o.

²Nagarlak o. Hat hetaiken Allah baga hakotdiluk dogolik hano welagan iti hagat, hoba u dek hano dogolik yi hasik ti hasik hano hagakhe dogonogoluk, sembayan hat hobasik ekhe lagei o.

³Hat nen ebe wene hasuk hologo hano hagakhetek iti nen, it Allah a'buri nagarlak lak aperek noba wageikhesik, men yoknekha, “At nen ebeat wene herogo dogolik hano mothogon hagakherek,” iluk habok yoknekhama nasuk holhirik nen, nakla arleken motok akhekhe lagei o.

⁴Itithogon isinem an nen yi hasik ti hasik nakla arleken herlekha'bugat negen akhegerek mekeat he, hit hinebe an na'buri nen ebe wene herogo dogolik, hano mothogon hagakhunem nasuk holherethek nen, nakla arleken motok kogat akhegerek iti o.

⁵Nagarlak hebe nakmu o. Hat ha'it ageidek Allah a'buri nagarlak lak nerugi inebe hilu meke hokodek meke tha'bokhogonat yomageisekhe lagan meke nen he, “At nen nit akmutninabiluk itithogon woknisekhe,” iluk Allah a'buri yoma meke yogeisa ageikhama nasuk holhi o. Itithogon hagakhen iti hak, it iti nen Kristus obasik akhuni aperek wene inokodek meke yogeisa lagunem, it nen yi meke ti meke ageikhe wogeisigidek meke re, hat nen Allah akla hanorogon yomageisalok la'isekhe dogoumo, hano o.

⁸It iti ebe wene Allah ane etnogo hasik hagariogei iti, nit ninom nenat hagasu hak hagakhe dogoak nen, yomageisekhe dogosagat o.

⁹An nen hit Allah a'buri inobasik holal 'berorlagat waganogo hinoba la'i agagi mekeat he, at Diotrefes akla nen he, “An Allah a'buri inoe kok hagatlasu warlok,” iluk apiliogo meke iti anek he, an nane hologo hagariogo dek iti o.

¹⁰Itithogon hagariogo iti, ageikhe, ekalat nit ninabok weak iliogo. Itithogon ekhe dogolik, akla nen he, “An hagakhe lagei iti, herlekha'bugat. Nakla nen erlok dek. Yabokane ageikhe inomat hagasiginat o,” iluk apekhe dogolik, it Allah a'buri aperek wagunem, at ekaerek nen woginakhidek dogolik, it aperek nen woginabuogoluk hagakhunem wenageisalok, inebe Allah a'buri natogokharekma nen mukhogo ula'isekheregat iti nen, an nebe witluk nen, at hagariogo meke iti hutduagaluk ekarli wasigin o.

¹¹Nagarlak o. Hebe nakmu. Hat nen he, it akhuni inobabut weak hagakharek meke iti, inobabut waganhun o. It inobabut hano hagakharek meke halok, inobabut waganhe dogono o. Tha nen obabut hano anek hagakherek meke iti ebe Allah a'but mekeat he, tha nen obabut weak anek hagakherek meke halok, at nen Allah ebe ileken hekerek dek okodek o.

¹²Itithogon mekeat he, at Demetrius hasik anek he, akhuni tha'bokhogonat men, at Allah eberogonat anek ekherek etnogo men, an men, “At hano hagariogo,” iluk abok hano ogorek. At abok ogorek iti, eberogonat hano ogorek iti hit hinilu o.

¹³An nen wene doalegat hoba la'i isusak werek mekeat he, disu apusu baga holal waganogo hoba la'i isusak na'it aga o.

¹⁴An nebe ibat-ibat hoba witluk wenekak ninom ninilhaoak oba hut-hut ugun o, iluk apekhe lagei.

¹⁵At Allah obabut hano etnogo nen hetaiken hapugutdagakhe dogoak o. Nagarlak. Nen, it ninagarlak lak ninerugi yoma meke ninom hunik meke nen heagei wathakhaat o. Nen, nit ninagarlak lak nerugi ninom hunik meke o etoma werek meke, “At nen heagei wathinakhe,” iluk inebe tomok inetaga 'bikhigik yogeisano o. Nagarlak.