Read Mid Grand Valley Dani A'bikaka 5 Bible Online

A'bikaka 5 - Mid Grand Valley Dani bible

A'bikaka 5

¹Itithogon hagakhunem nileken hisigirikmo nen, oporlik at kok etnogo ebe welagarekma obolukmo dogolik, thuesika uanat meke baga holal abel itikmanke akmanke waganek meke dikilik werekma, “It aperek inileken 'bikhausak dek,” iluk sirlo 'begarek hak, apusu 7 baga tetnekhogon 'bisukha meke ikimo hago werekma nileken higi.

²Higirik werekma, at malaikat obatneak meke ageikhe nen ane kokhogon ekhe dogolik, “Thuesika uanat meke baga holal waganek dikilik yi, 'Bukalusak dek, iluk sirlo 'begarek hak, apusu dekelogo 'bisukha meke yi, tha iteerek dogolik erlok wokhalok 'bukalusak apegep?” iluk itema waganhe.

³Itithogonatma, it aperek pogot oba meke a? Agat oba meke a? At he, wema baga meke a, thuesika uanat meke baga holal waganek dikilik iti, erlok 'bukaldiluk, akla 'bikhausak iteerek ageikhe herageinakha meke re, inebe degat.

⁴Itithogonat ap ageikhe iteerek dogolik nen, thuesika uanat meke baga holal waganek iti, erlok 'bukaldiluk ileken akla 'bikhausak meke motok dek iti nen, nakla korlo agasik, de kogat agei o.

⁵Itithogon de agunem he, ap inarluetek emenogo meke ageikhe nen, “De aga 'buk o. O asi'bat dukhekherek hak, ap Daud nen itago meke ap inukuloak etaga Yehuda meke itaklageikhesik nen, ebe helo yeke hakene etaga singa etnogo arat obatne agasik iteerek agasikmo, thuesika uanat meke baga holal waganek dikilik iti, it aperek inileken 'bikhaunogo iluk sirlo hakene 7 baga werek etnogo erlok 'bukalusak o,” iluk yoknekhe.

⁶Itithogon iluk yoknekhesik oba nen, oporlik it Allah nen winametdisasikhemo iniluk welageikharek meke aperek inebe 4 emenogo inom, ap inarluetek inebe 24 emenogo inom, at kok welagarekma obolukmo aliluke werek korlek, inakla turlem Domba Eak arat wakhukha meke ukuloakma aik 7 baga ulabek, nen, ileken 7 baga nenat meke metek welaga. Ileken 7 baga iti ebe, Allah nen Agoreke o yi ai ti ai la'ekherek meke emenogoat o.

⁷Yabokane Domba Eak etnogo waga lagasik nen, thuesika uanat meke baga holal waganek dikilik meke, at Allah kok welagarekma obolukmo dogolik, iki ebeke hago werekma waganhunem nileken higi o.

⁸Itithogon ikimo waganhunem, it Allah nen winametdisasikhemo iniluk welageikharek meke inebe 4 oba emenogo inom, ap inarluetek inebe 24 emenogo inom, Domba Eak etnogo apma ukiluk initibagal yukukhogon hogorakhe lageikha. Itithogon hogorakhe dogolik, it ap inarluetek emenogo inebe tomok gitar hakene meke inom, kemenyan apusu isoak emas meke hagarek meke baga henago meke inom, inikimo hago dogolik etai wakhe lageikha. Kemenyan iti ebe re, Allah a'buri sembayan egarek itiat o.

⁹Itithogon etai ket meke yakulogo wakhe dogolik, “Hat anek he, arat hakhukhama watlagagitik, — u a e, Akhuni tha'bokhogonat inukuloak etaga tomok, inane tomok, — u a e, Inoado tomok, inaila tomok, — u a e, Hat hamep oba Allah hasik oko palogo 'bisalok, — u a e, Iteerek agatik, — u a e, Thuesika uanat meke baga holal waganek dikilik iti, — u a e, Waganiluk nen, sirlo 'begarek iti hak, — u a e, Iki apusu tetnekhogon 'bisukha meke iti, — u a e, Erlogat 'bukalusak, — u a e. It iti inoko palogo 'bisasigitik, — u a e, Ninopase Allah hasik hagakhe dogoagaluk, — u a e, Inukuloak etaga, Allah iteerek, thaligin, — u a e, Inebe kogat meldisasiginmo, — u a e, It nen akhuni agat oba meke, — u a e, Inapma 'bisalok hagasik dogogun, — u a e,” iluk etai wakhunem hisigi.

¹¹Etai itithogon wakhasikmo nen, yabokane ageikhe yigithogon lakhigiat. At Allah kok welagarekma obolukmo etnogo inom, it Allah nen winametdisasikhemo iniluk welageikharek meke emenogo inom, ap inarluetek emenogo inom, inom tumo werek korlek, inaliluke dagak-pagak, it malaikat yi agot doalek ti agot doalek iniki wenasusak motok erlok dek meke dogolik, inane kokhogon men etai wakhe lageikha, “Eak wakhukha meke iti anek, — u a e, Yi meke ti meke apma 'bisigik, — u a e, Ikierek welageik, — u a e, Wene akla kagalek anek welageik, — u a e, Obatneak welageik, hagakherek, — u a e. Halok he, at anek erlok alon halhik, — u a e, Hogorakhik, heagei wakhik, hagakhe dogosak o, — u a e,” iluk hogorakhe lageikha.

¹³Iti hak, it Allah nen winametdisasikhe meke pogot oba meke inom, agat oba meke inom, wema baga meke inom, i laut yekelekma welagarek meke inom, tha'bokhogonat nen etai wakhe dogolik, “At kok welagarekma obolukmo werek iti, — u a e, Eak etnogo ipisagat, — u a e, Irat inobatne werek o, — u a e, Iluk heagei warinakhik, inalon halinakhik, — u a e, Hogorinakhik, hagakho motok dogouok, — u a e,” iluk etai wakhunem holhi o.

¹⁴It itithogon isinem, it Allah nen winametdisasikhemo iniluk welageikharek meke aperek inebe 4 oba emenogo nen men ekhe lageikha, “Ebeat asuak,” u hak, “Amin,” ekhe lageikha. Nen, it inarluetek inebe 24 emenogo meneke, at apma ukiluk initibagal yukukhogon hogorakhunem hisigiat o.