Read Mid Grand Valley Dani A'bikaka 22 Bible Online

A'bikaka 22 - Mid Grand Valley Dani bible

A'bikaka 22

¹Itithogon yakulnekhemo higirik oba nen yabokane, Allah inom, Domba Eak inom, ipisak kok motok welageikharekma inobolukmo nen, i inilugurinakherek meke elokhoken mirliak hano inamukhak hakene meke elesi hunalogo dukhitluk nen,

²o kota etoma holagarlem abel ebelak-ebelak lageikharekmake werekma, i etnogo tumo lagarekma higi. Itithogon laga korlek, i aik ilibagan yibagan, o ai yago werekma higi. O iti eken nasinem inilugurinakherek meke etnogo, thut opakiat oba eken ageikhe ikhik, thut ageikhe baga eken ageikhe ikhik, ikhe korlek o mulikin dageigik, usigik, hagakhe korlek tahun opakiat oba eken hurli 12 oba nen ikherek meke welaga iti. Nen, eka baga, yi akhuni ti akhuni inukuloak etaga tomok hanorinakherek meke higi.

³Nen, alep Allah nen akhuni inom, yi meke ti meke inom, homan 'bisasikhe meke etnogo korogo 'bisalokma nogo nen he, yabokane o iti oba homan korek welaga higi. Allah inom, Domba Eak inom, ipisak kok motok welageikharekma inobolukmo etnogo, o kota etoma tumo werek korlek, it akhuni Allah atuaneke meke inetaiken at oba hakotdiluk dogolik, at hasik hagakhe dogogun hisigi.

⁴Itithogon hagakhe dogolik, Allah etaga it inilhaoak oba holal waganekma, it nen at elokhoken inileken hekhe dogogun o.

⁵Nen, Allah ebe a'bi'bal it inebe liarinakhe korlek nogo nen, o hibako degat, nen isagal inom, mulikin inom, yakhe dogosak degat, werek korlek, it koktek inetagapogot dogolik, akhuni aperek inapma 'bisalok hagasik motok-motok dogogun hisigi o.

⁶Itithogon hisigirik werekma at malaikat etnogo nen yabokane yoknekhe dogolik, “Yi wene ti wene hagatlagunem lakhalok wagan iti, wene iti eberogonat, iluk hetaiken hakotdusak meke o. Wene iti il opakiat dogoluk dek ibat-ibat hagatlasigin meke o. At ninopase Etagapogot Allah Agoreke it ap at ane yogeisegarek meke wogeisekherek meke etnogo nen, at atuaneke meke yogeisoagaluk an malaikat la'ani agama wagei o,” iluk yoknekhe.

⁷Itithogon yoknikhunem, at Yesus nen men yoknekhe, “Lakhan! An ibat-ibat wisigin o. Itithogon wagunem tha nen yi wene ti wene holal waganek meke yi asuk hologo mothogon hagakhe dogogin halok, Allah nen hanotdisinem akla arleken akhagein o,” iluk yoknekhe.

⁸Itithogon yoknekhemo, yi wene ti wene tha'bokhogonat yi, an Yohanes yoknikhunem nasuk holhik, nileken higik,hagakhi o. Itithogon nasuk holhik, nileken higik, hagakhirik nen, at malaikat wene iti an nileken lakhoagaluk yakulnekhe laga meke etnogo, nitibagal yukukhogon hogorasigiluk hagakhi.

⁹Itithogon mekeat he, at nen men yoknekhe, “A! An itithogon hogotnabusak dek o. An nebe, hat men, hagarlak lak aperek at Allah ane yogeisegarek meke men, it aperek inebe tha'bokhogonat wene holal waganek yi inasuk hologo mothogon hagakhe dogogun meke men, ninom tak-tak, ninebe at Allah atuaneke anekma, hetaiken at Allah oba hakotdiluk, at anek hogorasusak o,” iluk yoknekhe.

¹⁰Itithogon yoknekhesik oba nen, yabokane yoknekhe dogolik, “Yi wene ti wene Allah nen ekhe meke yi ibat hagatlasigin iti nen, sirlo 'begarek iti hak, Akhuni yogeisausak dek, iluk wene hakla atluk thogotdigidegat yogeisekhe dogono o.

¹¹Yogeisugunem, tha nen, obabut weak anek hagarekhe dogogin apekhe halok he, weak anek hagarekhe dogoak o. Nen, tha nen weak inalilo meke anek hagarekhe dogogin apekhe halok he, iti mekeat hagarekhe dogoak o. Nen, tha nen Allah akla apekherek meke anek hagakhe dogogin apekhe halok he, itiat hagakhe dogoak o. Nen, tha nen ebe Allah hasik 'bisalok dogogin apekhe halok he, ebe Allah hasigat 'bisalok dogoak o,” iluk yoknekhe.

¹²Itithogon yoknekhemo, at Yesus nen yoknekhe dogolik, “Erlo inom, ekapul inom, anatma, ebekeram erloma nen logat yabokane ilugun oba nikhok motok dogogin meke nen, akhuni inebe tomok inobabut hagakharek meke tak-tagat oko wogeisagaluk wolok ibat-ibat wisigin o.

¹⁴Nen, it aperek inasu hanorogon thobalogo 'bakhalok dogogun meke anek he, Allah nen hanorinakhunem inakla arleken akhalok, o eken nasinem inilugurinakherek meke etnogo eken nikik, nen o kota etoma holagapema ukekhe dogouogoluk iteerek atluk dogogun.

¹⁵Itithogon mekeat he, it akhuni aperek weak inalilo meke yeke hagakharek hak hagakharek meke inom, it elo dek elalin inakharek meke inom, it param ha'isigik, ha'isoagaluk hagakhik, hagakharek meke inom, it akhuni inakharek meke inom, it inetaiken kaneke oba hakotdiluk dogolik hogorakharek meke inom, it inape baga nen nukhetdisigik, yi meke ti meke hagakhe dogolik, nukhetdisigik, hagakharek meke inebe tomok inom, tha'bokhogonat o kota iti abel itikmanke dogogun o,” iluk yoknekhe.

¹⁶Itithogon yoknekhesik, at Yesus nenat, yabokane yoknekhe dogolik he, “Yi wene ti wene yi abok, an nagot malaikat nen hit na'buri o yi ai ti ai natogokhethep meke tha'bokhogonat yokhisoagaluk hinoba la'i agei iti, an Yesus nenat o. Nen, o aku dukhekherek iti hak, ap Daud nen itago meke etnogo, an nebeat o. Nen, husagal wap o mulikin yegelogo dagei agarekma tak-tak, lia'i agarek meke a'bi'bal weak etnogo anat o,” iluk yoknekhe.

¹⁷Itithogon yoknekhesikmo nen, yabokane, men yoknekhe, “Tha nen i abu nen nausak warlok halok he, i inilugurinakherek meke okorlek werlegat horlalok noagaluk, Allah Agoreke inom, Domba Eak age negen waganhe meke etnogo inom, ipisak nen ekhe dogolik, Naetni o, iluk yogeisugunem, it aperek inebe tomok it ipisak inane inasuk holiogei meke nen, Naetni o, iluk ekhe dogosagat o,” iluk isinem holhi.

¹⁸An Yohanes nen hit aperek wene yabokane hagatlasigin wene an yoknekhe meke iti hinasuk holugun meke hinebe tomok wene ageikhe yi yokhisak, “Tha nen wene holal waganhi meke yi werke korlegat, wene ninat meke oba lapelogo 'bekhe halok he, Allah nen akhuni ukum inoba 'biluk weagarinabigin iluk ekhe meke holal waganogo 'bigi meke yi tak-tagat, Allah nen at iti ukum ageikhe inom lapelogo oba 'biluk ebe weagatdiginat o.

¹⁹Nen, tha nen yi wene ti wene yabokane hagatlasigin meke yoknekhe meke holal waganhi meke yi werek korlegat he, wene iti meke ageikhe thebelogo usakho halok he, o eken nukunem inilugurinakherek meke iti eken ageikhe at noagaluk werek mekeat he, Allah nen he, Hat nausak dek, iluk yogokhik, nen, o Allah ekaerek ai o kota etnogo at iti iteerek atluk dukhigik-ukigik, hagakhe dogoagaluk werek mekeat he, Allah nen, Hat ukusak dek, iluk yogokhik, igin,” iluk yokhisigi iti o.

²⁰Nen, wene iti tha'bokhogonat, eberogonat iluk ekherek meke, at Yesus etnogo nenat, “An ibat-ibat wisigin o,” iluk iliogo. Itithogon isinem, an nen he, “Yesus noe. Hat ibat-ibat wisigin iti, ebeat asuak u hak, Amin, wetno,” iluk ekhe lagei.

²¹Nen, hit Allah a'buri o yi ai ti ai natogokhethep meke tha'bokhogonat, nagarlak lak nerugi. Ninoe Yesus obabut hano etnogo nen thethisik dogoak o.