Read Mid Grand Valley Dani A'bikaka 15 Bible Online

A'bikaka 15 - Mid Grand Valley Dani bible

A'bikaka 15

¹Nileken itithogon lakhigirik oba nen, yabokane, akhuni nen hutduagaluk, elalin meke ageikhe kok meke inayuk meke hakene yigithogon pogot oba winam agunem lakhigi. Ilugun kobokhogon Allah akla aga inoba 'biluk weagarinabigin iti nen, iniki 7 baga weagarinabigin meke, malaikat inebe 7 bagaat winam agunem lageisigi.

²Itithogon higirik oba nen, yabokane, i laut elokhoken mirli inamukhak hakene hetu inom dapuk-hapukhogon yekelek meke lakhigi. Itithogon lakhigirik lakhigi meke, akhuni aperek inetaiken helo yeke hakene etnogo inom, kaneke at ebe hakene alino hagarek etnogo inom, inetaiken inoba hakotdiluk hogorinakhidegat, nen etaga iniki wenago holal waganek meke etnogo waganhidegat, hagakhe lageikha baga inobatne ageikhesik, pikon gitar hakene Allah nen wogeisekhemo inikimo wolok, i laut yekelek iti yipitla metek werekma lageisigi o.

³Itithogon dogolik, etai at Musa Allah atuaneke etnogo inom, Domba Eak etnogo inom, ipisak inaetai wakhe dogolik men ekhe lageikha, “Allah ninopase, — u a e, Hat hobatne horleakma re, — u a e, Yi meke ti meke hagasusak anekma, — u a e, Elalin kokhogon inayuk meke anek hagakhetek o, — u a e, Hat yi akhuni ti akhuni inopase Hetagapogot dogolik, — u a e, Mothogon anek hagarinakhetek, — u a e, Hano anek hagarinakhetek, — u a e, Ninopase, — u a e. Ninopase Hetagapogot hat harligat karelogo dogolik, — u a e, Akhuni ukum inoba 'bigik, kokhik, hagakhe dogolik, — u a e, Akhuni tha'bokhogonat inil oba, — u a e, Eberogonat motok hagakhen o, — u a e, Akhuni inukuloak etaga tomok tha'bokhogonat, — u a e, Hapma ukitluk, — u a e, Initibagal yukukhogon, — u a e, Hogothakhik, heagei wathakhik, hagakhunem, — u a e, It akhuni thani hak nen hat inayuk dek dogolik, — u a e, Hogothakhidek huk asusak, — u a e, Dek, — u a e,” (...)

⁵Itithogon hisigirik oba nen yabokane pogot oba Allah ai halekma thu hualagunem akla, at Allah ebe welagarek iluk, o su ai meke halek etnogo werekma lakhigi o.

⁶Itithogon thu hualek werekma, it malaikat inebe 7 baga inasu kut thobalek a'bi'bal weak motok etaga lenan ugu, nen, thin ikharek hak, emas meke inamigoak oba ugu meke, Allah nen iki 7 baga akhuni weagarinabigin meke wolok dukhi ageikha lageisigi.

⁷Itithogon dukhi ageikhasikmo, it Allah nen winametdisasikhe meke iniluk welageikharek meke inebe 4 emenogo meke ageikhe nen, isoak ebe 7 emas meke hagarek oba Allah iluk motok welagarek meke akla aga i negen henago meke, Allah nen it malaikat inebe 7 baga emenogo wogeisekhe laga lakhigi.

⁸Wogeisugunem, Allah ai halekma etnogo Allah obatne horleak hogorakharek meke inayuk negen etnogo hetu thode negen kerlek agama, it malaikat inebe 7 emenogo nen Allah nen akhuni weagarinabigin etnogo ilugun hurli baga weagarinakhidek werek korlek, akhuni aperek Allah ai halekma iti ukekhe lageikha hisigi motok dek o.