Read Mid Grand Valley Dani A'bikaka 17 Bible Online

A'bikaka 17 - Mid Grand Valley Dani bible

A'bikaka 17

¹Itithogon higirik nen yabokane, it malaikat inebe 7 baga nen Allah akla aga i henago negen wolok tialha emenogo meke ageikhe wagasik nen, men yoknekhe, “It akhuni o kota Babel meke, he kok yugunisake ya hagakhik nekherek meke hakene iti, i kok meke aik oba dogolik, ap koktek inetagapogot agat oba meke nen at inom param hagakhik, akhuni aperek nen anggur apusu nasi motok dogolik, hunu-hunu ageikharek iti hak, akhuni agat oba meke nen at inom param hagakho motok welageik, hagakherek meke iti, Allah nen he iti ukum oba 'biluk ebe weagatdigiluk awim ka'belhe meke yokhisik nen eme o,” iluk yoknekhe.

³Itithogon yoknikhunem, Allah Agoreke noba duk i agama, at malaikat etnogo nen woknarik, o akhuni dekma limo laga. Itithogon woknarik lagama eloma dogolik, lakhigi meke, he etnogo helo yeke hakene kok isi morla pimut hakene meke apot oba yasukhogon lagunem lakhigi. Helo yeke hakene iti ukuloak, 7 baga, nen, aik ukuloak oba, 10 nen ulabek, nen, ebe obake, Allah etaga wiik-weakhogon hagasusak meke holal kirlik-kerlekhogon waganek meke lakhigi.

⁴Nen, he iti asu ageikhe elokhoken morla pimut hakene, nen, ageikhe elokhoken ki'bi-ki'bi warek hakene, meke ugu. Nen obake, emas meke inom, helekit eken hupurlekentek oko doalegat palharek meke etaga permata inom, mutiara inom, obake waganek dogolik, obabut weak hagakhik, param ha'uagaluk hagakhik, itithogon yugunat ya hagakhik nekherek meke iti, isoak emas meke baga henago ikimo hago welaga lakhigi.

⁵Nen, wene ebe limago meke ilhaoak oba yigithogon holal waganek, “Akhuni agat oba meke yugunat ya hagakhik nekharek meke inom, inobabut korlo motok weak hagakharek meke inom, tha'bokhogonat inagosa etaga Babel kok yi,” iluk holal waganek welaga lakhigi.

⁶Nen, he iti nen, Allah a'buri meke inom, Yesus ane yogeisilik nekharek meke inom, inakhikhe meke inamep nekesik, akhuni nen anggur eken apusu nalok hunu-hunu ageikharek hak, hunu-hunu agasikmo lakhigi. Itithogon lakhigirik nen motok hogorakhi.

⁷Itithogon higirik, hogorakhe lageima, malaikat etnogo nen men yoknekhe, “Nenaluk hogorakhe lagan? An nen, he iti inom, helo yeke hakene ukuloak 7 baga, nen, aik ukuloak oba 10 baga nen ulabek meke, he iti apot oba yasukhogon werekma wolok lagarek meke iti inom, ipisak inobasik wene limago werek meke pilinerogo yokhisik o.

⁸Helo yeke hakene hegen iti, alep iluk welageikhe mekeat he, yogotak elokhe dek hegen iti, wema baga kilinmo nen dageisigin o. Dagei aga halok, Allah nen alomatdigin o. Nen, Allah nen agat aban winametdigidek dogolik, thuesika it akhuni iniluk motok dogoagaluk hanorinabigin meke, inetaga holal waganek iti baga, it aperek inetaga holal waganek dek meke nen helo yeke hakene iti inileken halok, it nen he, Helo yeke hakene yi, alep welageikhesik nen, elokhe dek ageikhe mekeat, yabokane winam aga yi, ninayuk o, iluk hogorasugun o.

⁹Nen, wene yokhisigin yi hasik, inakla kagalek werek meke anek hutdusak o. At helo yeke hakene iti ukuloak ebe 7 baga nen hegen iti ebe, tom ebe 7 baga nen, at he iti kok welagarek oba werek meke hegen o. Nen, ageikhe ap koktek inetagapogot inebe 7 baga nen werek meke hasik hegen o.

¹⁰Nen, it koktek inebe 7 baga nen iti meke, inebe 5 arat kobokhogon usegama, inebe pere werek meke iti, ageikhe arat kok dogolik, akhuni apma 'bisalok hagasik werek. Nen, ageikhe aban wageidekma, yabokane kok atuluk akhuni apma 'bisalok hagasik motok dogogin dek o. Iki pererlagat dogogin o.

¹¹Helo yeke hakene alep welageikhe mekeat, elokhe dek iti ebe koktek inebe 7 baga nen emenogo arat kobokhogon usilik usilik waga lageikhasik, it 7 iti meke ageikhe yabokane apuke kok atluk, iniki wenago 8 hakene hagatlatluk, yabokane Allah nen alomatdigin meke hegen o.

¹²Nen, aik ukuloakma 10 baga nen ulabek hegen iti ebe re, ap inebe 10 baga nen kok asugun meke aban werek meke hegen mekeat he, it koktek meldisaumo, at helo yeke hakene etnogo inom, o mo il opakiat, satu jam hakene anek kok dogolik akhuni hagasik dogogun meke hegen o.

¹³It iti inetaiken opakiat dogolik, at helo yeke hakene etnogo yogokhe dogolik, Nit koktek dogoagaluk meldinanhama ninetagapogot welago meke iti, harat hetagapogot dogonogoluk iteerek 'bagago o, iluk yogokha.

¹⁴Itithogon iteerek 'biluk, Domba Eak etnogo wim inom yabuogoluk hagasugun mekeat he, at Domba Eak ebe akhuni koktek meke inom, motok inetagapogot meke inom, tha'bokhogonat inoe etagapogot siakthek aratma re, a'buri wenageinabiluk inayoko 'bisekhemo inobabut at hasik hupukhogon hagakharek meke emenogo, at werekmake atluk, inom nen, at helo yeke hakene etnogo agarumi inom inobatne degetdisagun o,” iluk yoknekhe.

¹⁵At malaikat etnogo nen itithogon yoknekhesik, ageikhe men yoknekhe, “At he yugunisake hagarik nekherek meke hakene iti, ebe kok welagarekma i hegen iti ebe, akhuni tha'bokhogonat inukuloak etaga tomok, inoado tomok, inaila o etaga tomok, inane tomok meke hileken hisegen o.

¹⁶Nen, aik ukuloakma 10 baga ulabek hegen etnogo inom, helo yeke hakene ebe etnogo inom, ipisak nen, he yugunisake hagarik nekherek meke iti, ina'iretdiluk, at meke yi meke ti meke horligik, ebe alwurlugat here'isalok, ebe warogo abel ebelake neke dogolik, abel ebelake hetu hundugun o.

¹⁷Itithogon hagasugun iti, Allah nen isikhe meke tak-tagat hagatlasuagaluk, at akla apekherek meke iti, it ap koktek iti inakla kagalhemo, it inetaiken opakiat dogolik, it nen, at helo yeke hakene etnogo yogokhe dogolik, Nit kok ninetagapogot welago meke iti, hat kok hetagapogot werek dogonok o, iluk iteerek 'biluk, inom nen he yugunisake hagarik nekherek meke etnogo ebe wasugun iti.

¹⁸Nen, he meke hileken hegen iti ebe ap koktek inetagapogot agat oba meke tha'bokhogonat apma 'bisalok hagasik welagarek meke, o kota kok meke egarek etnogoat hileken hegen o,” iluk yoknekhe.