Read Mid Grand Valley Dani A'bikaka 8 Bible Online

A'bikaka 8 - Mid Grand Valley Dani bible

A'bikaka 8

¹Itithogon yoknekhesik oba nen oporlik he, thuesika uanat meke sirlo 'begarek iti hak apusu ebe 7 baga tetnekhogon 'bisukha meke etnogo, at Domba Eak etnogo nen iki 6 oba arat 'bukalhesik oba nen ageikhe 'bukalhunem, pogot oba setengah jam o aren tirlin-terlonhogo welaga higi.

²Itithogon welagama nen, yabokane nileken lakhigi meke, malaikat inebe 7 baga Allah nen pikon ane kok meke hakene ebe 7 baga nenat wogeisasikhemo, at elokhoma metek werekma lageisigi.

³Itithogon werekma, malaikat ninat ageikhe nen, hetuken temekharek meke emas meke hagarek wolok, yi meke ti meke Allah ake hetu hunekharekma emas meke hagarek iti baga wagasik metek welaga. Itithogon werekma, Allah nen, at a'buri tha'bokhogonat sembayan egarek meke inane inom, kemenyan inom, inom-inom hetu hunisuagaluk, kemenyan doalegat wogokhemo, yi meke ti meke Allah hetu hunekharekma emas meke hagarek iti, ebe at kok welagarekma obolukmo etnogo elokhoma werekma oba 'bi lagunem lakhigi.

⁴Itithogon 'bi lagunem nen, Allah a'buri sembayan egarek meke inane inom, kemenyan obasi inom, malaikat etnogo ikimo nen Allah elokhoma dageikhe laga higi o.

⁵Itithogon hagakhesik nen, yabokane at malaikat etnogo nen hetu yi meke ti meke Allah ako warogo hunekharek etnogo meke waganhesik, hetuken temekharek meke etnogo akla ukharlogo, agat oba wukhogon usa'isa aga laga. Itithogon usa'isa agunem, o yabok eran-alep yibarlabethekhe dogolik, pogot ane kogat luk-luk igik, dugul kogat luk-lagathigik, hagakhunem higi o.

⁶Itithogon higirik oba nen, oporlik malaikat inebe 7 baga emenogo pikon kok meke hakene ebe 7 baga ane huthauwogoluk tiktuk-taktuk hagakhe lageikha hisigi o.

⁷Itithogon hagatdegasik nen, alebageik malaikat ageikhe apikon ane huthasinem miso digiken inom, hetu inom, mep inom, dapukhogon hagarogo agat oba po usabi agunem, agat inom, o koktek inom, inebe 3 baga mikirlogo 'biluk pere here'ekhe dogolik, ageikhe hali dukhogon nikik, o ket meke inom, oka herleka ket meke tha'bokhogonat inom nikik, hagakhunem lakhigi.

⁸Iti hak, at malaikat ageikhe alebageik apikon ane huthekhesik oba nen, yabokane at ageikhe apikon huthasinem tom hakene kok meke ageikhe hetu amulok dukhisinem, po i laut yekelekma usa'i agunem, i laut inom, Allah nen winametdisikhe meke i laut akla welagarek meke inom, ku kok meke etaga kapal inom, ebe 3 baga mikirlogo 'biluk, pere here'ekhe dogolik, ageikhe weagatdisinem he, i elokhoken mep ageik, yi meke ti meke ima meke aperek watlageik, kapal weagat lageik, hagakhunem lakhigi o.

¹⁰Itithogon it malaikat pere inapikon ane huthegasik oba nen ageikhe apikon ane huthasinem, husagal kok meke pogot oba nen isagal yibarlek negen amulok yibarlek hakene usa'agasik, i elesimoke inom, i ebe kok asi agarekmake inom, 3 baga mikirlogo 'biluk, pere here'ekhe dogolik, ageikhe arle weak meke hagarogo 'bekhe laga higi. Husagal iti etaga, Arle Weak eka. At nen i arle hagarogo 'bekhesikmo nen, akhuni i nasinem inebe doalegat watlaga lageikha lageisigi.

¹²Itithogon malaikat inebe henagan inapikon ane huthegasik oba nen, ageikhe apikon huthasinem mulikin inom, tugi inom, husagal inom, akhuni tugi inakhunem inobatne dek ageikharek iti hak, ina'bi'bal 3 oba mikirlogo 'biluk, pere here'isekhe dogolik, ageikhe mum atluk yakhidek huk aga dogolik, o dikene opakiat meke, kokmake mo yakhe dogoluk nen, 'bugurlakmake yakhidek huk ageik, o hibakone opakiat meke, kokmake lia negen dogoluk nen, herlekha'bukmoke mum motok ageik, aga laga lakhigi.

¹³Itithogon aga lagasik oba nen, yabokane lakhigi meke, thue kok ko'balusa hakene meke pogot oba walegat upukeat a'bikha lalan hitluk nekhe dogolik, ane kogat men ekhe laga, “Malaikat inebe 4 inapikon ane huthegasik oba nen, yabokane malaikat inebe 3 oba inapikon ane huthasinem, akhuni tha'bokhogonat agat oba welageikharek meke, motok weagathinabigin iti, Eiye! Eiye! Nakmu lak o!” iluk ilik nekhe laga nasuk holhi o.